 "ଆଜିଠୁ ଚାରି ଦିନ ବ୍ୟାଙ୍କ ବନ୍ଦ, Strike ପରେ ବି ଖୋଲିବନି ସଟର୍")
ନୂଆଦିଲ୍ଲୀ: ଯଦି ଆପଣ କିଛି କାମ ପାଇଁ ବ୍ୟାଙ୍କକୁ ଯିବାକୁ ଯୋଜନା କରୁଛନ୍ତି ତେବେ ଏହି ଖବର ପଢନ୍ତୁ। ଆସନ୍ତା ତିନି ଦିନ ପାଇଁ ବ୍ୟାଙ୍କଗୁଡିକ ବନ୍ଦ ରହିବ। ଗୁରୁବାର ଠାରୁ ସାରା ଦେଶରେ ସରକାରୀ ବ୍ୟାଙ୍କ କର୍ମଚାରୀମାନେ ଦୁଇ ଦିନିଆ ଧର୍ମଘଟ ଡାକରା ଦେଇଛନ୍ତି। ଏହା ପରେ ସାପ୍ତାହିକ ଛୁଟି ହେତୁ ରବିବାର ମଧ୍ୟ ବ୍ୟାଙ୍କଗୁଡିକ ବନ୍ଦ ରହିବ।
ୟୁନାଇଟେଡ୍ ଫୋରମ୍ ଅଫ୍ ବ୍ୟାଙ୍କ ୟୁନିଅନ୍ ଦ୍ୱାରା ଦୁଇ ଦିନିଆ ଧର୍ମଘଟ ଡାକରା ଦିଆଯାଇଛି। ବ୍ୟାଙ୍କ ଗୁଡିକୁ ସରକାର ଘରୋଇକରଣ ପାଇଁ ଚାଲିଥିବା ପ୍ରସ୍ତୁତିକୁ ବିରୋଧ କରିବାକୁ UFBU ଧର୍ମଘଟ ଘୋଷଣା କରିଛି। UFBU ଅଧୀନରେ ବ୍ୟାଙ୍କଗୁଡିକର ନଅଟି ୟୁନିଅନ୍ ଅଛି। ଏହି ଧର୍ମଘଟ ଯୋଗୁଁ ଲୋକମାନେ ବହୁ କଷ୍ଟ ଭୋଗିବାକୁ ଯାଉଛନ୍ତି।
ଏହି ସପ୍ତାହର ଅବଶିଷ୍ଟ ଚାରି ଦିନ ପାଇଁ ବ୍ୟାଙ୍କ ଗୁଡିକ ବନ୍ଦ ରହିବ। ଘର୍ମଘଟ ପାଇଁ ଗୁରୁବାର ଓ ଶୁକ୍ରବାର ବ୍ୟାଙ୍କ ଗୁଡିକ ବନ୍ଦ ରହିବ। ଶନିବାର ଶିଲଙ୍ଗରେ ବ୍ୟାଙ୍କଗୁଡିକ ବନ୍ଦ ରହିବ। ରିଜର୍ଭ ବ୍ୟାଙ୍କର କ୍ୟାଲେଣ୍ଡର ଅନୁଯାୟୀ, ଡିସେମ୍ବର ୧୮ ୟୁସୋସୋ ଥାମର ମୃତ୍ୟୁ ବାର୍ଷିକୀ ହେତୁ ଶିଲଙ୍ଗର ବ୍ୟାଙ୍କଗୁଡିକରେ କୌଣସି କାମ ହେବ ନାହିଁ। ସେହିପରି ରବିବାର ମଧ୍ୟ ବ୍ୟାଙ୍କ ବନ୍ଦ ରହିବ।
