'ଉମ୍ଫୁନ'କୁ ଦୃଷ୍ଟିରେ ରଖି ଚାଷୀଙ୍କ ପାଇଁ ଗାଇଡଲାଇନ୍ ଜାରି କଲା କୃଷି ବିଭାଗ

ଯଯାତି ମହାନ୍ତି, ଭୁବନେଶ୍ୱର: ସମ୍ଭାବ୍ୟ ବାତ୍ୟା ନେଇ ବିଭାଗର ପ୍ରସ୍ତୁତି ବାବଦରେ ସମୀକ୍ଷା କରିଛନ୍ତି ପଂଚାୟତିରାଜ ଓ ନଗର ଉନ୍ନୟନ ମନ୍ତ୍ରୀ ପ୍ରତାପ ଜେନା । ସମସ୍ତଙ୍କୁ ସ୍ୱଚ୍ଛ ପିଇବା ପାଣି ଯୋଗାଇବା ସରକାରଙ୍କ ପ୍ରାଥମିକତା ବୋଲି ସମୀକ୍ଷା ବୈଠକରେ ମନ୍ତ୍ରୀ କହିଛନ୍ତି । ଏଥିପାଇଁ ସବୁ ପ୍ରକାର ପ୍ରସ୍ତୁତି ସରିଛି । ପାନୀୟ ଜଳ ପ୍ରକଳ୍ପରେ ଜେନେରେଟର ବ୍ୟବସ୍ଥା ସହ ଆବଶ୍ୟକ ସ୍ଥଳେ ଟ୍ୟାଙ୍କର ଯୋଗେ ପାଣି ପହଂଚାଯିବ ବୋଲି ମନ୍ତ୍ରୀ କହିଛନ୍ତି । ସେପଟେ ଖରିଫ ଚାଷ କାର୍ଯ୍ୟକ୍ରମ ପାଇଁ କୃଷି ବିଭାଗ ତତ୍ପରତା ଦେଖାଇଛି । ରାଜ୍ୟସ୍ତରୀୟ ସମୀକ୍ଷା ବୈଠକରେ କୃଷି ମନ୍ତ୍ରୀ ସ୍ଥିତିର ଅନୁଧ୍ୟାନ କରିବା ସହ ସମ୍ଭାବ୍ୟ ବାତ୍ୟାକୁ ନଜରରେ ରଖି ଚାଷୀମାନଙ୍କ ପାଇଁ ଗାଇଡଲାଇନ୍ ଜାରି କରିଛି କୃଷି ବିଭାଗ । ବିଲରେ ପଡ଼ିଥିବା ଅମଳ ଧାନକୁ ସୁରକ୍ଷିତ ରଖିବା ମନ୍ତ୍ରୀ ସମସ୍ତଙ୍କୁ ଅପିଲ କରିଛନ୍ତି ।

ସମ୍ଭାବ୍ୟ ବାତ୍ୟା ଯୋଗୁଁ ଉପୁଜିବାକୁ ଥିବା ସବୁ ପ୍ରକାର ସ୍ଥିତି ମୁକାବିଲା ପାଇଁ ପଞ୍ଚାୟତିରାଜ ଓ ନଗର ଉନ୍ନୟନ ବିଭାଗ ସମ୍ପୂର୍ଣ ପ୍ରସ୍ତୁତ ରହିଛି । ପ୍ରଭାବିତ ହେବାକୁ ଥିବା ୫ ଜିଲ୍ଲାର ୧୬ ସହରରେ ବିଜ୍ଞାପନ ହୋର୍ଡିଂ ଉଛେଦ  ହେବ। ଏ ସବୁ ଜିଲ୍ଲାର ସହର ଅଞ୍ଚଳର ବାତ୍ୟା ଆଶ୍ରୟ ସ୍ଥଳରେ ୬୩୦୦୦ ବେଡ଼ ରହିଛି । ଏଥିରୁ ୪୦୦୦ ବେଡ଼ରେ ପ୍ରବାସୀ ପୃଥକବାସରେ ରହିଛନ୍ତି । ସଙ୍ଗରୋଧ ପାଇଁ ଅଲଗା ବ୍ୟବସ୍ଥା କରାଯାଉଛି । ସେହିପରି ସହର ଠାରୁ ଆରମ୍ଭ କରି ଗ୍ରାମାଂଚଳରେ ପିଇବା ପାଣି ପ୍ରକଳ୍ପରେ ଜେନରେଟର ବ୍ୟବସ୍ଥା ହୋଇଛି । ଆବଶ୍ୟକ ପଡ଼ିଲେ ଟ୍ୟାଙ୍କର ଯୋଗେ ପାଣି ଯୋଗାଇ ଦିଆଯିବ। ବାତ୍ୟା ଆଶ୍ରୟ ସ୍ଥଳୀରେ ବି ଜେନରେଟର ରଖାଯାଇଛି । ୭୬୦୦ ବାତ୍ୟା ଆଶ୍ରୟ ସ୍ଥଳୀ ପ୍ରସ୍ତୁତ । ୫ ଜିଲ୍ଲାକୁ ଫୋକସ କରିଛୁ । ୧୧ ରୁ ୧୨ ଲକ୍ଷ ଲୋକଙ୍କୁ ସ୍ଥାନାନ୍ତର କରିବାକୁ ପ୍ରସ୍ତୁତ ହେଉଛୁ। ଉମ୍ଫୁନ ସ୍ଥିତି ସମୀକ୍ଷା ପରେ ବିଭାଗୀୟ ମନ୍ତ୍ରୀ ପ୍ରତାପ ଜେନା ତାଙ୍କ ପ୍ରତିକ୍ରିୟାରେ ବିଭାଗୀୟ ପ୍ରସ୍ତୁତି କଥା କହିଛନ୍ତି ।

