ଭାରତର ଏହି ଖେଳାଳିଙ୍କୁ ଗଧ କହିଥିଲେ ଇଂଲଣ୍ଡର ପୂର୍ବତନ ଅଧିନାୟକ, ବଢ଼ିଥିଲା ବିବାଦ

ନୂଆଦିଲ୍ଲୀ: ଯେତେବେଳେ କ୍ରିକେଟ ଖେଳାଯାଏ, ସେହି ସମୟରେ କେବଳ ଖେଳାଳି କାହିଁକି ଭାଷ୍ୟକାର ମଧ୍ୟ ବେଶ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରନ୍ତି । ଜଣେ ଭାଷ୍ୟକାର ପୁରା ମାହୋଲକୁ ବାନ୍ଧି ରଖିଥାନ୍ତି । ତାଙ୍କର ଟିପ୍ପଣୀ ଦର୍ଶକଙ୍କ ମନୋରଞ୍ଜନ କରିଥାଏ । କିନ୍ତୁ ବେଳେ ବେଳେ ଏଭଳି କିଛି ଟିପ୍ପଣୀ ଭାଷ୍ୟକାର କରିଥାନ୍ତି, ଯାହା ବିବାଦକୁ ଡାକିଆଣେ । ଗତ ୨୦୧୧ ମସିହାରେ ଇଣ୍ଡିଆ-ଇଂଲଣ୍ଡ ମଧ୍ୟରେ ଟି-୨୦ ମ୍ୟାଚ ଚାଲିଥିବା ବେଳେ ଏଭଳି କିଛି ଦେଖିବାକୁ ମିଳିଥିଲା । ଇଂଲଣ୍ଡର ପୂର୍ବତନ ଅଧିନାୟକ ନାସିର ହୁସେନ (Nasser Hussain) କମେଣ୍ଟ୍ରି କରୁଥିବା ବେଳେ ଭାରତୀୟ ଖେଳାଳିଙ୍କୁ ଗଧ କହିଥିଲେ । ଯାହାକୁ ନେଇ ତାଙ୍କୁ ଟ୍ରୋଲ ହେବାକୁ ପଡ଼ିଥିଲା । 

ଏମିତିରେ ନାସିର ହୁସେନଙ୍କୁ ଏକ ଭଲ ଭାଷ୍ୟକାର ଭାବେ ଗଣାଯାଏ । କିନ୍ତୁ ଟିମ ଇଣ୍ଡିଆ (Team India) ଖେଳାଳିଙ୍କୁ ନେଇ ସେ ଦେଇଥିବା ଟିପ୍ପଣୀ ଯୋଗୁ ଅନେକ ପ୍ରଶ୍ନ ସୃଷ୍ଟି ହୋଇଥିଲା । ବହୁ ଅନ୍ତର୍ଜାତୀୟ ଖେଳାଳି ମଧ୍ୟ ଏନେଇ ପ୍ରଶ୍ନ ଉଠାଇଥିଲେ ।

୨୦୧୧ ମସିହାର ଘଟଣା । ଇଣ୍ଡିଆ ଓ ଇଂଲଣ୍ଡ ମଧ୍ୟରେ ଟି-୨୦ ମ୍ୟାଚ ଖେଳାଯାଉଥିଲା । ଇଂଲଣ୍ଡ ଗସ୍ତରେ ଥିଲେ ଭାରତୀୟ ଦଳ । ଭାରତ ପ୍ରଥମେ ବ୍ୟାଟିଂ କରି ୧୬୫ରନ୍ କରିଥିଲା । ତେବେ ଇଲଣ୍ଡ ପ୍ରାରମ୍ଭିକ ଅବସ୍ଥାରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥାଏ । ଖୁବଶୀଘ୍ର ପ୍ରଥମ ୱିକେଟ ପଡ଼ିଥାଏ । ତେବେ ଚତୁର୍ଥ ଓଭର ବୋଲିଂ କରୁଥିଲେ ମୁନାଫ ପଟେଲ(Munaf Patel) । ବ୍ୟାଟିଂ କରୁଥାନ୍ତି କେଭିନ ପିଟରସନ (Kevin Pietersen) । ତେବେ ପିଟରସନ ଏକ ବଡ଼ ସର୍ଟ ଧରିବାରେ ବିଫଳ ହୋଇଥିଲେ ପାର୍ଥିବ ପଟେଲ(Parthiv Patel) । କ୍ୟାଚ ତ କରିପାରିନଥିଲେ, ଏପରିକି ଚୌକା ମଧ୍ୟ ବଞ୍ଚାଇ ପାରିନଥିଲେ ପାର୍ଥିବ । 

ତେବେ ଏହା ଦେଖି ଭାଷ୍ୟକାର ନାସିର ହୁସେନ ବିବାଦୀୟ ଟିପ୍ପଣୀ ଦେଇଥିଲେ । କହିଥିଲେ, ''ଇଂଲଣ୍ଡ ଓ ଇଣ୍ଡିଆ ଟିମ୍ ଭିତରେ କେବଳ ଫିଲଡିଂରେ ତଫାତ ରହିଛି । ଇଂଲଣ୍ଡର ଫିଲଡିଂ ଭଲ । କିନ୍ତୁ ଟିମ୍ ଇଣ୍ଡିଆରେ ୩/୪ ଜଣ ଭଲ ଫିଲଡର ଅଛନ୍ତି । କିନ୍ତୁ ପଡ଼ିଆରେ ଅନେକ ଗଧ ମଧ୍ୟ ଅଛନ୍ତି ।''

ନାସିର ହୁସେନଙ୍କ ଏହି ଟିପ୍ପଣୀ ସେହି ସମୟରେ ବିବାଦ ସୃଷ୍ଟି କରିଥିଲା । ସୋସିଆଲ ମିଡିଆରେ ଇଂଲଣ୍ଡର ଏହି ଭାଷ୍ୟକାରଙ୍କୁ ଟ୍ରୋଲ କରାଯ।ଇଥିଲା । କେବଳ ଏତିକି ନୁହେଁ, ଅନେକ କ୍ରିକେଟର ମଧ୍ୟ ଏପରି ଟିପ୍ପଣୀକୁ ବିରୋଧ କରିଥିଲେ । ଏମାନଙ୍କ ମଧ୍ୟରେ ଥିଲେ ସବା କରୀମ (Saba Karim), ଜହୀର ଅବ୍ବାସ (Zaheer Abbas) ଏବଂ ରବି ଶାସ୍ତ୍ରୀ(Ravi Shastri) । 

ମାମଲା କେବଳ ସୋସିଆଲ ମିଡିଆରେ ସୀମିତ ନଥିଲା, ବିସିସିଆଇ (BCCI) ମଧ୍ୟ ଏହି ମୁଦ୍ଦା ଇଂଲଣ୍ଡ କ୍ରିକେଟ ବୋର୍ଡ (ECB) ସାମ୍ନାରେ ରଖିଥିଲା । ଅବଶ୍ୟ ନାସିର ହୁସେନଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିଲା ।