୫୯ ଚାଇନିଜ ଆପ୍ ବ୍ୟାନ ପରେ ଏମିତି କହିଲା ଆମେରିକା...

ନୂଆଦିଲ୍ଲୀ: ୫୯ ଚାଇନିଜ ଆପକୁ ବ୍ୟାନ କରିଛି ଭାରତ । ଯାହାକୁ ସ୍ୱାଗତ କରିଛି ଆମେରିକା । ଆମେରିକା ବୈଦେଶିକ ମନ୍ତ୍ରୀ ମାଇକ ପୋମ୍ପିଓ ଏକ ବୟାନରେ କହିଛନ୍ତି, ଏହାଦ୍ୱାର ଭାରତର ଅଖଣ୍ଡତା ଏବଂ ରାଷ୍ଟ୍ରୀୟ ସୁରକ୍ଷା ବୃଦ୍ଧି ପାଇବ । 

ଏକ ସାମ୍ବାଦିକ ସମ୍ମିଳନୀରେ ସେ କହିଛନ୍ତି, କିଛି ମୋବାଇଲ ଆପ ଉପରେ ଭାରତର ନିଷେଧାଦେଶକୁ ଆମେ ସ୍ୱାଗତ କରୁଛୁ ଯାହା ଚାଇନିଜ କମ୍ୟୁନିଷ୍ଟ ପାର୍ଟିର ମନିଟରିଂରେ କାମ କରିଥାଏ । ଏହିସବୁ ଆପ୍ ଉପରେ ଭାରତର ଆଭିମୁଖ୍ୟ ସାର୍ବଭୌମତ୍ୱକୁ ବୃଦ୍ଧି କରିବ । ଭାରତର ଅଖଣ୍ଡତା ଏବଂ ଜାତୀୟ ନିରାପତ୍ତାକୁ ମଧ୍ୟ ଏହା ପ୍ରୋତ୍ସାହିତ କରିବ । 

ଏଠାରେ ଆପଣଙ୍କୁ କହିରଖୁଛୁ, ସୀମାରେ ବିବାଦ ପରେ ସୋମବାର ଭାରତ ଟିକଟକ ଓ ହେଲୋ ସମତେ ୫୯ ଚାଇନିଜ ଆପକୁ ବ୍ୟାନ କରିଦେଇଛି । 

ଗତ ୧୫ ଜୁନରେ ଗଲୱାନ ଭ୍ୟାଲିରେ ଭାରତ ଓ ଚୀନ ସୈନିକଙ୍କ ମଧ୍ୟରେ ରକ୍ତାକ୍ତ ସଂଘର୍ଷ ହୋଇଥିଲା । ଏଥିରେ ଭାରତର ୨୦ ଯବାନ ଶହୀଦ ହୋଇଥିଲେ । ସେପଟେ ଚୀନର ମଧ୍ୟ ପ୍ରବଳ କ୍ଷତି ହୋଇଥିଲା । ସେବେଠୁ ଭାରତ ଓ ଚୀନ ମଧ୍ୟରେ ତିକ୍ତତା ଲାଗିରହିଛି ।