Allopathyକୁ ନେଇ ବିବାଦୀୟ ବୟାନ; କେନ୍ଦ୍ର ମନ୍ତ୍ରୀଙ୍କ କଥା ରଖିଲେ ରାମଦେବ

ନୂଆଦିଲ୍ଲୀ: ଗତ କିଛି ଦିନ ହେବ ଯୋଗଗୁରୁ ରାମଦେବଙ୍କ ଏକ ଭିଡିଓ ଖୁବ ଭାରାଲ ହେଉଥିଲା। ଯେଉଁଠିରେ ସେ ଏଲୋପାଥିକୁ ତମାସା, ବେକାର ଓ ଦେବାଳିଆ କହିବା ସହ ଏଲୋପାଥି ଯୋଗଁ ଅଧିକ ଲୋକଙ୍କ ମୃତ୍ୟୁ ହୋଇଛି ବୋଲି ଦାବି କରୁଥିବା ନେଇ ଅଭିଯୋଗ ହୋଇଛି। ରାମଦେବଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବାକୁ IMA ଦାବି କରିଥିଲା। ଏହି ପ୍ରସଙ୍ଗରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ମଧ୍ୟ ଯୋଗଗୁରୁଙ୍କୁ ୨ ଫର୍ଦ୍ଦର ଚିଠି ଲେଖିଥିଲେ। ଆଉ ଗତକାଲି ରାତିରେ ରାମଦେବ ତାଙ୍କର ବୟାନ ଫେରାଇ ନେଇଥିବା ନେଇ ବିବୃତ୍ତି ଜାରି କରିଛନ୍ତି। 

କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷ ବର୍ଦ୍ଧନ (Dr. Harsh Vardhan) ଏଲୋପାଥି ଔଷଧ (Allopathy Medicine) ଉପରେ ରାମଦେବଙ୍କ ବିବୃତ୍ତିକୁ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିବା ସହ ତାଙ୍କୁ ବୟାନ ଫେରାଇ ନେବାକୁ ଗତକାଲି ଚିଠି ଲେଖିଥିଲେ। ଏହା ପରେ ଯୋଗ ଗୁରୁ (Yog Guru) ତାଙ୍କ ଅଫିସିଆଲ ଟ୍ୱିଟର ହ୍ୟାଣ୍ଡେଲରେ ନିଜର ପ୍ରତିକ୍ରିୟା ଦେଇଛନ୍ତି। ସେ ତାଙ୍କ ବିବାଦୀୟ ବୟାନକୁ ପୂର୍ଣ୍ଣ ଭାବେ ପ୍ରତ୍ୟାହାର କରିନେଇଥିବା ଘୋଷଣା କରିଛନ୍ତି।

ରାମଦେବ (Ramdev), କେନ୍ଦ୍ରମନ୍ତ୍ରୀଙ୍କୁ ଲେଖିଥିବା ଚିଠିରେ ଦର୍ଶାଇଛନ୍ତି ଯେ, ସେ ଆଧୁନିକ ଚିକିତ୍ସା ବିଜ୍ଞାନ ଏବଂ ଏଲୋପାଥି (Allopathic)ର ବିରୋଧୀ ନୁହଁନ୍ତି। ସେ ବିଶ୍ୱାସ କରନ୍ତି ଯେ, ଏଲୋପାଥି ଜୀବନ ରକ୍ଷା ପ୍ରଣାଳୀ ଏବଂ ଅସ୍ତ୍ରୋପଚାର ବିଜ୍ଞାନରେ ଅନେକ ଅଗ୍ରଗତି କରିଛି ଏବଂ ମାନବିକତାର ସେବା କରିଛି। କୌଣସି ଚିକିତ୍ସା ବ୍ୟବସ୍ଥାରେ ଥିବା ତ୍ରୁଟିଗୁଡ଼ିକୁ ସେହି ପଦ୍ଧତି ଉପରେ ଆକ୍ରମଣ ଭାବରେ ଗ୍ରହଣ କରାଯିବା ଉଚିତ ନୁହେଁ ଏବଂ ସେ ବିଜ୍ଞାନକୁ ଆଦୌ ବିରୋଧ କରନ୍ତି ନାହିଁ।

