ଭୀମସାର କୋରୋନା ଟେଷ୍ଟିଂ ସେଣ୍ଟରରୁ ଲିକ୍ ହେଲା ଆକ୍ରାନ୍ତଙ୍କ ନାଁ

ଅଜୟ ନାଥ, ସମ୍ୱଲପୁର: ପୁଣି ଚର୍ଚ୍ଚାରେ ବୁର୍ଲା ଭୀମସାର । ଭୀମସାର କୋରୋନା ପରୀକ୍ଷା କେନ୍ଦ୍ରରୁ ଲିକ୍ ହେଲା କୋରୋନା ସଂକ୍ରମିତ ରୋଗୀଙ୍କ ନାମ । କିଛିଦିନ ତଳେ ବୁର୍ଲା ଭିସୁଟରେ ଜଣେ ଅଧ୍ୟାପିକାଙ୍କ ସ୍ୱାମୀଙ୍କ କୋରୋନାରେ ମୃତ୍ୟୁ ହୋଇଥିଲା । ଏହାପରେ ଭିସୁଟର ସମସ୍ତ ଅଧ୍ୟାପକ, ଅଧ୍ୟାପିକା ଓ କର୍ମଚାରୀଙ୍କ କୋରୋନା ଟେଷ୍ଟିଂ ନିମନ୍ତେ କତ୍ତୃପକ୍ଷ ନିର୍ଦ୍ଦେଶ ଦେଇଥିଲେ । ଫଳରେ ଭିସୁଟର ସମସ୍ତଙ୍କର କୋରୋନା ପରୀକ୍ଷା ହୋଇଥିଲା । କୋଭିଡ-19 ନିୟମ ହିସାବରେ ଏହି ପରୀକ୍ଷା ଫଳକୁ କେବଳ ରାଜ୍ୟ ସରକାରଙ୍କ ସ୍ୱାସ୍ଥ୍ୟ ବିଭାଗକୁ ଦିଆଯିବ । ହେଲେ ବୁର୍ଲା ଭୀମସାର କୋଭିଡ ଟେଷ୍ଟିଙ୍ଗ ସେଣ୍ଟରରୁ ଭିସୁଟ କର୍ମଚାରୀଙ୍କ ନାଁ ସହିତ ପୋଜେଟିଭ ରିପୋର୍ଟ ଆସିଥିବା ଏକ ଲିଷ୍ଟ ଭାଇରାଲ ହୋଇଛି । ଯାହାକି ଅତ୍ୟନ୍ତ ସମ୍ବେଦନଶୀଳ ଘଟଣା ।

ଯେଉଁ ପଜେଟିଭ ବାହାରିଥିବା ଲୋକଙ୍କର ନାଁ ପ୍ରଘଟ ହୋଇଛି । ସେମାନଙ୍କୁ ତାଙ୍କର ଅଂଚଳରେ ଘୃଣା ଚକ୍ଷୁରେ ଦେଖୁଥିବା ଜଣାପଡିଛି । ନାଁ ପ୍ରଘଟ ହୋଇଥିବା ବ୍ୟକ୍ତି ମାନସିକ ଚାପରେ ପଡି କୌଣସି ଭୁଲ ପଦକ୍ଷେପ ଗ୍ରହଣ ନ କରନ୍ତି, ତାହା କହିବା ଅସମ୍ଭବ । ତେବେ ରାଜ୍ୟ ସରକାରଙ୍କ ପକ୍ଷରୁ ଜାରି ହୋଇଥିବା ନିୟମକୁ ଅମାନ୍ୟ କରି କିପରି ଭାବରେ ଏହି ଲିଷ୍ଟ ଲିକ୍ ହେଲା । ତାହା ବର୍ତ୍ତମାନ ଚର୍ଚ୍ଚାର ବିଷୟ ପାଲଟିଛି । ଏ ନେଇ କୋଭିଡ ଟେଷ୍ଟିଂ ସେଣ୍ଟରର ମୁଖ୍ୟଙ୍କୁ ଯୋଗାଯୋଗ କରିଥିଲେ ହେଁ ସେ ଏ ବିଷୟକୁ ଖମଖିଆଳି ଭାବେ ନେଇଥିଲେ । ଆଉ ଅନ୍ୟ ଅଧିକାରୀଙ୍କ ଉପରେ ଏହି ଦୋଷ ଲଦି ଦେଇଥିଲେ ।