ଖୁଖଲା ପଡିଛି ମହେନ୍ଦ୍ରତନୟା; ଗ୍ରୀଷ୍ମ ଋତୁ ଆରମ୍ଭରୁ ସୃଷ୍ଟିହେଲାଣି ଜଳ ସଙ୍କଟ

ଗଜପତି: ଶୁଖିଲା ପଡିଛି ଚିରସ୍ରୋତା ମହେନ୍ଦ୍ରତନୟା ନଦୀ। ଯାହା ଫଳରେ ଗଜପତି ଜିଲ୍ଲାର ପାରଳାଖେମୁଣ୍ଡି ସମେତ ଆଖପାଖ ଅଞ୍ଚଳରେ ଗ୍ରୀଷ୍ମ ଋତୁ ଆରମ୍ଭରୁ ଦେଖାଗଲାଣି ଜଳ ସଙ୍କଟ। ଏହି ନଦୀ ଜଳ ଉପରେ ନିର୍ଭର କରି ଜିଲ୍ଲାର ଗୋଷାଣି ଏବଂ ରାୟଗଡ ବ୍ଳକର ହଜାର ହଜାର ହେକ୍ଟର ଚାଷଜମିରେ ପରିବା ଚାଷ କରିଥିବା ଚାଷୀ ଏବେ ଚିନ୍ତାରେ ପଡିଯାଇଛନ୍ତି।  

ବର୍ଷାର ଅଭାବ ଏବଂ ଝରଣାର ସ୍ରୋତ କମିବା ଫଳରେ ଚିରସ୍ରୋତା ମହେନ୍ଦ୍ରତନୟା ନଦୀ ଏବେ ଶୁଖିଲା ପଡିଛି। ପାନୀୟ ଜଳ ପାଇଁ ଜିଲ୍ଲାର ରାୟଗଡ, ଗୋଷାଣି ବ୍ଲକ, ପାରଳାଖେମୁଣ୍ଡି ସହର ପ୍ରଭୂତି ଅଞ୍ଚଳର ଲୋକେ ଏହା ଉପରେ ନିର୍ଭର କରେ।  

Also Read: ବାୟୁ ପ୍ରଦୂଷଣ ପରେ ଚିନ୍ତା ବଢ଼ାଇଛି ଜଳ ପ୍ରଦୂଷଣ ; ରାଜ୍ୟରେ ୧୯ଟି ନଦୀ ପ୍ରଦୂଷିତ

ଜିଲ୍ଲାର ବୃନ୍ଦାବନ ପ୍ୟାଲେସ ନିକଟରେ ରହିଥିବା ଜନ ସ୍ୱାସ୍ଥ୍ୟ ବିଭାଗର ପ୍ରକଳ୍ପ ମାଧ୍ୟମରେ ନଦୀରୁ ପାଣି ଉଠାଇ ପାରଳାଖେମୁଣ୍ଡି ସହରକୁ ପାନୀୟ ଜଳର ଯୋଗାଣ ବ୍ୟବସ୍ଥା କରାଯାଇଥାଏ। ହେଲେ ଚଳିତ ବର୍ଷ ନଦୀ ଶୁଖିଲା ରହିଥିବା କରଣରୁ ଜଳ ଯୋଗାଣ ପ୍ରକିୟା ବାଧା ପ୍ରାପ୍ତ ହୋଇଛି। ଏବେ ପାଣି ପାଇଁ ନଦୀକୁ ଜେସିବି ସାହାଯ୍ଯରେ ଖୋଳି ଜଳ ଧାରକୁ ବ୍ୟବହାର କରୁଛି ବିଭାଗ। ଆଗକୁ ଗ୍ରୀଷ୍ମ ପ୍ରବାହ ମାତ୍ରା ବଢିବାକୁ ଥିବାବେଳେ ଆଗକୁ ଆହୁରି ଅଧିକ ଜଳ ସଙ୍କଟ ଦେଖାଯିବା ଭଳି ସମ୍ଭାବନା ସୃଷ୍ଟି ହେଲାଣି।  

