ଅତୀତର ଭୁଲକୁ ଦୋହରାଅ ନାହିଁ, କାହିଁକି ଏମିତି କହିଲେ ବିଜୟ ?

ମଳୟ ରଞ୍ଜନ ମହାନ୍ତି, ଭୁବନେଶ୍ୱର: କୋଭିଡ ପରିସ୍ଥିତି ଏବେ ଶୋଚନୀୟ ଅବସ୍ଥାରେ ଗତି କରୁଛି । ଏହାର ନିୟନ୍ତ୍ରଣ କରିବାରେ ସରକାର ବିଫଳ । ଯେଉଁମାନେ ଏହାର ଦାୟିତ୍ୱରେ ଥିଲେ ସେମାନେ ଗ୍ରାଉଣ୍ଡକୁ କେବେ ଯାଇନାହଁନ୍ତି କି ଦେଖି ନାହାଁନ୍ତି । ସ୍ଥିତି ପରଖିନାହାଁନ୍ତି । ୯୮% ସରକାରୀ କର୍ମଚାରୀ କାମ କରୁଛନ୍ତି ଓ ଅନ୍ୟମାନେ ବାହାଦୁରୀ ମାରୁଛନ୍ତି । ସରକାର ଯେଉଁ ଆଇଏଏସ ଅଧିକାରୀଙ୍କୁ ପଠାଉଛନ୍ତି, ଅଞ୍ଚଳ ଉପରେ ସେମାନଙ୍କ କିଛି ଜ୍ଞାନ ନାହିଁ । ଏଭଳି ସ୍ଥିତିରେ ଦକ୍ଷ ଲୋକଙ୍କୁ ସରକାର ନିୟୋଜିତ କରନ୍ତୁ ବୋଲି କହିଛନ୍ତି ବରିଷ୍ଠ ବିଜେପି ନେତା ବିଜୟ ମହାପାତ୍ର ।

ବିଜୟ ମହାପାତ୍ର ଆହୁରି ମଧ୍ୟ କହିଛନ୍ତି, ଅତୀତରେ ଯେଉଁ ଭୁଲ ହୋଇଛି, ସରକାର ତାର ପୁନରାବୃତ୍ତି କରନ୍ତୁନାହିଁ । ରାଜ୍ୟରେ ଦିନକୁ ଦିନ ମୃତ୍ୟୁହାର ବଢ଼ି ଚାଲିଛି । ମୃତ୍ୟୁ ହାରକୁ ସରକାର ଲୁଚାଉଛନ୍ତି । ଏବେ ଯାହା ଜଣାପଡୁଛି, ରାଜ୍ୟର ୩ଟି ଜାଗାକୁ ଛାଡିଲେ କେଉଁଠି କୋଭିଡ ହସ୍ପିଟାଲ ନାହିଁ । ଯଦି ରହିଛି ତେବେ ବୁର୍ଲା କେସକୁ ଅନୁଗୁଳ କାହିଁକି ପଠାଗଲା ବୋଲି ପ୍ରଶ୍ନ କରିଛନ୍ତି ଶ୍ରୀଯୁକ୍ତ ମହାପାତ୍ର । 

ସେହିପରି ଗଞ୍ଜାମରେ କହିଥିଲେ କୋଭିଡ ହସ୍ପିଟାଲ ରହିଛି । ତେବେ ଭୁବନେଶ୍ୱର ସମ ହସ୍ପିଟାଲକୁ କାହିଁକି ରୋଗୀଙ୍କୁ ଆଣିବାକୁ ପଡୁଛି ? ଏଥିରୁ ସ୍ପଷ୍ଟ ପ୍ରମାଣିତ ହେଉଛି ଯେ, ରାଜ୍ୟରେ କୋଭିଡ ହସ୍ପିଟାଲ ନାମରେ ସରକାର ମିଛ କହିଛନ୍ତି ବୋଲି ଅଭିଯୋଗ କରିଛନ୍ତି ବିଜୟ ମହାପାତ୍ର ।