ରାମଦେବଙ୍କ ଚିଠିରେ ପୁଣି କୁହାଯାଇଛି ଯେ, କେତେକ ଏଲୋପ୍ୟାଥିକ ଡାକ୍ତର ତାଙ୍କୁ ଭାରତୀୟ ଚିକିତ୍ସା ବିଜ୍ଞାନ, ଆୟୁର୍ବେଦ ଏବଂ ଯୋଗକୁ ଛଦ୍ମ ବିଜ୍ଞାନ ବୋଲି କହି ତାଙ୍କୁ ଅସମ୍ମାନ କରିବା ଉଚିତ ନୁହେଁ, କାରଣ ଏହା ମଧ୍ୟ କୋଟି କୋଟି ଲୋକଙ୍କ ଭାବନାକୁ ଆଘାତ ଦେଇଥାଏ। ଯଦି ଆଧୁନିକ ଚିକିତ୍ସା ବିଜ୍ଞାନ ବସନ୍ତ, ପୋଲିଓ ଏବଂ ଯକ୍ଷ୍ମା ଭଳି ଗୁରୁତର ରୋଗର ଚିକିତ୍ସା ଆବିଷ୍କାର କରିଛି, ତେବେ ଯୋଗ, ଆୟୁର୍ବେଦ ଏବଂ ନ୍ୟାଚୁରୋପାଥି ଇତ୍ୟାଦି ଭାରତୀୟ ଔଷଧ ପ୍ରଣାଳୀ ମାଧ୍ୟମରେ ଆମେ ରକ୍ତଚାପ, ସର୍କରା, ଥାଇରଏଡ୍, ଆର୍ଥ୍ରାଇଟିସ୍, ଫ୍ୟାଟି ଲିଭର ଭଳି ଜଟିଳ ଓ ବଂଶଗତ ରୋଗର ବିକାଶ କରିଛୁ। ହେପାଟାଇଟିସ୍, ଆସ୍ଥମାର ନିୟନ୍ତ୍ରଣ ଏବଂ ସ୍ଥାୟୀ ସମାଧାନ ବାହାର କରାଯାଇଛି।

କୋରୋନା କାଳରେ ଏଲୋପାଥି ଡାକ୍ତରମାନେ ନିଜ ଜୀବନକୁ ବିପଦରେ ପକାଇ ନିଜ ଜୀବନ ରକ୍ଷା କରିଛନ୍ତି, ଆମେ ସେମାନଙ୍କୁ ସମ୍ମାନ ଦେଉଛୁ। ଆୟୁର୍ବେଦ ଏବଂ ଯୋଗର ବ୍ୟବହାର ସହିତ ଆମେ କୋଟି କୋଟି ଲୋକଙ୍କ ଜୀବନ ରକ୍ଷା କରିଛୁ, ଏହାକୁ ମଧ୍ୟ ସମ୍ମାନ ଦିଆଯିବା ଉଚିତ୍। ଭବିଷ୍ୟତରେ, ସେ ସମସ୍ତ ପଦ୍ଧତିର ସଠିକ୍ ସମନ୍ୱୟ ସହିତ ମାନବିକତାର ସେବା କରିବା, କୋରୋନା ଏବଂ କୋରୋନା ଜଟିଳତା ସହ ଲଢିବା ଏବଂ ସମସ୍ତ ମାନବିକତା ପାଇଁ ରୋଗ ମୁକ୍ତ କରିବା ବୋଲି ବାବା ରାମଦେବ କହିଛନ୍ତି।

