ମଦ ହୋମ ଡେଲିଭରୀ କରିବ ଜୋମାଟୋ !

ନୂଆଦିଲ୍ଲୀ: ଭାରତରେ ପ୍ରାୟ ୨ ମାସ ଧରି ଲକଡାଉନ୍ ଚାଲିଛି । ଏଭଳି ପରିସ୍ଥିତିରେ, କିଛି ଦିନ ପୂର୍ବରୁ ଉଭୟ ଅନଲାଇନ୍ ଏବଂ ଅଫଲାଇନ୍ ବଜାରରେ କେବଳ ଅତ୍ୟାବଶ୍ୟକ ସାମଗ୍ରୀ ବ୍ୟତୀତ ସରକାର ସମସ୍ତ ଅନାବଶ୍ୟକ ସାମଗ୍ରୀ ବିକ୍ରୟ ବନ୍ଦ କରିଦେଇଥିଲେ । ଲକଡାଉନ୍ ୩.୦ରେ ସରକାର ବର୍ତ୍ତମାନ କିଛି ନିୟମ କୋହଳ କରିଛନ୍ତି । ଯାହା ଅଧୀନରେ କେତେକ ସୁରକ୍ଷିତ ଅଞ୍ଚଳରେ ଅତ୍ୟାବଶ୍ୟକ ହୋଇ ନଥିବା ସାମଗ୍ରୀ ବିକ୍ରୟ ଆରମ୍ଭ ହୋଇଛି । କେବଳ ଏତିକି ନୁହେଁ । ନିକଟରେ ସରକାର କିଛି ମଦ ଦୋକାନ ମଧ୍ୟ ଖୋଲିଥିଲେ । ତେବେ ମଦ ଦୋକାନ ବାହାରେ ଭିଡ଼ ଏବଂ ସାମାଜିକ ଦୂରତାର ନିୟମ ପାଳନ ନ ହେବାରୁ ସରକାରଙ୍କ ଚିନ୍ତା ବଢ଼ିବାରେ ଲାଗିଛି । ବର୍ତ୍ତମାନ ଏକ ନୂତନ ରିପୋର୍ଟ ସାମ୍ନାକୁ ଆସିଛି । ଯେଉଁଥିରେ ଜୋମାଟୋ ଦେଶରେ ଲକଡାଉନ୍ ସମୟରେ ମଦର ଚାହିଦାକୁ ପୂରଣ କରିବାକୁ ଯୋଜନା କରିଛି । ଲୋକଙ୍କ ଘରେ ମଦ ପହଞ୍ଚାଇବାରେ ସାହାଯ୍ୟ କରିବାକୁ କମ୍ପାନୀ ଚେଷ୍ଟା କରୁଛି ।

ରଏଟର୍ସ ଅନୁସାରେ, ଏକ ଡକ୍ୟୁମେଣ୍ଟ ଅନୁଯାୟୀ ଜୋମାଟୋ ଭାରତରେ ଲକଡାଉନ୍ ସମୟରେ ମଦ ଡେଲିଭରୀ କରିବାକୁ ଚେଷ୍ଟା କରୁଛି । ନିଷେଧାଦେଶ ଯୋଗୁଁ ଅନେକ ରେଷ୍ଟୁରାଣ୍ଟ ବନ୍ଦ ଥିବାରୁ ଲୋକମାନେ ସଂକ୍ରମଣ ହେବାର ଆଶଙ୍କା ଥିବାରୁ ବାହାର ଖାଦ୍ୟ ଖାଉ ନାହାଁନ୍ତି । ଏପରି ସ୍ଥିତିରେ କମ୍ପାନୀ ଲଗାତର ଆୟର ଉତ୍ସକୁ ଖୋଜିବାରେ ଲାଗିଛି । 

ମାର୍ଚ୍ଚ ୨୫ରୁ ସାରା ଦେଶରେ ମଦ ଦୋକାନଗୁଡ଼ିକରେ ତାଲା ପଡ଼ିଥିଲା । ଯାହାକୁ ଏହି ସପ୍ତାହରୁ ଖୋଲିବାକୁ ଅନୁମତି ମିଳିଥିଲା ​। ତେବେ ଏହି ନିଷ୍ପତ୍ତି ଆସିବା ପରେ କିଛି ସହରରେ ଶହ ଶହ ଲୋକ ମଦ ଦୋକାନ ବାହାରେ ଧାଡି ବାନ୍ଧିଥିଲେ । ଭିଡ଼ ଏତେ ଥିଲା ଯେ ଅନେକ ସ୍ଥାନରେ ପୋଲିସକୁ ସାମାଜିକ ଦୂରତା ଅନୁସରଣ କରିବାକୁ ଲାଥୀ ଚାର୍ଜ କରିବାକୁ ପଡୁଥିଲା । ଭିଡ଼କୁ ହ୍ରାସ କରିବା ପାଇଁ ଦିଲ୍ଲୀ ସରକାର ମଦ ଉପରେ ୭୦ ପ୍ରତିଶତ ସ୍ୱତନ୍ତ୍ର କୋରୋନା ଶୁଳ୍କ ଲାଗୁ କରିଥିଲେ । ମୁମ୍ବାଇ ସରକାର ଦୁଇ ଦିନ ମଧ୍ୟରେ ସମସ୍ତ ଦୋକାନ ବନ୍ଦ କରିଦେଇଥିଲେ ।