ବିକାଶର ଗିରଫଦାରୀ, ଆତ୍ମପ୍ରଶଂସାର ଶିବରାଜ ସରକାର

ନୂଆଦିଲ୍ଲୀ: ୮ ପୋଲିସ କର୍ମଚାରୀଙ୍କୁ ହତ୍ୟା କରିବା ଘଟଣାର ମୁଖ୍ୟ ଅଭିଯୁକ୍ତ ବିକାଶ ଦୁବେ ଶେଷରେ ଗିରଫ ହୋଇଛି । ମଧ୍ୟପ୍ରଦେଶର ଉଜ୍ଜୈନରୁ ତାକୁ ଗିରଫ କରିଛି ପୋଲିସ । ଉଜ୍ଜୈନର ମହାକାଳ ମନ୍ଦିରରୁ ସେ ଧରାପଡ଼ିଛି । ଆଉ ଏହାପରେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ଶିବରାଜ ସିଂହ ଚୌହାନ ଉଜ୍ଜୈନ ପୋଲିସକୁ ଧନ୍ୟବାଦ ଦେଇଛନ୍ତି । ସେହିପରି ନିଜ ସରକାରକୁ ମଧ୍ୟ କଥାଛଳରେ ତାରିଫ କରିଛନ୍ତି । 

ଗୋଟିଏ ଟ୍ୱିଟରେ ଶିବରାଜ କହିଛନ୍ତି, ''ଯଦି କିଏ ଭାବୁଛି ମହାକାଳ ମନ୍ଦିର ଗଲେ ପାପ କ୍ଷୟ ହୋଇଯିବ, ସେ ଯିବା ହିଁ ଦରକାର ନାହିଁ । ଆମ ସରକାର କୌଣସି ଅପରାଧୀକୁ ମଧ୍ୟ ରକ୍ଷାକରିବ ନାହିଁ ।'' 

जिनको लगता है की महाकाल की शरण में जाने से उनके पाप धूल जाएँगे उन्होंने महाकाल को जाना ही नहीं।

हमारी सरकार किसी भी अपराधी को बख्श्ने वाली नहीं है...

— Shivraj Singh Chouhan (@ChouhanShivraj) July 9, 2020

ସେହିପରି ବିକାଶ ଦୁବେର ଗିରଫଦାରୀ ନେଇ ୟୁପି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସହ କଥା  ହୋଇସାରିଥିବା ଅନ୍ୟ ଏକ ଟ୍ୱିଟରେ କହିଛନ୍ତି ଶିବରାଜ । ଆଇନ ଅନୁଯାୟୀ ପରବର୍ତ୍ତୀ ପଦକ୍ଷେପ ନିଆଯିବ ବୋଲି ସେ କହିଛନ୍ତି । 

କହିରଖୁଛୁ, କାନପୁର ଏନକାଉଣ୍ଟରର ମାଷ୍ଟରମାଇଣ୍ଡ ବିକାଶ ଦୁବେ ଗତ ଏକ ସପ୍ତାହ ହେଲା ପୋଲିସକୁ ଚକମା ଦେଇ ଏଠି ସେଠି ଘୁରି ବୁଲୁଥିଲା । ଅନ୍ୟପଟେ ବିକାଶ ଦୁବେକୁ ଧରିବା ପାଇଁ ଦିନ ରାତି ଏକ କରିଦେଇଥିଲା ୟୁପି ପୋଲିସ । ଏନେଇ ଅନ୍ୟ ରାଜ୍ୟଗୁଡ଼ିକୁ ମଧ୍ୟ ଆଲର୍ଟ ରହିବାକୁ କୁହାଯାଇଥିଲା । ଆଉ ଏହାରି ଭିତରେ ବିକାଶର ୩ ସହଯୋଗୀଙ୍କୁ ମଧ୍ୟ ଏନକାଉଣ୍ଟର କରାଯାଇଛି । ଶେଷରେ ଧରାପଡ଼ିଛି ବିକାଶ ଦୁବେ । ଏବେ ସେ ଗିରଫ ହୋଇଥିବାରୁ ବିଭିନ୍ନ ତଥ୍ୟ ସାମ୍ନାକୁ ଆସିବ ବୋଲି ଆଶା କରାଯାଉଛି । ବିଶେଷକରି କେଉଁ ରାଜନେତାଙ୍କ ଛତ୍ରଛାୟା ତଳେ ରହି ବିକାଶ ନିଜର ଅପରାଧିକ ସାମ୍ରାଜ୍ୟ ବୃଦ୍ଧି କରିଥିଲା, ସେନେଇ ମଧ୍ୟ ତଦନ୍ତ ହେବ ।