ରାମଦେବଙ୍କୁ ଲେଖିଥିବା ଚିଠିରେ ସ୍ୱାସ୍ଥ୍ୟ ମନ୍ତ୍ରୀ ହର୍ଷ ବର୍ଦ୍ଧନ ତାଙ୍କୁ ଏଲୋପାଥି ଉପରେ ନିଜର ବିବୃତ୍ତି ପ୍ରତ୍ୟାହାର କରିବାକୁ କହିଥିଲେ। ଚିଠିରେ ଲେଖିଥିଲେ, "ଏହି ବିବୃତ୍ତି କୋରୋନା ଯୋଦ୍ଧାଙ୍କୁ ଅସମ୍ମାନ କରୁଛି ଏବଂ ଦେଶର ଭାବନାକୁ ଆଘାତ ଦେଇଛି। ଏଲୋପାଥି ଉପରେ ଆପଣଙ୍କର ବିବୃତ୍ତି ସ୍ୱାସ୍ଥ୍ୟ କର୍ମୀଙ୍କ ମନୋବଳକୁ ଭାଙ୍ଗିପାରେ ଏବଂ କୋରୋନା ବିରୋଧରେ ଆମର ସଂଗ୍ରାମକୁ ଦୁର୍ବଳ କରିପାରେ।"

ଶନିବାର ଦିନ ଇଣ୍ଡିଆନ୍ ମେଡିକାଲ୍ ଆସୋସିଏସନ୍ କହିଛି ଯେ, ରାମଦେବ ଦାବି କରିଛନ୍ତି ଯେ ଏଲୋପାଥି ଏକ 'ମୂର୍ଖ ବିଜ୍ଞାନ' ଏବଂ ରେମଡେସିଭର୍, ଫାଭିଫ୍ଲୁ ଏବଂ ଅନ୍ୟାନ୍ୟ ଔଷଧ ଯେପରିକି ଡ୍ରଗ୍ କଣ୍ଟ୍ରୋଲର୍ ଜେନେରାଲ୍ ଅଫ୍ ଇଣ୍ଡିଆ ଦ୍ୱାରା ଅନୁମୋଦିତ କୋରୋନା ରୋଗୀଙ୍କ ଚିକିତ୍ସା କରିବାରେ ବିଫଳ ହୋଇଛି। କୋରୋନା ଅପକ୍ଷା ଅଧିକ ଲୋକ ଏଲୋପାଥି ଚିକିତ୍ସାରେ ମୃତ୍ୟୁ ହୋଇଥିବା ଯୋଗ ଗୁରୁ କହିଛିବା ଆସୋସିଏସନ ଅଭିଯୋଗ କରିଛି। ସୋସିଆଲ ମିଡିଆରେ ପ୍ରସାରିତ ଏକ ଭିଡିଓକୁ ଏହାର ପ୍ରମାଣ ସ୍ୱରୂପ ଉପସ୍ଥାପନା କରାଯାଉଛି।

ସୂଚନାଯୋଗ୍ୟ, ବିବାଦୀୟ ବୟାନ ପାଇଁ IMAକୁ ଚିଠି ଲେଖିବା ସହ ରାମଦେବଙ୍କୁ ନୋଟିସ ପଠାଇଥିଲା। ଏପରି କି କୋର୍ଟ ଯିବାକୁ ମଧ୍ୟ ଧମକ ଦେଇଥିଲା। ଏହା ପରେ ପାତଞ୍ଜଳି ଯୋଗପୀଠ ପକ୍ଷରୁ ଏକ ବିବୃତ୍ତି ଜାରି କରାଯାଇ ବାବାଙ୍କ ବିରୁଦ୍ଧରେ ଅଣାଯାଇଥିବା ସମସ୍ତ ଅଭିଯୋଗ ମିଛ ଓ ଭିଡିଓକୁ ଏଡିଟ କରାଯାଇଥିବା କୁହାଯାଇଥିଲା। ଏପରି କି ରାମଦେବ ନିଜର ମନ୍ତବ୍ୟ ନୁହଁ ହ୍ୱାଟସଆପ ମେସଜକୁ ପଢିଥିବା ପାତଞ୍ଜଳି କହିଥିଲା।