ଚିଣ୍ଟୁବାବା ଆସିଛନ୍ତି କାଳିଆ ପାଇଁ ତୁଳସୀ ନେଇ

ସଞ୍ଜୟ ମହାପାତ୍ର, ପୁରୀ: ସେ ହେଉଛନ୍ତି ଭକ୍ତର ଭଗବାନ। ସବୁବେଳେ ଭକ୍ତର ଦୁଃଖ କଣିକା ଚାହିଁ ରହିଥାନ୍ତି। ଭକ୍ତ ପାଇଁ କାଳିଆର ଡୋର ବେଶ୍ ସ୍ୱତନ୍ତ୍ର । କୋରୋନାକୁ ନେଇ ଚାଲିଥିବା ଲକ୍ ଡାଉନ ମଧ୍ୟ କାଳିଆର ଭକ୍ତଙ୍କ ପାଇଁ ବାଧକ ସାଜିପାରିନି । ଦିନେ ତୁଳସୀ ବାବା ଫୁଲ, ତୁଳସୀ ଧରି ଶ୍ରୀକ୍ଷେତ୍ରରେ ପହଞ୍ଚିଥିଲା ମହାପ୍ରଭୁ କାଳିଆ ସାଆନ୍ତଙ୍କ ପାଇଁ, ଆଜି ସୁଦୂର ଶରଣ ଶ୍ରୀକ୍ଷେତ୍ର ଢେଙ୍କାନାଳରୁ ଫୁଲ ତୁଳସୀ ଆଉ ଫଳମୂଳ ଧରି ଚିଣ୍ଟୁ ବାବା ପହଞ୍ଚିଛନ୍ତି ଶ୍ରୀକ୍ଷେତ୍ରରେ । ଆଉ ମହାପ୍ରଭୁଙ୍କ ଲାଗି ଭେଟି ଦେଇଛନ୍ତି ସେ ଆଣିଥିବା ଫୁଲ ତୁଳସୀ ଆଉ ଫଳମୂଳ । ସବୁଠାରୁ ବଡକଥା ହେଉଛି ବାଧକ ସାଜିନାହିଁ କୌଣସି କଟକଣା । ଆଉ ଫେରିଯିବା ବେଳେ ସାଙ୍ଗରେ ନେଇ ଫେରିଛନ୍ତି ମହାପ୍ରଭୁଙ୍କ ଗୋପାଳ ବଲ୍ଲଭ ଭୋଗ କଇ,କୋରା ଆଦି ମହାପ୍ରସାଦ ।

ଲକଡାଉନରେ ଭାରତବର୍ଷ । ଦେବାଦେବୀ ମନ୍ଦିର ଉପରେ ଲାଗିଛି କଟକଣା । କିନ୍ତୁ ଶ୍ରୀକ୍ଷେତ୍ରରେ କାଳିଆ ସାଆନ୍ତଙ୍କର ଚାଲିଛି ଶୃଙ୍ଖଳିତ ନୀତିକ୍ରାନ୍ତି ଆଉ ସେବାପୂଜା । ଲକଡାଉନ ଯୋଗୁଁ ଅଭାବ ପଡୁଛି ଫୁଲ, ତୁଳସୀ । କିନ୍ତୁ ଶୁଣିଲେ ଆଶ୍ଚର୍ଯ୍ୟ ହେବେ ଏବେ ବି ଶହେ ଦୁଇଶହ କିଲୋମିଟର ଦୂରରୁ ଭକ୍ତ ଆଣି ଦେଉଛନ୍ତି ଫୁଲ, ତୁଳସୀ ଆଉ ଫଳମୂଳ । କିଛିଦିନ ତଳେ ଭୁବନେଶ୍ବରରୁ ତୁଳସୀ ବାବା ନିଜ କାରରେ ନେଇ ଆସି ଫୁଲ, ତୁଳସୀ ଦେଇ ଯାଇଥିଲେ । 

ଆଉ ଆଜି ଜଣେ ଭକ୍ତ ପ୍ରମୋଦ ପରିଡା ଓରଫ ଚିଣ୍ଟୁ ବାବା । ସୁଦୂର ଢେଙ୍କାନାଳର ଶରଣ ଶ୍ରୀକ୍ଷେତ୍ର ଭକ୍ତକବି ଦୀନକୃଷ୍ଣ ଦାସ ସାଧନା ପିଠରୁ ଫୁଲ, ତୁଳସୀ ସହ ଫଳମୂଳ ଧରି ବାଇକ୍ ଯୋଗେ ଶ୍ରୀକ୍ଷେତ୍ରରେ ପହଞ୍ଚିଥିଲେ । ମହାପ୍ରଭୁଙ୍କ ଲାଗି ଫୁଲ ତୁଳସୀ ଧରି ଆସିବା ଶୁଣିବା ପରେ ଢେଙ୍କାନାଳ ଜିଲ୍ଲାପାଳ ତାଙ୍କୁ ପାସ୍ ମଧ୍ୟ କରାଇଦେଇଥିଲେ । ରଥ ଆକୃତିର ଏହି ବାଇକ୍ ଟି । ତୁଳସୀ ହୁଣ୍ଢି ବୋଲି ଲେଖାଯାଇଛି । ତୁଳସୀ, ଦୟଣା, ଫୁଲଫଳ ଆଦି ଭକ୍ତ ଯିଏ ଯାହା ପାଏ ମହାପ୍ରଭୁଙ୍କ ପାଇଁ ଏହି ହୁଣ୍ଡିରେ ପ୍ରଦାନ କରିଥାନ୍ତି । ଶ୍ରୀମନ୍ଦିର ପଶ୍ଚିମ ଦ୍ୱାର ନିକଟରେ ପହଞ୍ଚିବା ପରେ ସେବାୟତମାନେ ତାଙ୍କୁ ସ୍ୱାଗତ କରି ଚିଣ୍ଟୁବାବା ଆଣିଥିବା ଜିନିଷ ମହାପ୍ରଭୁଙ୍କ ଲାଗି ଶ୍ରୀମନ୍ଦିରକୁ ନେଇଥାନ୍ତି । ଆଉ ମହାପ୍ରଭୁଙ୍କ ପ୍ରସାଦ ଦେଇ ସସମ୍ମାନେ ଏହି ସାଧୁଙ୍କୁ ବିଦାୟ ଦେଇଥାନ୍ତି ସେବାୟତ। ଯାହାର ନିଚ୍ଛକ ଭଦାହରଣ ହେଉଛି ଏହି ଦୃଶ୍ୟ।