ଗୋଟିଏ ନିୟମରେ ପରିଚାଳିତ ହେବ ସରକାରୀ ବିଶ୍ୱବିଦ୍ୟାଳୟ

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ସବୁ ସରକାରୀ ବିଶ୍ୱବିଦ୍ୟାଳୟ ପାଇଁ ଗୋଟିଏ ନିୟମ । ବିଶ୍ୱବିଦ୍ୟାଳୟ ପରିଚାଳନା ଓ ନିଯୁକ୍ତି ବ୍ୟବସ୍ଥାରେ ସଂସ୍କାର ଆଣିବା ସହ ଏହାକୁ ଅଧିକ କ୍ରିୟାଶୀଳ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗତକାଲି ରାଜ୍ୟ କ୍ୟାବିନେଟ୍ ରେ ମୋହାର ବାଜିଛି ।  ଏହାସହ ବିଶ୍ବବିଦ୍ୟାଳୟର ଆଳଙ୍କାରିକ କର୍ତ୍ତୃପକ୍ଷ ଭାବେ ପଡିରହିଥିବା ସିନେଟ୍ ବ୍ୟବସ୍ଥାକୁ ଉଚ୍ଛେଦ କରିବା ସହ ସିଣ୍ଡିକେଟକୁ ଅଧିକ କ୍ରିୟାଶୀଳ କରିବାକୁ ନିଷ୍ଫତ୍ତି ହୋଇଛି । ଏହାସହ କୁଳପତି ନିଯୁକ୍ତି, ଅବସର ବୟସ ସୀମା, ବାର୍ଷିକ ସମୀକ୍ଷ ରିପୋର୍ଟ ଆଦି ପ୍ରସଙ୍ଗରେ ଅନେକ ପରିବର୍ତ୍ତନ କରାଯାଇଛି। ଯାହାକୁ ନେଇ ଶିକ୍ଷାବିତ ଓ ଛାତ୍ର ସଂଗଠନଙ୍କ ମଧ୍ୟରେ ଚର୍ଚ୍ଚା ଆଲୋଚନା ଆରମ୍ଭ ହୋଇଛି ।

ହଟିବ ସିନେଟ୍, କ୍ରିୟାଶୀଳ ହେବ ସିଣ୍ଡିକେଟ୍ । ବିଶ୍ୱବିଦ୍ୟାଳୟରୁ ହଟିଯିବ କି ଛାତ୍ର ପ୍ରତିନିଧିଙ୍କ ସଂପୃକ୍ତି ? ଦୀର୍ଘବର୍ଷ ଧରି ବିଶ୍ୱବିଦ୍ୟାଳୟର ଆଳଙ୍କାରିକ କର୍ତ୍ତୃପକ୍ଷ ଭାବେ ପଡିରହିଥିବା ସିନେଟକୁ ଉଚ୍ଛେଦ କରିବା ନେଇ କ୍ୟାବିନେଟର ମୋହର ବାଜିଛି । ଯେଉଁଥିରେ ବିଶ୍ୱବିଦ୍ୟାଳୟ କର୍ତ୍ତୃପକ୍ଷ, କର୍ମଚାରୀଙ୍କ ସମେତ ଛାତ୍ର ପ୍ରତିନିଧିମାନେ ସଦସ୍ୟ ଭାବେ ରହି ବିଶ୍ୱବିଦ୍ୟାଳୟର ସୁବିଧା ଅସୁବିଧା ଓ ପରିଚାଳନା ଆଦି କ୍ଷେତ୍ରରେ ବିଚାର ବିମର୍ଶ କରିଥାନ୍ତି । ହେଲେ ତାହାକୁ ଆକାମୀ କରି ଏବେ ଉଚ୍ଛେଦ କରିବାକୁ ନିଷ୍ପତ୍ତି ହୋଇଛି । 

