ବନ୍ୟା ଜନିତ କ୍ଷୟକ୍ଷତିର ଆକଳନ କରିବାକୁ ରାଜ୍ୟରେ କେନ୍ଦ୍ରୀୟ ଟିମ

ନୂଆଦିଲ୍ଲୀ: ଓଡ଼ିଶାରେ କେନ୍ଦ୍ରୀୟ ଟିମ୍। ବନ୍ୟା ଅଞ୍ଚଳର କ୍ଷୟକ୍ଷତି ଆକଳନ କରିବାକୁ ଆଜି ସକାଳେ ଅନ୍ତଃମନ୍ତ୍ରୀସ୍ତରୀୟ କେନ୍ଦ୍ରୀୟ ଟିମ୍ ଭୁବନେଶ୍ୱରରେ ପହଞ୍ଚି ଥିଲା। କେନ୍ଦ୍ର ଗୃହ ମନ୍ତ୍ରାଳୟର ଯୁଗ୍ମ ସଚିବ ପ୍ରଭୀନ୍ ବଶିଷ୍ଠଙ୍କ ଅଧ୍ୟକ୍ଷତାରେ ମୋଟ ୬ ଜଣ ଏହି ଟିମରେ ଆସିଛନ୍ତି। 

ଆଜି ଓ କାଲି ଦୁଇଦିନ ଧରି ଏହି ଟିନ ଦୁଇ ଦଳରେ ବିଭକ୍ତ ହୋଇ ବନ୍ୟାଞ୍ଚଳ କ୍ଷୟକ୍ଷତିର ଆକଳନ କରିବେ। ଗୋଟିଏ ଟିମ୍ କେନ୍ଦ୍ରାପଡା ଓ ପୁରୀ ଏବଂ ଆଉ ଏକ ଟିମ୍ ଭଦ୍ରକ ଓ ଯାଜପୁର ଗସ୍ତରେ ଯାଇ ବନ୍ୟା ଜନିତ କ୍ଷୟକ୍ଷତିର ଆକଳନ କରିବେ। ବନ୍ୟା ପ୍ରଭାବିତ ଅଞ୍ଚଳ ପରିଦର୍ଶନ ବେଳେ ୪ଟି ଜିଲ୍ଲାର ଜିଲ୍ଲାପାଳ କେନ୍ଦ୍ରୀୟ ଟିମର ସଦସ୍ୟଙ୍କ ସହ ମଧ୍ୟ ବୁଲିବେ। 

କ୍ଷୟକ୍ଷତି ଆକଳନ କରି ଫେରିବା ପରେ ଆସନ୍ତାକାଲି ଅପରାହ୍ନରେ ଲୋକସେବା ଭବନରେ ବୈଠକ ହେବ। କେନ୍ଦ୍ରୀୟ ଟିମ୍ ସଦସ୍ୟ ମୁଖ୍ୟ ଶାସନ ସଚିବଙ୍କ ସହ ଆଲୋଚନା କରିବେ। ପରେ କେନ୍ଦ୍ରୀୟ ଟିମ୍ ଫେରିଯାଇ କ୍ଷୟକ୍ଷତି ରିପୋର୍ଟ କେନ୍ଦ୍ର ସରକାରଙ୍କୁ ପ୍ରଦାନ କରିବେ।