ସରିନି ଅଡୁଆ, ପରୀକ୍ଷା ପରେ ଏବେ ରେଜଲ୍ଟ ଚିନ୍ତା

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ପରୀକ୍ଷା ପରେ ଏବେ ରେଜଲ୍ଟ ଚିନ୍ତା । ମୂଲ୍ୟାୟନରେ ଦେଖାଦେଇଛି ସମସ୍ୟା । ଚଳିତ ବର୍ଷ କୋରୋନା କଟକଣାରେ ଶିକ୍ଷା ବର୍ଷ ସମେତ ପାଠପଢା ସମ୍ପୂର୍ଣ୍ଣ ଭାବେ ବାଧାପ୍ରାପ୍ତ ହୋଇଥିବା ବେଳେ ପରୀକ୍ଷା ଚିନ୍ତାରୁ ପରଦା ହଟିସାରିଛି । ଆଉ ଏବେ ଫଳାଫଳକୁ ନେଇ ବଢିଛି ଚିନ୍ତା । ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପରିଚାଳିତ ଯୁକ୍ତ ଦୁଇ ବାର୍ଷିକ ପରୀକ୍ଷା ମୂଲ୍ୟାୟନରେ ସମସ୍ୟା ଦେଖାଦେଇଥିବା ଆଜି ବିଭାଗୀୟ ମନ୍ତ୍ରୀ କହିଛନ୍ତି । ତେବେ ଫଳ ପ୍ରକାଶନକୁ ନେଇ ଆଶାଆଶଙ୍କା ବୃଦ୍ଧି ପାଇଛି । ସେପଟେ ଖୁବଶୀଘ୍ର ତାରିଖ ଘୋଷଣା ହୋଇ ଚଳିତ ମାସ ଶେଷ ସୁଦ୍ଧା ମାଟ୍ରିକ ଫଳ ପ୍ରକାଶ ପାଇବ ବୋଲି ମନ୍ତ୍ରୀ କହିଛନ୍ତି ।

ସରିନି ଅଡୁଆ, ପରୀକ୍ଷା ପରେ ଏବେ ରେଜଲ୍ଟ ଚିନ୍ତା । ମୂଲ୍ୟାୟନରେ ସମସ୍ୟା, ବାଟ ଓଗାଳୁଛି କୋରୋନା । କେବେ ବାହାରିବ ଫଳ, କିଏ ପାଇବ କେତେ ମାର୍କ ? ତାହାକୁ ନେଇ ଏବେ ବଢୁଛି ସମସ୍ୟା । ଆଇସିଏସଇ ଓ ସିବିଏସଇ ପକ୍ଷରୁ ଦ୍ୱାଦଶ ଶ୍ରେଣୀ ପରୀକ୍ଷା ଫଳ ପ୍ରକାଶ ପାଇସାରିଥିବା ବେଳେ ରାଜ୍ୟ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ପରିଚାଳିତ ଯୁକ୍ତ ଦୁଇ ଫଳ ପ୍ରକାଶନ ବିଳମ୍ବ ହେବାର ସମ୍ଭାବନା ରହିଛି । ବିଭିନ୍ନ ଜିଲ୍ଲାରେ ସଟଡାଉନ ହେତୁ ଶିକ୍ଷକମାନେ ମୂଲ୍ୟାୟନ କେନ୍ଦ୍ର ଯାଇପାରୁନାହାନ୍ତି । ଯଦ୍ୱାର ଖାତା ଦେଖାରେ ସମସ୍ୟା ଦେଖାଦେଉଥିବା ବିଦ୍ୟାଳୟ ଓ ଗଣଶିକ୍ଷା ବିଭାଗ ମନ୍ତ୍ରୀ କହିଛନ୍ତି । ତେଣୁ ଏହାକୁ ବ୍ୟବସ୍ଥିତ କରିବା ଲାଗି ମୁଖ୍ୟ ଶାସନ ସଚିବକୁ ପତ୍ର ଲେଖିବୁ ବୋଲି ସେ କହିଛନ୍ତି । ଯାହାକୁ ନେଇ ଯୁକ୍ତ ଦୁଇ ଛାତ୍ରଛାତ୍ରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ।

ସେପଟେ ବାରମ୍ବାର ମାଟ୍ରିକ ମୂଲ୍ୟାୟନ ତାରିଖ ବଦଳିବା ପରେ ଶେଷରେ ଖାତାଦେଖା ଶେଷ ହୋଇଥିବା ବେଳେ ଟାବୁଲେସନ ଚାଲିଥିବା ମନ୍ତ୍ରୀ କହିଛନ୍ତି । ପୂର୍ବ ଘୋଷଣା ମୁତାବକ ଜୁଲାଇ ୩୧ ସୁଦ୍ଧା ମାଟ୍ରିକ ଫଳାଫଳ ପ୍ରକାଶ ପାଇବ । ଏଥିଲାଗି ଖୁବଶୀଘ୍ର ତାରିଖ ଘୋଷଣା କରାଯିବ ସେ କହିଛନ୍ତି । ଏହାକୁ ନେଇ ଦଶମ ଛାତ୍ରଛାତ୍ରୀଙ୍କ ମଧ୍ୟରେ ଉସ୍ତ୍ରାହ ଦେଖିବାକୁ ମିଳିଛି ।

Add Zee News as a Preferred Source

ତେବେ ଗୋଟିଏ ପଟେ ମାଟ୍ରିକ ଛାତ୍ରଛାତ୍ରୀଙ୍କ ପରୀକ୍ଷା ଫଳ ନେଇ ନିର୍ଦ୍ଦିଷ୍ଟ ତାରିଖ ଘୋଷଣା ହୋଇନଥିବା ବେଳେ ଯୁକ୍ତ ଦୁଇ ମୂଲ୍ୟାୟନରେ ଦେଖାଦେଇଥିବା ସମସ୍ୟା ଆହୁରି ଚିନ୍ତା ବଢାଇଛି । ଏସବୁ ଉପରୁ ଗଣଶିକ୍ଷା ବିଭାଗ ସହ ଉଭୟ ପରିଷଦ ପକ୍ଷରୁ ତୁରନ୍ତ ପରାଦ ହଟାଇବାକୁ ଦାବି ହୋଇଛି ।