Nusrat jahan:ନୂସରତଙ୍କ ଭାଲେଣ୍ଟାଇନ୍ ଫଟୋକୁ ବିଜେପି କଲା ରାଜନୈତିକ ଅସ୍ତ୍ର

Nusrat jahan:

ଭାଲେଣ୍ଟାଇନ୍ ଡେ’ ସେଲିବ୍ରେଟ୍ କରି ଫସିଲେ ତୃଣମୂଳ କଂଗ୍ରେସ ସାଂସଦ ନୁସରତ ଜାହାନ । ନୁସରତଙ୍କ ଇଣ୍ଟିମେଟ୍ ଫଟୋକୁ ରାଜନୈତିକ ଆକ୍ରମଣର ଅସ୍ତ୍ର କରିଛି ବିଜେପି । ବିଜେପି ଟାର୍ଗେଟରେ ଅଛନ୍ତି ନୁସରତ। ସାଂସଦଙ୍କ ଭାଲେଣ୍ଟାଇନ୍ ଡେ’ ସେଲିବ୍ରେସନକୁ ନାପସନ୍ଦ କରି ବିଜେପି ନେତାମାନେ ନୁସରତଙ୍କୁ ନିନ୍ଦା କରିଛନ୍ତି। ଭାଲେଣ୍ଟାଇନ୍ସ ଡେ’ରେ ନୁସରତ ସେୟାର କରିଥିବା ଅନ୍ତରଙ୍ଗ ଫଟୋକୁ ନେଇ ଏହି ପାଲା ଆରମ୍ଭ ହୋଇଛି । ଭାଲେଣ୍ଟାଇନ୍ସ ଡେ’ରେ ନୁସରତ ତାଙ୍କ ସ୍ୱାମୀ ବ୍ୟବସାୟୀ ଯଶ ଦାସଗୁପ୍ତଙ୍କ ସହ ଏକ ରୋମାଣ୍ଟିକ ଫଟୋ  ସେୟାର କରିଥିଲେ। ପ.ବଙ୍ଗ ବିଜେପିର ଅଫିସିଆଲ୍ ଏକ୍ସ ହ୍ୟାଣ୍ଡେଲରୁ ନୂସରତଙ୍କ ପୋଷ୍ଟ ସେୟାର କରାଯାଇଥିଲା ଯେଉଁଥିରେ ସେ ତାଙ୍କ ସ୍ୱାମୀଙ୍କ ସହ ନଜର ଆସିଛନ୍ତି।

ଫଟୋ ସେୟାର କରି ବିଜେପି ପକ୍ଷରୁ ଲେଖାଯାଇଛି ଯେ,  'ପ୍ରାଥମିକତା  ଗୁରୁତ୍ୱ ରଖେ । ସାନ୍ଦେଶଖଲିରେ ମହିଳାମାନେ ସେମାନଙ୍କ ସମ୍ମାନ ପାଇଁ ବିରୋଧ ପ୍ରଦର୍ଶନ କରୁଛନ୍ତି। ଏହି ସମୟରେ, ବଶିରହାଟରୁ ଟିଏମସି ସାଂସଦ ଭାଲେଣ୍ଟାଇନ୍ସ ଡେ ପାଳନ କରୁଛନ୍ତି। ସୂଚନାଯୋଗ୍ୟ ଯେ 2019 ଲୋକସଭା ନିର୍ବାଚନରେ ନୂସରତ ଜାହାନ ଟିଏମସି ଟିକେଟରେ ଜିତିଥିଲେ। ଏହାପୂର୍ବରୁ ସେ ଜଣେ ଅଭିନେତ୍ରୀ ଭାବରେ ଅନେକ ନାମ ଏବଂ ଖ୍ୟାତି ଅର୍ଜନ କରିଥିଲେ ।

ସନ୍ଦେଶଖାଲି ପ୍ରସଙ୍ଗ କ’ଣ?

ପଶ୍ଚିମବଙ୍ଗର ସନ୍ଦେଶଖାଲି ବର୍ତ୍ତମାନ ଏକ ରାଜନୈତିକ ଛକାପଞ୍ଝାର କେନ୍ଦ୍ର ପାଲଟିଛି । ତୃଣମୂଳ କଂଗ୍ରେସର ଫେରାର ନେତା ଶାହାଜାହାନ ଶେଖ ଏବଂ ତାଙ୍କ ସହଯୋଗୀମାନଙ୍କ ବିରୋଧରେ ଯୌନ ଉତ୍ପୀଡ଼ନ ଅଭିଯୋଗ କିଛି ମହିଳାଙ୍କ ଦ୍ୱାରା ଆସିବା ପରେ ରାଜନୀତି ଗରମ ହୋଇଛି । ସୂଚନାଯୋଗ୍ୟ ଯେ, ଶାହରୁଖ ବିରୋଧରେ ଆଗରୁ ଇଡି ଅଧିକାରୀଙ୍କ ବିରୋଧରେ ହିଂସାର ଅଭିଯୋଗ ରହିଛି । ଯେଉଁଥିପାଇଁ ସେ ଫେରାର ହୋଇଯାଇଛି ।  ଗୋଟିଏ ପଟେ ସନ୍ଦେଶଖାଲି ପ୍ରସଙ୍ଗରେ ବିଜେପି ଆକ୍ରମଣକାରୀ ହୋଇଥିବା ବେଳେ ଅନ୍ୟ ପଟେ ମମତା ବାନାର୍ଜୀଙ୍କ ଦଳ ବ୍ୟାକଫୁଟରେ ଥିବା ଜଣାପଡିଛି। ଉତ୍ତର 24 ପ୍ରଗଣା ଜିଲ୍ଲାର ସନ୍ଦେଶଖାଲି ଏବେବି ଅଶାନ୍ତ ଅଛି । ବିରୋଧରେ  ଅଷ୍ଟମ  ଦିନରେ ଗୁରୁବାର ଦିନ ବହୁ ସଂଖ୍ୟକ ମହିଳା ରାସ୍ତାରେ ଯାଇ ତୃଣମୂଳ କଂଗ୍ରେସ ନେତା ଶେଖ ଶାହାଜାହାନ ଏବଂ ତାଙ୍କ  'ଗ୍ୟାଙ୍ଗ'ର ଅନ୍ୟ ସଦସ୍ୟଙ୍କୁ ଗିରଫ କରିବାକୁ ଦାବି କରିଛନ୍ତି। ସନ୍ଦେଶଖାଲି ପ୍ରସଙ୍ଗରେ ସିଏମ ମମତା ବାନାର୍ଜୀଙ୍କ ବିବୃତ୍ତି ଦାବି କରି ଗୁରୁବାର ଦିନ ବିଜେପି ରାସ୍ତାକୁ ଓହ୍ଲାଇଛି ।