ଭୂମିହୀନ ଚାଷୀଙ୍କ ପାଇଁ ରାଜ୍ୟ ସରକାରଙ୍କ 'ବଳରାମ' ଯୋଜନା

ପ୍ରଥମ ପର୍ଯ୍ୟାୟରେ ସାଢେ ୩ ଲକ୍ଷ ଭାଗ ଚାଷୀଙ୍କ ପାଇଁ ଯୋଜନା କରୁଛନ୍ତି ସରକାର । ହେଲେ ଏହାର କାର୍ଯ୍ୟକାରୀତାକୁ ନେଇ ବିରୋଧି ପ୍ରଶ୍ନ ଉଠାଇଥିବା ବେଳେ ଶାସକ ବିଜେଡ଼ି କହିଛି, କାଳିଆ ଭଳି ବଳରାମ ଯୋଜନା ବି ଚାଷୀଙ୍କ କାମରେ ଲାଗିବ ଏବଂ ରାଜ୍ୟର ଅର୍ଥନୀତି ସୁଦୃଢ ହେବ ।

ଯଯାତି ମହାନ୍ତି, ଭୁବନେଶ୍ୱର: ଚାଷୀଙ୍କ ପାଇଁ କାଳିଆ ପରେ ସରକାରଙ୍କ ବଳରାମ ଯୋଜନା । ନିଜର ଜମି ନଥାଇ ପର ଜମିରେ ଚାଷ କରି ପରିବାର ପୋଷୁଥିବା ଭାଗ ଚାଷୀଙ୍କୁ ବ୍ୟାଙ୍କ ଋଣ ଯୋଗାଇବା ଏହି ଯୋଜନାର ମୁଖ୍ୟ ଉଦ୍ଦେଶ୍ୟ । ୭ ଲକ୍ଷ ଭାଗ ଚାଷୀଙ୍କୁ ପ୍ରାୟ ୫୦ ହଜାର ଟଙ୍କା ଲେଖାଏଁ କୃଷି ଋଣ ଦିଆଯିବ । କେବଳ ସମବାୟ ବ୍ୟାଙ୍କ ନୁହେଁ, ଜାତୀୟକରଣ ବ୍ୟାଙ୍କରୁ ବି ଚାଷୀ ନେଇପାରିବେ କୃଷି ଋଣ । ପ୍ରଥମ ପର୍ଯ୍ୟାୟରେ ସାଢେ ୩ ଲକ୍ଷ ଭାଗ ଚାଷୀଙ୍କ ପାଇଁ ଯୋଜନା କରୁଛନ୍ତି ସରକାର । ହେଲେ ଏହାର କାର୍ଯ୍ୟକାରୀତାକୁ ନେଇ ବିରୋଧି ପ୍ରଶ୍ନ ଉଠାଇଥିବା ବେଳେ ଶାସକ ବିଜେଡ଼ି କହିଛି, କାଳିଆ ଭଳି ବଳିଆ ଯୋଜନା ବି ଚାଷୀଙ୍କ କାମରେ ଲାଗିବ ଏବଂ ରାଜ୍ୟର ଅର୍ଥନୀତି ସୁଦୃଢ ହେବ ।

