ଶନିବାର ବାହାରିବ କଳା ପରୀକ୍ଷା ଫଳ, ଧନ୍ଦାମୂଳକ ପରୀକ୍ଷାର ଫଳ କେବେ ?

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ଆସନ୍ତା ୫ ତାରିଖରେ ପ୍ରକାଶ ପାଇବ ଯୁକ୍ତ ଦୁଇ କଳା (Plus Two Arts Result) ଫଳାଫଳ, ହେଲେ ଧନ୍ଦାମୂଳକ (Vocational Education) କେବେ ? କୋରୋନା କାଳରେ ସର୍ବାଧିକ ପ୍ରଭାବିତ ହୋଇଛି ଛାତ୍ରଛାତ୍ରୀଙ୍କ ଭବିଷ୍ୟତ । ଦିନ ପରେ ଦିନ ଗଡୁଥିବା ବେଳେ ନା ଶିକ୍ଷାନୁଷ୍ଠାନ ଖୋଲିପାରୁଛି ନା ସ୍ୱାଭାବିକ ହେଉଛି ପାଠପଢା । ଆଉ ଏସବୁ ଭିତରେ ବଡ କଥା ହେଲା ପରୀକ୍ଷା ଦେଇ ଫଳାଫଳ ଅପେକ୍ଷାରେ ଥିବା ଛାତ୍ରଛାତ୍ରୀଙ୍କ ଭବିଷ୍ୟତ । ଫଳାଫଳ ବାହାରିଲେ ପରବର୍ତ୍ତି ପାଠ୍ୟକ୍ରମ ପାଇଁ ପ୍ରସ୍ତୁତି କରିବେ, ହେଲେ ଏସବୁ ପ୍ରଶ୍ନରୁ ହଟୁନି ପରଦା । ମହାମାରୀ କୋରୋନା ଭିତରେ ପର୍ଯ୍ୟାୟକ୍ରମେ ବିଜ୍ଞାନ, ବାଣିଜ୍ୟ ଫଳାଫଳ ପ୍ରକାଶ ପାଇଥିବା ବେଳେ ଆସନ୍ତା ୫ ତାରିଖରେ କଳା ବିଭାଗ ଫଳ ପ୍ରକାଶ କରିବା ନେଇ ଗଣଶିକ୍ଷା ମନ୍ତ୍ରୀ ଘୋଷଣା କରିଛନ୍ତି । କିନ୍ତୁ ଧନ୍ଦାମୂଳକ ପରୀକ୍ଷାର ଫଳାଫଳ ନେଇ କୌଣସି ସ୍ପଷ୍ଟ ସୂଚନା ଦେଇନାହାନ୍ତି ।

ସେପଟେ ଫଳାଫଳ ପ୍ରକାଶକୁ ନେଇ ବଢୁଛି ଦ୍ୱନ୍ଦ୍ୱ । ଧନ୍ଦାମୂଳକ ପାଠ୍ୟକ୍ରମ ପାଇଁ ଏକେ ପାତରଅନ୍ତର କାହିଁକି ?  ଯୁକ୍ତ ବିଜ୍ଞାନ ପରେ ବାଣିଜ୍ୟ ଫଳାଫଳ ପ୍ରକାଶ ପରେ ଆଉ ଆସନ୍ତା ୫ ତାରିଖ ଶନିବାର ପ୍ରକାଶ ପାଇବାକୁ ଯାଉଛି ସର୍ବାଧିକ ଛାତ୍ରଛାତ୍ରୀ ପରୀକ୍ଷା ଦେଇଥିବା କଳା ବିଭାଗ ଫଳାଫଳ । ଉଚ୍ଚ ମାଧ୍ୟମିକ ଶିକ୍ଷା ପରିଷଦ କାର୍ଯ୍ୟାଳୟରେ ଅପରାହ୍ନ ୪ଟା ସମୟରେ ଫଳ ପ୍ରକାଶ କରିବା ନେଇ ଗଣଶିକ୍ଷା ମନ୍ତ୍ରୀ ଘୋଷଣା କରିଛନ୍ତି । ଏହାପରେ ଛାତ୍ରଛାତ୍ରୀମାନେ ପରିଷଦର ୱେବସାଇଟ୍  WWW.ORISSARESULTS.NIC.INରେ ନିଜ ଫଳାଫଳ ଦେଖିପାରିବେ । ଚଳିତ ବର୍ଷ ୨ ଲକ୍ଷରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଯୁକ୍ତ ଦୁଇ କଳା ପରୀକ୍ଷା ଦେଇଛନ୍ତି । ତେବେ ପୂର୍ବରୁ ଅଗଷ୍ଟ ମାସ ଶେଷ ସପ୍ତାହରେ ଫଳାଫଳ ଘୋଷଣା କରିବାକୁ ଥିବା ବେଳେ କୋରୋନା ପାଇଁ ସେପ୍ଟେମ୍ବର ପ୍ରଥମ ସପ୍ତାହକୁ ସ୍ଥଗିତ ରଖିଥିଲେ ମନ୍ତ୍ରୀ ।

ସେପଟେ ହଜାର ହଜାର ଧନ୍ଦାମୂଳକ ଛାତ୍ରଛାତ୍ରୀ ସେମାନଙ୍କ ଫଳାଫଳ ପ୍ରକାଶକୁ ନେଇ ଏବେ ଦ୍ୱନ୍ଦ୍ୱରେ । ବିଜ୍ଞାନ ଓ ବାଣିଜ୍ୟ ଫଳାଫଳ ବାହାରିସାରିଥିବା ବେଳେ କଳା ଫଳାଫଳ ତାରିଖ ସ୍ପଷ୍ଟ ହୋଇସାରିଛି । ହେଲେ ଧନ୍ଦାମୂଳକ ପାଠ୍ୟକ୍ରମ ପାଇଁ ଗଣଶିକ୍ଷା ବିଭାଗର ଏପରି ପାତରଅନ୍ତର କାହିଁକି ସେନେଇ ପ୍ରଶ୍ନ କରିଛନ୍ତି ଛାତ୍ରଛାତ୍ରୀ । ଚଳିତ ବର୍ଷ ୭ ହଜାରରୁ ଊର୍ଦ୍ଧ୍ୱ ଛାତ୍ରଛାତ୍ରୀ ଧନ୍ଦାମୂଳକ ପରୀକ୍ଷା ଦେଇଥିବା ବେଳେ ଫଳାଫଳ ପ୍ରକାଶ ହେଉନଥିବାରୁ ଉଚ୍ଚତର ପାଠ୍ୟକ୍ରମ ଆବେଦନରେ ସମସ୍ୟା ହେଉଥିବା କହିଛନ୍ତି ।

ତେବେ ସେପ୍ଟେମ୍ବର ପ୍ରଥମ ସପ୍ତାହରେ କଳା ଓ ଧନ୍ଦାମୂଳକ ଫଳାଫଳ ବାହାର କରିବା ନେଇ ମନ୍ତ୍ରୀ ଘୋଷଣା କରିଥିବା ବେଳେ ଧନ୍ଦାମୂଳକ ପାଠ୍ୟକ୍ରମର ଫଳାଫଳ ନିର୍ଦ୍ଧିଷ୍ଟ ଭାବେ କେବେ ବାହାରୁଛି ତାହା ଚଳିତ ସପ୍ତାହରେ ଜଣାପଡିବ ।