ସେପଟେ ଉଚ୍ଚଶିକ୍ଷା ବିଭାଗ ଓ ବିଶ୍ୱବିଦ୍ୟାଳୟର ଅଧିକାରୀଙ୍କୁ ନେଇ ଗଠିତ ସିଣ୍ଡିକେଟକୁ ଅଧିକ କ୍ରିୟାଶୀଳ କରିବାକୁ କୁହାଯାଇଛି। ଯଦ୍ୱାରା ବିଶ୍ୱବିଦ୍ୟାଳୟର କର୍ତ୍ତୃତ୍ୱରେ କର୍ମଚାରୀ ଓ ଛାତ୍ର ପ୍ରତିନିଧିଙ୍କ ସଂପୃକ୍ତି ଲୋପ ପାଇବ ବୋଲି ଦାବି କରିଛନ୍ତି ଏବିଭିପିର ଛାତ୍ର ନେତା ।

ସେହିପରି କୁଳପିତ ମନୋନୟନ କମିଟିରେ ପୂନର୍ଗଠନ କରି ସିଣ୍ଡିକେଟ ପରିବର୍ତ୍ତେ ରାଜ୍ୟ ସରକାଙ୍କ ଜଣେ ଶିକ୍ଷାବିତ ପ୍ରତିନଧିଙ୍କୁ ସଦସ୍ୟ ଭାବେ ନିଆଯିବ । ଏହାସହ କୁଳପତିଙ୍କ କାର୍ଯ୍ୟକାଳ ୪ ବର୍ଷକୁ ବୃଦ୍ଧି କରିଥିବା ବେଳେ ଅବସର ବୟସ ସୀମା ୬୫ରୁ ୬୭ ବର୍ଷକୁ ବୃଦ୍ଧି କରାଯାଇଛି । ସେହିପରି ପଞ୍ଜିକୃତ ଶିକ୍ଷକ ଓ ପଞ୍ଜିକୃତ ସ୍ନାତକ ବ୍ୟବସ୍ଥା ବନ୍ଦ କରିବା ସହ ଶକ୍ଷକ ମନୋନୟନ ଓ ଅଣ ଶିକ୍ଷକ ନିଯୁକ୍ତି ନିମନ୍ତେ ଓ.ପି.ଏସ୍.ସି ଓ ଓ.ଏସ୍.ସିକୁ ଦାୟିତ୍ବ ଦିଆଯିବ ବୋଲି କୁହାଯାଇଛି । ତେବେ ଏହା କରି ଯୁଜିସି ମାର୍ଗଦର୍ଶିକାର ଉଲ୍ଲଂଘନ କରିବା ସହ କୁଳାଧିପତି ବା ରାଜ୍ୟପାଳଙ୍କ କ୍ଷମତା ହ୍ରାସ କରିାଯାଉଥିବା ଅଭିଯୋଗ ହୋଇଛି । ତେବେ ନିଯୁକ୍ତ ପ୍ରକ୍ରିୟାରେ ସ୍ବଚ୍ଛତା ଅଲମ୍ବନ କରିବାକୁ ଶିକ୍ଷାବିତ କହିଛନ୍ତି ।

ଏହାସହ ଆଉ ଏକ ବିଶ୍ବବିଦ୍ୟାଳୟ ସଂଖ୍ୟା ବୃଦ୍ଧି ହେଉଥିବାରୁ ବାର୍ଷିକ ରିପୋର୍ଟ ଅଧିକ ପୃଷ୍ଠା ହେଉଛି । ଏହାକୁ ରାଜ୍ୟ ବିଧାନସଭାରେ ଉପସ୍ଥାପନା କଷ୍ଟ ହେଉଥିବାରୁ ବାର୍ଷିକ ସମୀକ୍ଷା ରିପୋର୍ଟ ନିଜ ନିଜ ୱେବସାଇଟରେ  ଅପଲୋଡ୍ କରି ତିନି ବର୍ଷ ପର୍ଯ୍ୟନ୍ତ ରଖିବେ ବୋଲି କୁହାଯାଇଛି । ତେବେ ଏସବୁ ସଂସ୍କାର କେତେ ଦୂର ଫଳପ୍ରଦ ହେଉଛି ତାହା ଆଗାମୀ ଦିନ ରେ ଜଣାପଡିବ ।