ସଂସଦର ଚାଲିଥିବା ଶୀତକାଳୀନ ଅଧିବେଶନରେ ବ୍ୟାଙ୍କିଙ୍ଗ୍ ଆଇନ (ସଂଶୋଧନ) ବିଲ୍ ଆଗତ ଏବଂ ପାସ୍ କରିବାକୁ ସରକାର ପ୍ରସ୍ତୁତି ଚଳାଇଛନ୍ତି। ଏହାକୁ ସଂସଦର ଏଜେଣ୍ଡାରେ ଅନ୍ତର୍ଭୁକ୍ତ କରାଯାଇଛି। ଅଲ ଇଣ୍ଡିଆ ବ୍ୟାଙ୍କ କର୍ମଚାରୀ ସଂଘ (AIBEA) ର ସାଧାରଣ ସମ୍ପାଦକ CH Venkatachalam କହିଛନ୍ତି ଯେ, ବ୍ୟାଙ୍କ କର୍ମଚାରୀ ସଂଘର ଫେଡେରେସନ୍ UFBU ସରକାରଙ୍କ ନିଷ୍ପତିକୁ ବିରୋଧ କରୁଛି। ଏଥିପାଇଁ ଡିସେମ୍ବର ୧୬ ଓ ୧୭ରେ ଧର୍ମଘଟ ନିମନ୍ତେ UFBU ଆଇବିଏକୁ ନୋଟିସ ଦେଇଛି।
ସୂଚନାଯୋଗ୍ୟ, ବଜେଟ୍-୨୦୨୧ ଉପସ୍ଥାପନ କରି ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଛନ୍ତି ଯେ, ସରକାରୀ ବ୍ୟାଙ୍କଗୁଡିକ ଘରୋଇକରଣ କରାଯିବ। ଘରୋଇକରଣ ପାଇଁ NITI ଆୟୋଗ ଦୁଇଟି ବ୍ୟାଙ୍କର ନାମ ଘୋଷଣା କରିଥିଲେ ଯେଉଁଥିରେ ସେଣ୍ଟ୍ରାଲ ବ୍ୟାଙ୍କ ଅଫ୍ ଇଣ୍ଡିଆ ଏବଂ ଇଣ୍ଡିଆନ୍ ଓଭରସିଜ୍ ବ୍ୟାଙ୍କର ନାମ ପ୍ରକାଶ ପାଇଥିଲା। କିନ୍ତୁ ବର୍ତ୍ତମାନ ବ୍ୟାଙ୍କ ଅଫ୍ ଇଣ୍ଡିଆର ନାମ ମଧ୍ୟ ସାମ୍ନାକୁ ଆସୁଛି।
ଫେବୃଆରୀରେ ଉପସ୍ଥାପିତ ହୋଇଥିବା କେନ୍ଦ୍ର ବଜେଟରେ ଅର୍ଥମନ୍ତ୍ରୀ ନିର୍ମଳା ସୀତାରମଣ ଘୋଷଣା କରିଥିଲେ ଯେ, ଆସନ୍ତା ଅଧିବେଶନରେ ଦୁଇଟି ସରକାରୀ ବ୍ୟାଙ୍କ (PSBs) ଘରୋଇକରଣ ହେବ। ସରକାର ଏହାର ବିନିଯୋଗ କାର୍ଯ୍ୟକ୍ରମ ଅଧୀନରେ ଏହି ଘରୋଇକରଣ କରିବାକୁ ଯାଉଛନ୍ତି। ୨୦୧୯ରେ କେନ୍ଦ୍ର ସରକାର IDBI ବ୍ୟାଙ୍କକୁ ଘରୋଇକରଣ କରିସାରିଛନ୍ତି। ଏହା ଏହି ବ୍ୟାଙ୍କର ଅଧିକାଂଶ ଅଂଶଧନକୁ LICକୁ ବିକ୍ରି କରିଛି। ଗତ ଚାରି ବର୍ଷ ମଧ୍ୟରେ ୧୪ଟି ସାର୍ବଜନୀନ କ୍ଷେତ୍ର ବ୍ୟାଙ୍କ ମଧ୍ୟ ମିଶ୍ରିତ ହୋଇଛି।
)