ପ୍ରଡ଼କ୍ଟ ଆପ୍ଲିକେସନ ଡେଭଲପମେଣ୍ଟ ସେଣ୍ଟରକୁ ଉଦଘାଟନ କଲେ ମୁଖ୍ୟମନ୍ତ୍ରୀ

ଯଯାତି ମହାନ୍ତି, ଭୁବନେଶ୍ୱର: ପାରାଦୀପ ଇଣ୍ଡିଆନ୍ ଅଏଲ ତୈଳ ବିଶୋଧନାଗାର ପରିସରରେ ପ୍ରଡ଼କ୍ଟ ଆପ୍ଲିକେସନ ଡେଭଲପମେଣ୍ଟ ସେଣ୍ଟରକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍‌ଘାଟନ କରିଛନ୍ତି । ଭିଡ଼ିଓ କନଫେରେନ୍ସିଂ ବା ଭର୍ଚୁଆଲ ଟେକ୍ନୋଲୋଜି ମାଧ୍ୟମରେ କେନ୍ଦ୍ର ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ଏହାର ଶୁଭାରମ୍ଭ କରାଯାଇଛି । 

ପ୍ଲାଷ୍ଟିକ ଓ ପେଟ୍ରୋକେମିକାଲ୍ସ କ୍ଷେତ୍ରରେ ଇଣ୍ଡିଆନ ଅଏଲ ଓଡ଼ିଶାରେ ଗୁରୁତ୍ୱପୂର୍ଣ୍ଣ ଭୂମିକା ନିଭାଉଥିବା ବେଳେ ଏହି ବୈଷୟିକ କେନ୍ଦ୍ର ଅନେକ କ୍ଷେତ୍ରରେ ସହାୟକ ହେବ ବୋଲି ଆଶା କରାଯାଉଛି । ପଲିମର ଶିଳ୍ପରେ ଏହି କେନ୍ଦ୍ର ଅନେକ ଗୁରୁତ୍ୱ ବହନ କରୁଥିବା ବେଳେ ପୂର୍ବ ଭାରତରେ ପଲିମର ଶିଳ୍ପରେ ପୁଂଜି ନିବେଶକାରୀଙ୍କୁ ଆକୃଷ୍ଟ କରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଏହି ଅବସରରେ ଭଦ୍ରକରେ ଇଣ୍ଡିଆନ ଅଏଲର ପ୍ରସ୍ତାବିତ ଟେକ୍ସଟାଇଲ ପାର୍କ କାମ ଶୀଘ୍ର ଆଗେଇ ନେବାକୁ ମୁଖ୍ୟମନ୍ତ୍ରୀ ପରାମର୍ଶ ଦେଇଛନ୍ତି ।