ଆଜିଠାରୁ ଆରମ୍ଭ ହେଲା ରାଜ୍ୟରେ ଖରିଫ ଚାଷ କାର୍ଯ୍ୟକ୍ରମ । କୋରୋନା କଟକଣା ସାଙ୍ଗକୁ ସମ୍ଭାବ୍ୟ ବାତ୍ୟାକୁ ନଜରରେ ରଖି ଚାଷୀଙ୍କ ପାଇଁ ସ୍ୱତନ୍ତ୍ର ଗାଇଡ଼ଲାଇନ୍ ଜାରି ହୋଇଛି । ଏବର୍ଷ ଖରିଫ ଋତୁରେ ୯୬ ଲକ୍ଷ ଟନ ଖାଦ୍ୟ ଉତ୍ପାଦନର ଲକ୍ଷ୍ୟ ରଖିଛନ୍ତି ସରକାର । ଧାନ ସହିତ ମୁଗ, ବିରି, ରାଶି, ଚିନାବାଦାମ ପାଇଁ ପ୍ରସ୍ତୁତି ସରିଛି । ଚାଷୀଙ୍କ ପାଇଁ ସବ୍‌ସିଡ଼ି ଦରରେ ସରକାର ଯୋଗାଉଥିବା ସାର, ବିହନ ସମବାୟ ସଂସ୍ଥା ପାଖରେ ପହଂଚିଗଲାଣି ବୋଲି ମନ୍ତ୍ରୀ କହିଛନ୍ତି । ୫ ଲକ୍ଷ ୭୦ ହଜାର ହେକ୍ଟରରେ ପନିପରିବା ଚାଷ କରାଯିବାକୁ ଲକ୍ଷ୍ୟ ରଖାଯାଇଛି । ଖରିଫ ଋତୁରେ ଏବର୍ଷ ୭୫୦୦ କୋଟି ଋଣ ଦେବାକୁ ଲକ୍ଷ ରଖାଯାଇଛି। ସେହିପରି ସମ୍ଭାବ୍ୟ ବାତ୍ୟା ନେଇ ଚାଷୀଭାଇମାନଙ୍କୁ ଗାଇଡ଼୍‌ଲାଇନ୍ ଜରି ହେବା ସହ ପଂଚାୟତ ସ୍ତରରେ ହ୍ୱାଟସ୍‌ଆପ୍ ଗ୍ରୁପ କରାଯାଇଛି । ଅମଳ ଫସଲକୁ ସୁରକ୍ଷିତ ସ୍ଥାନରେ ରଖିବାକୁ ପରାମର୍ଶ କ୍ଷେତରେ ପାଣି ନିଷ୍କାସନର ବ୍ୟବସ୍ଥା କରିବାକୁ ବିଭାଗ ପରାମର୍ଶ ଦେଇଛି ।
ଗୋଟିଏ ପଟେ କୋରୋନା ପାଇଁ ଚାଷ କାମ ପ୍ରଭାବିତ ହୋଇଥିବା ବେଳେ ଏବେ ଉପକୂଳ ଓ ଉତ୍ତର ଓଡ଼ିଶାରେ ସମ୍ଭାବ୍ୟ ବାତ୍ୟା ଚାଷୀମାନଙ୍କୁ ଚିନ୍ତାରେ ପକାଇଛି । ଏଭଳି ସମୟରେ ସରକାରଙ୍କ ବିଭିନ୍ନ ବିଭାଗ ଚାଷୀମାନଙ୍କ ପାଇଁ କରିଥିବା ବ୍ୟବସ୍ଥା ଏମାନଙ୍କ ଅବସ୍ଥାରେ କେତେ ସୁଧାର ଆଣିପାରୁଛି, ତାହା ଉପରେ ନଜର ରହିବ ।