ଜୁଲାଇ ୧ରୁ ଯୁକ୍ତ ଦୁଇ ପରୀକ୍ଷା

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ଘୋଷଣା ହେଲା ତାରିଖ । ଜୁଲାଇ ୧ ରୁ ଆରମ୍ଭ ହେବ ଯୁକ୍ତ ଦୁଇ ବାର୍ଷିକ ପରୀକ୍ଷା । ସେପଟେ ସମ୍ଭାବ୍ୟ ବାତ୍ୟା ହେତୁ ମାଟ୍ରିକ ମୂଲ୍ୟାୟନ ଗୋଟିଏ ଦିନ ପରେ କରିବାକୁ ନିଷ୍ପତ୍ତି ନେଇଛି ଗଣଶିକ୍ଷା ବିଭାଗ । ସୂଚନା ମୁତାବକ କୋରୋନା କଟକଣାରେ ଲକ୍ ଡାଉନ ହେତୁ ୨ ମାସ ହେବ ଯୁକ୍ତ ଦୁଇ ପରୀକ୍ଷା ସ୍ଥଗିତ ରହିଛି । ତେବେ ଏହି ବଳକା ପରୀକ୍ଷାକୁ ଆରମ୍ଭ କରିବା ନିମନ୍ତେ ତାରିଖ ଘୋଷଣା କରିଛି ବିଭାଗ । ଏହାସହ ଆସନ୍ନ ବାତ୍ୟାକୁ ଦୃଷ୍ଟିରେ ରଖି ପୂର୍ବନିର୍ଦ୍ଧାରିତ ମାଟ୍ରିକ ମୂଲ୍ୟାୟନ ୨୦ ତାରିଖ ପରିବର୍ତ୍ତେ ୨୧ ତାରିଖରୁ ଆରମ୍ଭ କରିବା ନିମନ୍ତେ ବିଭାଗ ସ୍ଥିର କରିଛି ।

ସିବିଏସଇ ଭଳି ଜୁଲାଇ ୧ରୁ ୧୫ ତାରିଖ ଭିତରେ ସିଏଚଏସଇ ପକ୍ଷରୁ ବଳକା ଯୁକ୍ତ ଦୁଇ ବାର୍ଷିକ ପରୀକ୍ଷା ଶେଷ କରିବାକୁ ନିଷ୍ପତ୍ତି ନେଇଛି ଗଣଶିକ୍ଷା ବିଭାଗ । କଳା, ବାଣିଜ୍ୟ, ବିଜ୍ଞାନ ଓ ଧନ୍ଦାମୂଳକ ପାଠ୍ୟକ୍ରମରେ ମୋଟ ୨୩ଟି ବିଷୟର ପରୀକ୍ଷା ବାକି ରହିଛି । ଏସବୁ ପରୀକ୍ଷା ପାଇଁ ଗୋଟିଏ ସପ୍ତାହ ଲାଗିବ । ସେପଟେ ଲକଡାଉନ ପୂର୍ବରୁ ସରିଥିବା ପରୀକ୍ଷାର ଖାତା ଦେଖା ଜୁନ ୧ରୁ ଆରମ୍ଭ କରାଯିବ ବୋଲି କହିଛନ୍ତି ବିଭାଗୀୟ ମନ୍ତ୍ରୀ ।

ସେପଟେ ସମ୍ଭାବ୍ୟ ବାତ୍ୟାକୁ ଦୃଷ୍ଟି ରଖି ମାଟ୍ରିକ ମୂଲ୍ୟାୟନ ତାରିଖ ଘୁଂଚାଇ ଦିଆଯାଇଛି । ପୂର୍ବ ନିର୍ଦ୍ଧିାରିତ ୨୦ ତାରିଖ ପରିବର୍ତ୍ତେ ଗୋଟିଏ ଦିନ ପରେ ୨୧ ତାରିଖରୁ ମୂଲ୍ୟାୟନ ପ୍ରକ୍ରିୟା ଆରମ୍ଭ କରିବାକୁ ନିଷ୍ପତ୍ତି ହୋଇଛି । ଏହାସହ ହାଇକୋର୍ଟଙ୍କ ନିର୍ଦ୍ଦେଶ ମୁତାବକ ୧୦ କିଲୋମିଟର ପରିଧି ଭିତରେ ଥିବା ମୂଲ୍ୟାୟନ କେନ୍ଦ୍ରରେ ଶିକ୍ଷକ ମାନଙ୍କୁ ନିୟୋଜିତ କରାଯିବ ବୋଲି କହିଛନ୍ତି ମନ୍ତ୍ରୀ ।

ତେବେ ସେପ୍ଟେମ୍ବର ମାସରୁ ନୂଆ ଶିକ୍ଷା ବର୍ଷ ଆରମ୍ଭ ହେବାକୁ ଥିବା ବେଳେ ଏହା ପୂର୍ବରୁ ବଳକା ସମସ୍ତ ପରୀକ୍ଷା, ଖାତା ଦେଖା, ଫଳାଫଳ ଏବଂ ଛାତ୍ରଛାତ୍ରୀ ମାନଙ୍କୁ ନାମଲେଖା କରିବାକୁ ଲକ୍ଷ୍ୟ ରଖାଯାଇଛି ।