ପଞ୍ଜାବରୁ ଧରାପଡିଲେ ଦୁଇ ପାକିସ୍ତାନୀ ଗୁପ୍ତଚର, ସେନାର ଗତିବିଧି ନେଇ ଦେଉଥିଲେ ସୂଚନା !

ନୂଆଦିଲ୍ଲୀ: ଭାରତ ଏବଂ ପାକିସ୍ତାନ ମଧ୍ୟରେ ଉତ୍ତେଜନା ଥମିବାର ନାଁ ନେଉନଥିବା ମଧ୍ୟରେ ଆଉ ଏକ ଖବର ସାମ୍ନାକୁ ଆସିଛି । ପଞ୍ଜାବରୁ ଦୁଇ ଜଣ ଗୁପ୍ତଚରଙ୍କୁ ଗିରଫ କରିଛି ପୋଲିସ୍। ପାକିସ୍ତାନ ପାଇଁ ଗୁପ୍ତଚର କାର୍ଯ୍ୟ କରୁଥିବା ଦୁଇ ଜଣଙ୍କୁ ଆଜି ପଞ୍ଜାବ ପୋଲିସ ଗିରଫ କରିଛି। ଉଭୟ ବ୍ୟକ୍ତି ଦିଲ୍ଲୀରେ ଅବସ୍ଥାପିତ ପାକିସ୍ତାନ ହାଇକମିଶନର ଜଣେ ଅଧିକାରୀଙ୍କ ପାଇଁ ଗୁପ୍ତଚର ଭାବେ କାର୍ଯ୍ୟ କରୁଥିଲେ। ଉଭୟ ଅଭିଯୁକ୍ତଙ୍କୁ ମାଲେରକୋଟଲାରୁ ପୋଲିସ ଗିରଫ କରିଥିବା ସୂଚନା ମିଳିଛି।

ପଞ୍ଜାବ ପୋଲିସ ମହାନିର୍ଦ୍ଦେଶକ (ଡିଜିପି) ଗୌରବ ଯାଦବ ସୋସିଆଲ ମିଡିଆ ପ୍ଲାଟଫର୍ମ ଏକ୍ସ ମାଧ୍ୟମରେ ଏ ସମ୍ପର୍କରେ ସୂଚନା ପ୍ରଦାନ କରିଛନ୍ତି। ଡିଜିପିଙ୍କ ସୂଚନା ମୁତାବକ, ଅଭିଯୁକ୍ତମାନଙ୍କ ମଧ୍ୟରୁ ଜଣେ ପାକିସ୍ତାନରେ ବସିଥିବା ତାଙ୍କ ହ୍ୟାଣ୍ଡଲରଙ୍କୁ ଭାରତୀୟ ସେନାର କାର୍ଯ୍ୟକଳାପ ସମ୍ବନ୍ଧୀୟ ଗତିବିଧି ନେଇ ସୂଚନା ଦେଉଥିଲେ। ପ୍ରଥମେ ପୋଲିସ ଜଣକୁ ଗିରଫ କରି ପଚରାଉଚରା କରିବା ପରେ ସେ ଅନ୍ୟ ସହଯୋଗୀଙ୍କ ନାମ ପ୍ରକାଶ କରିଥିଲା। ସେହି ତଥ୍ୟ ଆଧାରରେ ପୋଲିସ ତାଙ୍କର ଅନ୍ୟ ସହଯୋଗୀଙ୍କୁ ମଧ୍ୟ ଗିରଫ କରିବାରେ ସଫଳ ହୋଇଥିଲା ।

ପ୍ରାରମ୍ଭିକ ତଦନ୍ତରୁ ପୋଲିସ ଜାଣିବାକୁ ପାଇଛି ଯେ, ଅଭିଯୁକ୍ତମାନେ ଦେଶ ଏବଂ ସେନା ସହିତ ଜଡିତ ଗୁପ୍ତ ସୂଚନା ଶତ୍ରୁମାନଙ୍କୁ ଦେଉଥିଲେ ଏବଂ ତାହା ବଦଳରେ ମୋଟା ଅଙ୍କର ଟଙ୍କା ପାଉଥିଲେ। ଅଭିଯୁକ୍ତଙ୍କୁ ଅନଲାଇନ ମାଧ୍ୟମରେ ଟଙ୍କା ପଠାଯାଉଥିଲା । ଉଭୟ ଅଭିଯୁକ୍ତ ନିୟମିତ ଭାବରେ ସେମାନଙ୍କର ପାକିସ୍ତାନ ସ୍ଥିତ ହ୍ୟାଣ୍ଡଲରଙ୍କ ସହ ଯୋଗାଯୋଗରେ ଥିଲେ ଏବଂ ତାଙ୍କ ନିର୍ଦ୍ଦେଶରେ ସମସ୍ତ କାର୍ଯ୍ୟ କରୁଥିଲେ। ଉଭୟଙ୍କ ନିକଟରୁ ଦୁଇଟି ମୋବାଇଲ୍ ଫୋନ୍ ମଧ୍ୟ ଜବତ କରିଛି ପୋଲିସ। ଦୁଇ ଜଣଙ୍କ ନାମରେ ମାମଲା ରୁଜୁ କରି ଘଟଣାର ତଦନ୍ତ କରାଯାଉଥିବା ସୂଚନା ମିଳିଛି।

ଡିଜିପି ଗୌରବ ଯାଦବଙ୍କ କହିବାନୁଯାୟୀ, ଜାତୀୟ ସୁରକ୍ଷା ଦୃଷ୍ଟିକୋଣରୁ, ଏହି ଅପରେସନ ସୀମା ଆରପାରିରେ ଚାଲିଥିବା ଗୁପ୍ତଚର କାର୍ଯ୍ୟକଳାପର ନେଟୱାର୍କକୁ ଭାଙ୍ଗିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଅଭିଯୁକ୍ତଙ୍କୁ ଅଧିକ ପଚରାଉଚରା କରିବା ପରେ ହୁଏତ ଆହୁରି କିଛି ଗୁରୁତ୍ୱପୂର୍ଣ୍ଣ ତଥ୍ୟ ହାସଲ ହୋଇପାରେ । ଏହି ଅଭିଯୁକ୍ତମାନଙ୍କ ସମ୍ପର୍କରେ ଆହୁରି କେତେ ଜଣ ଅଛନ୍ତି ସେ ସମ୍ପର୍କରେ ଜାଣିବାକୁ ପୋଲିସ ପକ୍ଷରୁ ପ୍ରୟାସ କରାଯାଉଛି । ଏହି ମାମଲାରେ ଆହୁରି ଗିରଫଦାରୀ ସଂଖ୍ୟା ବଢିପାରେ ବୋଲି ଆକଳନ କରାଯାଉଛି ।

Also Read- Kidney Problem: ଏହି ୫ଟି କାରଣ ପାଇଁ ଖରାପ ହୋଇଯାଏ କିଡନୀ, ଜାଣନ୍ତୁ ସୁସ୍ଥ ରହିବାର ଉପାୟ !

Also Read- Heat Wave: ଆଜି ତାପମାତ୍ରାରେ ରେକର୍ଡ କଲା ଭୁବନେଶ୍ୱର, ପାରା ଟପିଲା ଏତିକି