ସେପଟେ ଯଦି ବର୍ଷା ନହୁଏ ତାହା ହେଲେ ଜଣ ଯୋଗାଣରେ ସମସ୍ୟା ଉପୁଜିପାରେ। ବର୍ତ୍ତମାନ ନଦୀରେ ଜଳର ପରିମାଣ ଢେର କମ୍ ରହିଛି, ଯଦି ଏହା ଦ୍ୱାରା କୌଣସି ସମସ୍ୟା ଉପୁଜେ ତାହେଲେ ବିକଳ୍ପ ବ୍ୟବସ୍ଥା କରାଯିବ। ଆବଶ୍ୟକ ପଡିଲେ ଟ୍ୟାଙ୍କର ଯୋଗେ ଜଳ ଯୋଗାଣର ବ୍ୟବସ୍ଥା କରାଯିବ ବୋଲି କହିଛନ୍ତି ପାରଳାଖେମୁଣ୍ଡି ଜନସ୍ୱାସ୍ଥ୍ୟ ବିଭାଗ ସହକାରୀ ଯନ୍ତ୍ରୀ ସ୍ୱାଗତ କୁମାର ନାୟକ। 

Also Read: ପୁଣି ଫେରିଲା ମହାନଦୀ ପ୍ରସଙ୍ଗ; ସରକାରଙ୍କୁ ବିରୋଧିଙ୍କ ପ୍ରଶ୍ନବାଣ

ଅନ୍ୟ ପକ୍ଷେ ଦୀର୍ଘ ବର୍ଷର ପୁରୁଣା ନଗର ପାଳିକାରେ ସବୁବେଳେ ଗ୍ରୀଷ୍ମ ଋତୁରେ ପାନୀୟ ଜଳର ଅଭାବ ଦେଖାଦେଉଥିବା ବେଳେ ନଦୀ ଜଳକୁ ସଂରକ୍ଷଣ ପାଇଁ ବିଭାଗ ପକ୍ଷରୁ ହୋଇନାହିଁ କୌଣସି ବ୍ୟବସ୍ଥା। ଯାହା ଫଳରେ ବର୍ଷା ଋତୁରେ ଆସୁଥିବା ପ୍ରଚୁର ଜଳ ନଦୀରେ ପ୍ରବାହିତ ହୋଇ ଆନ୍ଧ୍ରକୁ ଚାଲିଯାଉଛି। ଆଉ ସେହି ଜଳକୁ ସଂରକ୍ଷିତ କରି ବ୍ୟବହାର କରୁଛି ଆନ୍ଧ୍ର। 

Also Read: ଆଜି ମହାନଦୀ ଜଳ ବିବାଦ ମାମଲାର ଶୁଣାଣି

ଅପର ପକ୍ଷେ ଆନ୍ଧ୍ର ସରକାର ମହେନ୍ଦ୍ର ତନୟା ନଦୀରେ ଅପସରା ପ୍ରକଳ୍ପ ଆରମ୍ଭ କରିବା ପରେ ରାଜ୍ୟ ପ୍ରଶାସନ ଏହି ନଦୀର ଜଳ କିଭଳି ଆନ୍ଧ୍ରପ୍ରଦେଶକୁ ନଯିବ ସେଥିପାଇଁ ବିକଳ୍ପ ଚିନ୍ତା କରି ଉପର ମୁଣ୍ଡରେ ଡମ୍ବାପୁର ଏବଂ ଚମ୍ପାପୁର ଠାରେ ପ୍ରକଳ୍ପ ନିର୍ମାଣ ପାଇଁ ନିଷ୍ପତ୍ତି ହୋଇଥିଲା। ଗୋଟିଏ ପ୍ରକଳ୍ପର ବର୍ତ୍ତମାନ ପର୍ଯ୍ୟନ୍ତ ରୂପରେଖ ସ୍ଥିର ହୋଇନଥିବା ବେଳେ ଡମ୍ବାପୁର ପ୍ରକଳ୍ପ ୧୩ ବର୍ଷ ପରେ ମଧ୍ୟ କାର୍ଯ୍ୟକ୍ଷମ ହୋଇପାରିନି। ଯଦି ମହେନ୍ଦ୍ରତନୟା ନଦୀର ପାଣିକୁ ବ୍ୟବହାର କରିବା ଲାଗି ସେଥିରେ ପ୍ରକଳ୍ପ ନିର୍ମାଣ କରି ଜଳ ସଂରକ୍ଷଣ କରାଯାଇ ପାରନ୍ତା ତାହାହେଲେ ପାରଳାଖେମୁଣ୍ଡିର ପାନୀୟ ଜଳ ସମସ୍ୟାର ସ୍ଥାୟୀ ସମାଧାନ ହୋଇପାରନ୍ତା  ବୋଲି ମତ ରଖିଛନ୍ତି ବୁଦ୍ଧିଜୀବୀ।