ପ୍ରତ୍ୟେକ ପଂଚାୟତରେ କୃଷକ ସାଥି ମାନଙ୍କ ଦ୍ୱାରା ଋଣ ପାଇ ନ ଥିବା ଚାଷୀଙ୍କ ତାଲିକା ପ୍ରସ୍ତୁତ ହେବ । ୧୦ ଜଣ ଭାଗଚାଷୀଙ୍କୁ ନେଇ ଏକ ଜଏଂଟ ଲାଏବିଲିଟି ଗ୍ରୁପ ଗଠନ ହେବ । ପ୍ରତି ଗ୍ରୁପକୁ ଦେଢ ଲକ୍ଷରୁ ୨ ଲକ୍ଷ ପର୍ଯ୍ୟନ୍ତ ଋଣ ମିଳିବ । ଏବେ ସମବାୟ ବ୍ୟାଙ୍କ ଜରିଆରେ ପ୍ରତି ଭାଗ ଚାଷୀଙ୍କୁ  ମାତ୍ର ୧୦ ହଜାର ଟଙ୍କା ମିଳୁଛି ।  ଯାହା କୃଷି କାମ ପାଇଁ ଅଭାବ ପଡୁଛି । ବଳରାମ ଯୋଜନାରେ ଜଣେ ଭାଗ ଚାଷୀ ୫୦ ହଜାର ଟଙ୍କା ପର୍ଯ୍ୟନ୍ତ ଋଣ ପାଇପାରିବ । କେବଳ ସମବାୟ ବ୍ୟାଙ୍କ ନୁହେଁ, ଏବେ ଜାତୀୟକରଣ ବ୍ୟାଙ୍କ ଜରିଆରେ ବି ଭାଗଚାଷୀଙ୍କୁ ଋଣ ମିଳିବ । ରାଜ୍ୟରେ ୧୪ ହଜାର କୃଷକ ସାଥି ଅଛନ୍ତି । ସରକାରଙ୍କ ଉଦେଶ୍ୟ ଭାଗ ଚାଷୀ ବା ଭୂମିହୀନ ଏବଂ ଯେଉଁମାନେ ଋଣରୁ ବଂଚିତ ହୋଇଛନ୍ତି, ସେମାନଙ୍କୁ ଋଣ ଯୋଗାଇବା । କୋରୋନା ମହାମାରୀ ଯୋଗୁଁ ଭୁଷୁଡ଼ି ପଡ଼ିଥିବା ଅର୍ଥନୀତିକୁ ସୁଧାରିବା ପାଇଁ କୃଷି ଉପରେ ଉଭୟ କେନ୍ଦ୍ର ଓ ରାଜ୍ୟ ସରକାର ଗୁରୁତ୍ୱ ଦେଉଛନ୍ତି ।

ହେଲେ ଯୋଜନା କାର୍ଯ୍ୟକାରୀ ହେବା ପୂର୍ବରୁ ଏହାକୁ ନେଇ ରାଜନୀତି ଆରମ୍ଭ ହୋଇଯାଇଛି । ବିରୋଧି କଂଗ୍ରେସ ଓ ବିଜେପି ଏହାର କାର୍ଯ୍ୟକାରିତା ଓ ସ୍ୱଚ୍ଛତାକୁ ନେଇ ପ୍ରଶ୍ନ ଉଠାଇଥିବା ବେଳେ ଶାସକ ବିଜେଡ଼ି ବି ଏହାର ଜବାବ ରଖିଛି । କାଳିଆ ଯୋଜନା କରି ନିଜ ଦଳୀୟ କର୍ମୀଙ୍କ ମଧ୍ୟରେ ବାଂଟି ଦେଲେ । ପୁଣି ନୂଆ ବଳରାମ ଯୋଜନା କରି ଭେଳିକି ବାହାର କରିଛନ୍ତି । ଏ ପର୍ଯ୍ୟନ୍ତ ଭୂମୀହୀନ ଚାଷୀଙ୍କ ରେକର୍ଡ ରାଜ୍ୟ ସରକାରଙ୍କ ପାଖରେ ନାହିଁ ବୋଲି ବିଜେପି ଓ କଂଗ୍ରେସ କହିଥିବା ବେଳେ ଶାସକ ବିଜେଡ଼ି କହିଛି,ଚାଷୀଙ୍କ ପାଇଁ ହୋଇଛି ବଳିଆ । ସବୁ ସମୟରେ ଚାଷ ଏବଂ ଚାଷୀଙ୍କୁ ପ୍ରାଧାନ୍ୟ ଦିଆଯାଇଛି । \'କାଳିଆ\' ଭଳି \'ବଳିଆ\' ଯୋଜନାରେ ବି ଚାଷୀମାନେ ଉପକୃତ ହେବେ । ଓଡିଶାର ଅର୍ଥନୀତି ସୁଦୃଢ ହେବ ।

୨୦୧୯ ନିର୍ବାଚନ ପୂର୍ବରୁ ରାଜ୍ୟ ସରକାର କାଳିଆ ଯୋଜନା କରି ନାମମାତ୍ର ଓ କ୍ଷୁଦ୍ର ଚାଷୀଙ୍କୁ ୧୦ ହଜାର ଟଙ୍କାର ସହାୟତା ଦେଇଛନ୍ତି । ଏବେ ସୁଦ୍ଧା ପ୍ରାୟ ୫୩ ଲକ୍ଷ ଚାଷ ଏହା ଦ୍ୱାରା ଉପକୃତ ହୋଇଥିବା ବେଳେ ବଳିଆ ଯୋଜନାରେ ରାଜ୍ୟର ପ୍ରାୟ ୭ ଲକ୍ଷ ଭାଗଚାଷୀ ଉପକୃତ ହେବେ ବୋଲି ଜଣାପଡ଼ିଛି ।