ଏମିତି ମଜାଦାର ଷ୍ଟାଇଲରେ ପ୍ରପୋଜ କରିଥିଲେ କ୍ରୁନାଲ, ଫିଦା ହୋଇଯାଇଥିଲେ ପଙ୍ଖୁଡ଼ି

ନୂଆଦିଲ୍ଲୀ: କେବଳ ଖେଳର କାହିଁକି, ପ୍ରେମର ମଧ୍ୟ ବେଶ୍ ମାହିର ଭାରତୀୟ ଖେଳାଳି । ଭାରତୀୟ କ୍ରିକେଟର୍ସଙ୍କ ପ୍ରେମ କାହାଣୀ ଫିଲ୍ମ କାହାଣୀ ଠାରୁ କିଛି କମ୍ ନୁହେଁ । ଫିଲ୍ମରେ ଯେମିତି ରୋମାନ୍ସ, ଡ୍ରାମା ଇତ୍ୟାଦି ଥାଏ, କିଛି ଖେଳାଳିଙ୍କ ପ୍ରେମ କାହାଣୀରେ ମଧ୍ୟ ଏସବୁ ଦେଖିବାକୁ ମିଳିଛି । ଆଜି ଆମେ ଭାରତୀୟ କ୍ରିକେଟ ଟିମର ଅଲରାଉଣ୍ଡର କ୍ରୁନାଲ ପାଣ୍ଡ୍ୟା (Krunal Pandya)ଙ୍କ ପ୍ରେମ କାହାଣୀ ବିଷୟରେ କହିବୁ ।

ଟିମ ଇଣ୍ଡିଆର ଷ୍ଟାର କ୍ରିକେଟର ହାର୍ଦ୍ଧିକ ପାଣ୍ଡ୍ୟା (Hardik Pandya)ଙ୍କ ବଡ଼ ଭାଇ କ୍ରୁନାଲ ପାଣ୍ଡ୍ୟା । ୨୦୧୮ରେ ଟିମ୍ ଇଣ୍ଡିଆ ପାଇଁ ଖେଳିବା ଆରମ୍ଭ କରିଥିଲେ କୁନାଲ । ୨୦୧୭ ଆଇପିଏଲରେ ମୁମ୍ବାଇ ଇଣ୍ଡିଆନ ପକ୍ଷରୁ ସେ ଭଲ ପ୍ରଦର୍ଶନ କରିଥିଲେ । ସେହିବର୍ଷ ତାଙ୍କ ଦଳ ଚମ୍ପିଆନ ମଧ୍ୟ ହୋଇଥିଲା । ଫାଇନାଲ ମ୍ୟାଚରେ କ୍ରୁନାଲ ମ୍ୟାନ ଅଫ ଦି ମ୍ୟାଚ ବିଜେତା ହୋଇଥିଲେ । ଗୁରୁତ୍ୱପୂର୍ଣ୍ଣ କଥା ଥିଲା, ମୁମ୍ବାଇ ଇଣ୍ଡିଆନ ବିଜେତା ହେବା ପରେ ଗର୍ଲଫ୍ରେଣ୍ଡ ପଙ୍ଖୁଡ଼ିକୁ ପ୍ରପୋଜ କରିଥିଲେ କ୍ରୁନାଲ । 

କହିରଖୁଛୁ, ୨୦୧୫ରେ ଜଣେ ମ୍ୟୁଚୁଆଲ ଫ୍ରେଣ୍ଡ ମାଧ୍ୟମରେ କ୍ରୁନାଲ ଓ ପଙ୍ଖୁଡ଼ି ଶର୍ମା ପରସ୍ପରକୁ ଭେଟିଥିଲେ । ପ୍ରଥମ ଦେଖାରେ ହିଁ ଉଭୟେ ଭଲ ବନ୍ଧୁ ପାଲଟି ଯାଇଥିଲେ । ଏହି ସମୟରେ ଆହତ କାରଣରୁ ମୁମ୍ବାଇରେ ହିଁ ରହୁଥିଲେ କ୍ରୁନାଲ । ଆଉ ପଙ୍ଖୁଡ଼ିଙ୍କୁ ଅନେକ ସମୟରେ ଦେଖା ମଧ୍ୟ କରୁଥିଲେ । ଧୀରେ ଧୀରେ ଉଭୟେ ପରସ୍ପରକୁ ଡେଟ କରିବା ମଧ୍ୟ ଆରମ୍ଭ କରିଥିଲେ । 

