'ପ୍ଲାଜମା ଥେରାପି ପାଇଁ ଭିତ୍ତିଭୂମି ନାହିଁ, ମନ୍ତ୍ରୀମାନେ ଯାଇ କରିବେ କ'ଣ ?'

ମଳୟ ରଞ୍ଜନ ମହାନ୍ତି, ଭୁବନେଶ୍ୱର: ମନ୍ତ୍ରୀଙ୍କୁ କୋରୋନା ମୁକାବିଲାରେ ସାମିଲ କରାଯିବା ପ୍ରସଙ୍ଗ । ଏହାକୁ ରାଜନୀତି ବୋଲି କହିଲା ବିଜେପି । କୋରୋନା ଭଳି ମହାମାରୀର ମୁକାବିଲା ପାଇଁ ସବୁ ଦଳ ଏକ ହୋଇ ସରକାରଙ୍କୁ ସହଯୋଗ କରୁଥିବା ବେଳେ କେବଳ ମନ୍ତ୍ରୀଙ୍କୁ ଦାଇତ୍ୱ ଦେବା ଅନୁଚିତ ବୋଲି କହିଲେ ବିରୋଧୀ ଦଳ ନେତା ପ୍ରଦୀପ୍ତ ନାଏକ । ଏପରିକି ପ୍ଲାଜମା ଥେରାପି ପାଇଁ ସବୁ ସ୍ଥାନରେ ଭିତ୍ତିଭୂମି ପ୍ରସ୍ତୁତ ନାହିଁ । ତେଣୁ ମନ୍ତ୍ରୀମାନେ ଯାଇ କ'ଣ କରିବେ ବୋଲି ପ୍ରଶ୍ନ କରିଛନ୍ତି ବିରୋଧୀ ଦଳ ନେତା । ଏହାକୁ ଏକ ପ୍ରାୟୋଜିତ ରାଜନୈତିକ ପଦକ୍ଷେପ ବୋଲି ସେ କହିଛନ୍ତି । 

ସେପଟେ ଏନେଇ କଂଗ୍ରେସ ମଧ୍ୟ ପ୍ରତିକ୍ରିୟା ରଖିଛି । ଦଳର ବରିଷ୍ଠ ବିଧାୟକ ସୁର ରାଉତରାୟ କହିଛନ୍ତି, ବାରମ୍ବାର ଦାବି କଲା ପରେ ଏବେ ଦାଇତ୍ୱ ଦେଇଛନ୍ତି । ସଂକ୍ରମଣ ସଂଖ୍ୟା ଅହେତୁକ ଭାବେ ବଢ଼ିବା ପରେ ଚେତା ପଶିଲା । ରାଜନେତାଙ୍କୁ ନ ଧରିଲେ କିଛି ହେବ ନାହିଁ ବୋଲି ପୂର୍ବରୁ କହିଥିଲି । ମନ୍ତ୍ରୀମାନଙ୍କୁ ଆଗରୁ ଦାଇତ୍ୱ ଦେବାର ଥିଲା । ତାହା ସହ ସରପଞ୍ଚଙ୍କୁ ଯେମିତି ଦାଇତ୍ୱ ଦିଆଯାଇଛି ସେହିପରି ବିଧାୟକଙ୍କୁ ଦାଇତ୍ୱ ଦେବା ଉଚ୍ଚିତ ବୋଲି କହିଛନ୍ତି ସୁର । 

ସେ ଆହୁରି ମଧ୍ୟ କହିଛନ୍ତି, ଏବେ ମୁଖ୍ୟମନ୍ତ୍ରୀଙ୍କ ନିଦ ଭାଙ୍ଗିଛି । କିନ୍ତୁ କେବଳ ମନ୍ତ୍ରୀଙ୍କୁ ସାମିଲ କଲେ ହେବନାହିଁ, ବିଧାୟକଙ୍କୁ ମଧ୍ୟ ସାମିଲ କରନ୍ତୁ ବୋଲି ସୁର ରାଉତରାୟ ଦାବି କରିଛନ୍ତି ।