ଦିଲ୍ଲୀରେ କୋରୋନା ଆକ୍ରାନ୍ତଙ୍କ ସଂଖ୍ୟା ଛୁଇଁଲା ୬୫୪୨

ନୂଆଦିଲ୍ଲୀ: ଦିଲ୍ଲୀରେ କୋରୋନା ଭାଇରସ ସଂକ୍ରମିତ ରୋଗୀଙ୍କ ସଂଖ୍ୟା ୬୫୪୨କୁ ବୃଦ୍ଧି ପାଇଛି । ଗତ ୮ ଘଣ୍ଟା ମଧ୍ୟରେ ୨୨୪ ନୂତନ କୋରୋନା ପଜିଟିଭ ଚିହ୍ନଟ ହୋଇଛି । ଆଉ କୌଣସି ରୋଗୀ ଆରୋଗ୍ୟ ହୋଇ ନାହାଁନ୍ତି କିମ୍ବା କୌଣସି ଆକ୍ରାନ୍ତଙ୍କ ମୃତ୍ୟୁ ହୋଇନାହିଁ । ବାସ୍ତବରେ ଦିଲ୍ଲୀ ସରକାର ଆଇସିଏମଆର ଅନୁଯାୟୀ ନିଜ ସମୟ ଚକ୍ରରେ ପରିବର୍ତ୍ତନ କରିଛନ୍ତି । ଏହାପୂର୍ବରୁ ୨୪ ଘଣ୍ଟିଆ ତଥ୍ୟ ଗୋଟିଏ ଦିନରେ ଅପରାହ୍ନ ୪ଟାରୁ ଦ୍ୱିତୀୟ ଦିନ ଅପରାହ୍ନ ୪ଟା ପର୍ଯ୍ୟନ୍ତ ପ୍ରକାଶ ପାଉଥିଲା । ବର୍ତ୍ତମାନ ରାତି ୧୨ ଟାରୁ ଆରମ୍ଭ କରି ତା ପରଦିନ ରାତି ୧୨ ପର୍ଯ୍ୟନ୍ତ ଏହି ଡାଟା ଉପଲବ୍ଧ ହେବ ।

ଶନିବାରର ସ୍ୱାସ୍ଥ୍ୟ ବୁଲେଟିନ୍ ଜାରି କରାଯାଇଛି । ଯାହା ମେ ୮ର ଦିନ ୪ଟାରୁ ରାତି ୧୨ଟା ପର୍ଯ୍ୟନ୍ତ । ଅର୍ଥାତ ଏହି ଡାଟା ମାତ୍ର ୮ ଘଣ୍ଟାର ରହିଛି । ବର୍ତ୍ତମାନ ପରବର୍ତ୍ତୀ ସ୍ୱାସ୍ଥ୍ୟ ବୁଲେଟିନ୍ ରବିବାର ସକାଳେ ପ୍ରକାଶ ପାଇବ । ସେହି ସ୍ୱାସ୍ଥ୍ୟ ବୁଲେଟିନରେ କୁହାଯିବ ଯେ ମେ ୯ରେ କୋରୋନାକୁ ନେଇ ଦିଲ୍ଲୀର ଅବସ୍ଥା କ’ଣ ରହିଛି । ଅର୍ଥାତ୍, ବର୍ତ୍ତମାନ ସ୍ୱାସ୍ଥ୍ୟ ବୁଲେଟିନ ରାତି ପରିବର୍ତ୍ତେ ସକାଳେ ଆସିବ । ଦିଲ୍ଲୀରେ ଏହି ଭୂତାଣୁ ସଂକ୍ରମଣ ଯୋଗୁଁ ଏପର୍ଯ୍ୟନ୍ତ ୬୮ ଜଣଙ୍କ ମୃତ୍ୟୁ ଘଟିଛି ।

ଅନ୍ୟପକ୍ଷେ ଦେଶରେ କୋରୋନା ଯୋଗୁଁ ମୃତ୍ୟୁବରଣ କରିଥିବା ଲୋକଙ୍କ ସଂଖ୍ୟା ଶନିବାର ୧,୯୮୧କୁ ବୃଦ୍ଧି ପାଇଛି । କୋରୋନା ସଂକ୍ରମିତ ଲୋକଙ୍କ ସଂଖ୍ୟା ୫୯,୬୬୨ ରେ ପହଞ୍ଚିଛି । ଗତ ୨୪ ଘଣ୍ଟା ମଧ୍ୟରେ ଏହି ଭୂତାଣୁ ଯୋଗୁଁ ୯୫ ଜଣଙ୍କ ମୃତ୍ୟୁ ଘଟିଛି । ଏହା ବ୍ୟତୀତ ୩,୩୨୦ ନୂଆ ପଜିଟିଭ ମାମଲା ସାମ୍ନାକୁ ଆସିଛି । କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ କହିଛି ଯେ ଦେଶରେ ୩୯,୮୩୪ ଲୋକ ଚିକିତ୍ସିତ ହେଉଥିବାବେଳେ ୧୭,୮୪୬ ଲୋକ ସୁସ୍ଥ ହୋଇଛନ୍ତି । ଜଣେ ରୋଗୀ ବିଦେଶ ଯାଇଛନ୍ତି ।