କିନ୍ତୁ ଏହି ପ୍ରେମ କାହାଣୀ ନିଜ ଭିତରେ ହିଁ ସୀମିତ ରଖିଥିଲେ କ୍ରୁନାଲ । ଏପରିକି ସାନ ଭାଇ ହାର୍ଦ୍ଧିକ ପାଣ୍ଡ୍ୟାକୁ ମଧ୍ୟ କହିନଥିଲେ । ତେବେ ସମୟ କ୍ରମେ ଉଭୟଙ୍କ ମଧ୍ୟରେ ଆଫାୟାର୍ସ ବଢ଼ିଥିଲା । ଏନେଇ ହାର୍ଦ୍ଧିକ ପାଣ୍ଡ୍ୟା ମଧ୍ୟ ଜାଣିବାକୁ ପାଇଥିଲେ । କ୍ରୁନାଲ ଯେ ତାଙ୍କୁ ଏହି କଥା ଏତେ ଦିନ ଧରି ଛୁପାଇ ରଖିପାରିବେ, ଏକଥା ହାର୍ଦ୍ଧିକ ବି ବିଶ୍ୱାସ କରିପାରିନଥିଲେ । ହେଲେ ଯେତେବେଳେ ପଙ୍ଖୁଡ଼ିଙ୍କ ସହ ହାର୍ଦ୍ଧିକ ସାକ୍ଷାତ କରିଥିଲେ, ସେମାନଙ୍କ ଭିତରେ ମଧ୍ୟ ଭଲ ବନ୍ଧୁତା ହୋଇଯାଇଥିଲା । 

ସମୟକ୍ରମେ କ୍ରୁନାଲ ଓ ପଙ୍ଖୁଡ଼ିଙ୍କ ମଧ୍ୟରେ ସମ୍ପର୍କ ବଢ଼ିଥିଲା । ଆଉ ୨୦୧୭ ଆଇପିଏଲ ଫାଇନାଲ  ଜିତିବା ପରେ ପଙ୍ଖୁଡ଼ିଙ୍କୁ ପ୍ରେମ ନିବେଦନ କରିଥିଲେ କ୍ରୁନାଲ । ଏପରିକି ବିବାହ ପାଇଁ କହିଥିଲେ । ତେବେ କ୍ରୁନାଲଙ୍କ ପ୍ରପୋଜ ଷ୍ଟାଇଲ ବେଶ୍ ମଜାଦାର ଥିଲା । ହୋଟେଲ ରୁମରେ ଗୀତ ଗାଇବା ସହ ସେ ପ୍ରପୋଜ କରିଥିଲେ । ଏହି ସମୟରେ ଭାଇ ହାର୍ଦ୍ଧିକ ପାଣ୍ଡ୍ୟା ଓ ଟିମର ଅନ୍ୟ ଖେଳାଳି ମଧ୍ୟ ଉପସ୍ଥିତ ଥିଲେ । ଆଉ ସଭିଙ୍କ ସାମ୍ନାରେ ପଙ୍ଖୁଡ଼ିଙ୍କୁ ପ୍ରପୋଜ କରିଥିଲେ କ୍ରୁନାଲ । 

ପ୍ରଥମେ କ୍ରୁନାଲଙ୍କ ଏପରି ଷ୍ଟାଇଲ ଦେଖି ପୁରା ଆଶ୍ଚର୍ଯ୍ୟ ହୋଇପଡ଼ିଥିଲେ ପଙ୍ଖୁଡ଼ି । କାହିଁକିନା ଏହା କ୍ରୁନାଲଙ୍କ ସରପ୍ରାଇଜ ଥିଲା । ଗୁରୁତ୍ୱପୂର୍ଣ୍ଣ କଥା ଥିଲା, ପଙ୍ଖୁଡ଼ି ମଧ୍ୟ ହଁ କହିବାକୁ ବେଶି ବିଳମ୍ବ କରିନଥିଲେ । ଆଉ ସେହି ବର୍ଷ ହିଁ ଡିସେମ୍ବର ମାସରେ ଉଭୟଙ୍କ ବାହାଘର ହୋଇଥିଲା । 

ବିବାହ ପରେ ଏକ ସାକ୍ଷାତକାରରେ କ୍ରୁନାଲ ନିଜ ପ୍ରପୋଜ ଷ୍ଟାଇଲକୁ ନେଇ ବେଶ୍ ମଜାଦାର କଥା କହିଥିଲେ । ସଭିଙ୍କ ସାମ୍ନାରେ କାହିଁକି ପଙ୍ଖୁଡ଼ିଙ୍କୁ ପ୍ରପୋଜ କରିଥିଲେ କ୍ରୁନାଲ ? ଯଦି ପଙ୍ଖୁଡ଼ି ମନା କରିଥାନ୍ତେ, ତେବେ କ'ଣ ହୋଇଥାନ୍ତା ! ତେବେ ପ୍ରେମ ନିବେଦନକୁ କ୍ରିକେଟ ସହ ତୁଳନା କରି ଏହାର ଉତ୍ତର ରଖିଥିଲେ କ୍ରୁନାଲ । ଯେତେବେଳେ ପଡ଼ିଆରେ ବ୍ୟାଟ୍ସମ୍ୟାନ ବ୍ୟାଟିଂ କରୁଥାଏ, ତାକୁ ଜଣାନଥାଏ ପରବର୍ତ୍ତି ବଲ କେମିତି ଆସିବ ? ବୋଲର କେଉଁଠିକୁ ବୋଲିଂ କରିବ ? ଆଉ ପ୍ରେମ ମାମଲା ମଧ୍ୟ କିଛି ଏପରି ବୋଲି କହିଥିଲେ କ୍ରୁନାଲ ।