ରାଜ୍ୟର ୪ ପ୍ରମୁଖ ଚିକିତ୍ସା ଅନୁଷ୍ଠାନରେ ଆରମ୍ଭ ହେବ ପ୍ଲାଜମା ଥେରାପି

ଯଯାତି ମହାନ୍ତି, ଭୁବନେଶ୍ୱର: କୋରୋନାରୁ ସୁସ୍ଥ ହେଉଥିବା ବ୍ୟକ୍ତିଙ୍କ ରକ୍ତ ପ୍ଲାଜମା ଆଉ ଜଣେ ଗୁରୁତର କୋରୋନା ରୋଗୀଙ୍କ ଜୀବନ ବଂଚାଇପାରିବ । ରାଜ୍ୟର ୪ ପ୍ରମୁଖ ଚିକିତ୍ସା ଅନୁଷ୍ଠାନରେ ପ୍ରାଥମିକ ପର୍ଯ୍ୟାୟରେ ଏହାକୁ ଆରମ୍ଭ କରାଯିବ । ଅଗଷ୍ଟ ମାସ ପରେ ଏହି ସୁବିଧା ରୋଗୀଙ୍କୁ ମିଳିବ । ରାଜ୍ୟ ସରକାରଙ୍କ ଏହି ନିଷ୍ପତ୍ତି ପରେ କୋରୋନା ସଂକ୍ରମିତଙ୍କ ମନରେ ଏକ ନୂଆ ଆଶା ସଂଚାର ହୋଇଛି । କଟକର ଏସସିବିରେ ପ୍ଲାଜମା ବ୍ୟାଙ୍କ ପ୍ରତିଷ୍ଠା କରିବାକୁ ସରକାର ସ୍ଥିର କରିଛନ୍ତି । ତେବେ ପ୍ଲାଜମା ଥେରାପି କ’ଣ, ଏହା କିପରି କାର୍ଯ୍ୟକାରୀ କରାଯିବ, ଏଥିପାଇଁ କେଉଁମାନେ କାମରେ ଲାଗିବେ? ଏ ବିଷୟରେ ଅଧିକ ସୂଚନା ଦେଇଛନ୍ତି ବରିଷ୍ଠ ଡ଼ାକ୍ତର ଅଶୋକ ମହାପାତ୍ର । ଏହା ସହ ଦୈନିକ ୬ ହଜାର କୋଭିଡ ଟେଷ୍ଟ ପାଇଁ ସରକାର ଟାର୍ଗେଟ ଦେଇଛନ୍ତି । ଜିଲ୍ଲା ସ୍ତରରେ ମଧ୍ୟ ପରୀକ୍ଷା କେନ୍ଦ୍ର କରାଯିବ । ବ୍ୟାପକ ଭାବେ ଆଂଟିଜେନ୍ ଓ ଆଂଟିବଡ଼ି ପରୀକ୍ଷା କରାଯିବ ବୋଲି ମୁଖ୍ୟ ଶାସନ ସଚବିଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ନିଷ୍ପତି ହୋଇଛି ।

ମଣିଷ ରକ୍ତରେ କମ୍ ଗୁରୁତ୍ୱ ବହନ କରୁଥିବା ଅଂଶ ବିଶେଷ ହେଉଛି ପ୍ଲାଜମା । ରକ୍ତରେ ଥିବା ହ୍ୱାଇଟ ବ୍ଲଡ଼ ସେଲ୍, ରେଡ଼୍ ବ୍ଲଡ଼ ସେଲ୍ ଏବଂ ପ୍ଲେଟଲେଟକୁ ଛାଡ଼ିଲେ । ମୋଟ ରକ୍ତର ୫୫ ପ୍ରତିଶତ ହେଉଛି ବ୍ଲଡ଼ ପ୍ଲାଜମା । ଏଥିରେ ମୁଖ୍ୟତଃ ମଣିଷ ଶରୀରର ନ୍ୟୁଟ୍ରିଏଂଟ, ହରମୋନ୍ ଏବଂ ପ୍ରୋଟିନ୍ ହିଁ ଥାଏ । ଏହା ଗୁରୁତର ରୋଗର ଚିକିତ୍ସା କାମରେ ଲାଗିଥାଏ । କୋରୋନାରୁ ସୁସ୍ଥ ହେଉଥିବା ବ୍ୟକ୍ତିଙ୍କ ରକ୍ତ ପ୍ଲାଜମା ଆଉ ଜଣେ ଗୁରୁତର କୋରୋନା ରୋଗୀଙ୍କ ଜୀବନ ବଂଚାଇବା କାମରେ ଲଗାଇବାକୁ ସରକାର ନିଷ୍ପତ୍ତି ନେଇଛନ୍ତି । ବାସ୍ତବରେ ଏହି ଚିକିତ୍ସ କ’ଣ? ଏହା କିପରି କାର୍ଯ୍ୟକାରୀ କରିବ? ଏସବୁ ବାବଦରେ ରାଜ୍ୟର ବିଶିଷ୍ଟ ଡ଼ାକ୍ତର ଅଶୋକ ମହାପାତ୍ର କ’ଣ କହୁଛନ୍ତି ଶୁଣନ୍ତୁ ।

ପ୍ଲାଜମା ଥେରାପି ଅଗଷ୍ଟ ମାସ ପରେ ରାଜ୍ୟରେ ଆରମ୍ଭ ହେବାକୁ ଥିବା ବେଳେ ଏଣିକି ଦୈନିକ ୬ ହଜାର କୋଭିଡ ଟେଷ୍ଟ କରିବାକୁ ନିଷ୍ପତ୍ତି ହୋଇଛି । ପୂର୍ବ ନିର୍ଦ୍ଧାରିତ ପରୀକ୍ଷା କେନ୍ଦ୍ର ସହିତ କିଛି ପ୍ରମୁଖ ଜିଲ୍ଲାରେ ମଧ୍ୟ କୋଭିଡ ପରୀକ୍ଷା କରିବାକୁ ସ୍ଥିର ହୋଇଛି । ଲୋକସେବା ଭବନରେ ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ବସିଥିବା ବୈଠକରେ ଏହି ନିଷ୍ପତ୍ତି ହୋଇଛି । ବ୍ୟାପକ ପରିମାଣର ଆଂଟିଜେନ୍ ଓ ଆଂଟିବଡ଼ି ପରୀକ୍ଷା କରିବାକୁ ମଧ୍ୟ ବୈଠକରେ ନିଷ୍ପତ୍ତି ହୋଇଛି । ରକ୍ତ ପରୀକ୍ଷା ସହିତ ପ୍ଳାଜମା ବ୍ୟାଙ୍କ ପ୍ରତିଷ୍ଠା ପରେ ପ୍ଲାଜମା ଟେଷ୍ଟ କରାଯିବ ବୋଲି ଆଏଲଏସ୍ ନିର୍ଦ୍ଦେଶକ ସୂଚନା ଦେଇଛନ୍ତି ।

କୋରୋନା ନିୟନ୍ତ୍ରଣ ପାଇଁ ରାଜ୍ୟ ସରକାର ଗୋଟିଏ ପରେ ଗୋଟିଏ ପଦକ୍ଷେପ ନେଉଛନ୍ତି । ପ୍ଲାଜମା ଥେରାପି ସାଙ୍ଗକୁ କୋରୋନା ଟୀକା ପରୀକ୍ଷଣ ମଧ୍ୟ ଓଡ଼ିଶାର ସମ୍ ହସ୍ପିଟାଲରେ କରାଯିବ ।