ଆଇସିସି ଟି-20 ବିଶ୍ୱକପର ଆୟୋଜନକୁ ନେଇ କରାଗଲା ଏହି ଘୋଷଣା

ମେଲବୋର୍ଣ୍ଣ: କୋଭିଡ -19 ମହାମାରୀ ଯୋଗୁଁ ଟି-20 ବିଶ୍ୱକପ ଉପରେ ନିଷ୍ପତ୍ତି ନେବାକୁ ତତ୍ପର ନୁହେଁ ଏବଂ ଏହାର ବ୍ୟାପକ ଜରୁରୀକାଳୀନ ଯୋଜନା ଅଧୀନରେ ସମସ୍ତ ବିକଳ୍ପ ଅନୁସନ୍ଧାନ କରାଯାଉଛି ବୋଲି କହିଛି ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) । ଅକ୍ଟୋବର ୧୮ରୁ ନଭେମ୍ବର ୧୫ ଯାଏ ଅଷ୍ଟ୍ରେଲିଆରେ ଟି-20 ବିଶ୍ୱକପ ଅନୁଷ୍ଠିତ ହେବାର କାର୍ଯ୍ୟକ୍ରମ ରହିଛି । କିନ୍ତୁ ବର୍ତ୍ତମାନର ବିଶ୍ୱ ସଙ୍କଟ ଯୋଗୁଁ ସମସ୍ତ କ୍ରୀଡା ଇଭେଣ୍ଟକୁ ସ୍ଥଗିତ ରଖାଯାଇଛି କିମ୍ବା ବାତିଲ କରାଯାଇଛି । ଯାହା ମଧ୍ୟ ଏହି ଟୁର୍ନାମେଣ୍ଟକୁ ନେଇ ଅନିଶ୍ଚିତତା ସୃଷ୍ଟି କରିଛି ।

ଏହି ଭାଇରସକୁ ରୋକିବା ପାଇଁ ଅଷ୍ଟ୍ରେଲିଆ ଏହାର ସୀମାକୁ ସିଲ୍ କରି ଯାତ୍ରା ଉପରେ ପ୍ରତିବନ୍ଧକ ଲଗାଇଛି । ଅନୁମାନ କରାଯାଉଛି ଯେ ଟି-20 ବିଶ୍ୱକପ ଆସନ୍ତା ବର୍ଷକୁ ସ୍ଥଗିତ ରଖାଯାଇପାରେ କିମ୍ବା ଏହା ଏକ ଖାଲି ଷ୍ଟାଡିୟମରେ ଅନୁଷ୍ଠିତ କରାଯାଇ ପାରେ ।

ଆଇସିସି ମୁଖପାତ୍ର ସ୍କାଏସ୍ପୋର୍ଟ୍ସ କହିଛନ୍ତି ଯେ, ଆମେ ଆଇସିସି ଟୁର୍ନାମେଣ୍ଟ ପାଇଁ ଆମର ଯୋଜନା ଜାରି ରଖିଛୁ କିନ୍ତୁ ଦ୍ରୁତ ଗତିରେ ଘଟୁଥିବା ପରିସ୍ଥିତିକୁ ଦେଖି ଆମେ ଏକ ବ୍ୟାପକ ଜରୁରୀକାଳୀନ ଯୋଜନା ମଧ୍ୟ କରୁଛୁ ।

ସେ କହିଛନ୍ତି ଯେ କୋଭିଡ -19 ସହ ଜଡିତ ଅବସ୍ଥା ଉପରେ ଆଧାର କରି ଏହାକୁ ଉପଲବ୍ଧ ସମସ୍ତ ବିକଳ୍ପ ଖୋଜିବାକୁ ପଡ଼ିବ । ଟି-20 ବିଶ୍ୱକପକୁ ଆଉ ଛଅ ମାସ ବାକି ଅଛି ଏବଂ ଆଇସିସି କହିଛି ଯେ ଅଷ୍ଟ୍ରେଲିଆ ସରକାରଙ୍କ ସମେତ ଏହାର ସମସ୍ତ ହିତାଧିକାରୀଙ୍କ ସହ ପରାମର୍ଶ କରିବା ପରେ ହିଁ ସେ ନିଷ୍ପତ୍ତି ନେବ । ଆମେ ଅଷ୍ଟ୍ରେଲିଆ ସରକାରଙ୍କ ସମେତ ଆମର ବିଶେଷଜ୍ଞ ତଥା ଅଧିକାରୀଙ୍କ ସହ ପରାମର୍ଶ ଜାରି ରଖିବୁ ଏବଂ ଉପଯୁକ୍ତ ସମୟରେ ନିଷ୍ପତ୍ତି ନେବୁ ବୋଲି ଆଇସିସି ପ୍ରବକ୍ତା କହିଛନ୍ତି ।