ମୁଖ୍ୟମନ୍ତ୍ରୀ ରିଲିଫ ପାଣ୍ଠିକୁ ୫୦,୦୦୦ ଟଙ୍କା ଦାନ କଲେ ରାଣୀ ପଣ୍ଡା

ଭୁବନେଶ୍ୱର: କୋରୋନା ମୁକାବିଲା ପାଇଁ ସାହାଯ୍ୟର ହାତ ବଢାଇଲେ ଅଭିନେତ୍ରୀ ରାଣୀ ପଣ୍ଡା । ଆଜି ଅର୍ଥାତ ଶୁକ୍ରବାର ମୁଖ୍ୟମନ୍ତ୍ରୀଙ୍କ ରିଲିଫ ଫାଣ୍ଠିକୁ ୫୦,୦୦୦ ଟଙ୍କା ଦାନ କଲେ ସେ । ଏହା ପୂର୍ବରୁ ଆଜି ଅର୍ଥାତ ଶୁକ୍ରବାର କେନ୍ଦ୍ରାପଡ଼ା ସାଂସଦ ତଥା ଅଭିନେତା ଅନୁଭବ ମହାନ୍ତି ସାଂସଦ ପାଣ୍ଠିରୁ ୧.୦୫ କୋଟି ଟଙ୍କା ସହାୟତା ରାଶି ପ୍ରଦାନ କରିଛନ୍ତି । କେନ୍ଦ୍ରାପଡ଼ା ପାଇଁ ୭୫ ଲକ୍ଷ ଓ କଟକ ପାଇଁ ୩୦ ଲକ୍ଷ ଟଙ୍କାର ସହାୟତା ରାଶି ପ୍ରଦାନ କରିଛନ୍ତି ସେ । ଯାହାକୁ ନେଇ ସେ ଟ୍ୱିଟ କରି ଜଣାଇଛନ୍ତି ।

ଅନୁଭବ ଟ୍ୱିଟ କରି କହିଛନ୍ତି ଯେ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଅନୁପ୍ରାଣିତ ହୋଇ କୋରୋନାରୁ ଓଡ଼ିଶାବାସୀଙ୍କୁ ରକ୍ଷା କରିବା ପାଇଁ ପରୀକ୍ଷଣ,ସ୍କ୍ରିନିଂ ଓ ଅନ୍ୟାନ୍ୟ ସୁବିଧା ଦେବା ପାଇଁ ମୋ ସାଂସଦ ପାଣ୍ଠିରୁ ମୋ ସଂସଦୀୟକ୍ଷେତ୍ରକୁ ୧.୦୫ କୋଟି(କେନ୍ଦ୍ରାପଡା ପାଇଁ ୭୫ ଓ କଟକ ପାଇଁ ୩୦ ଲକ୍ଷ)ଦେବା ନିମନ୍ତେ କେନ୍ଦ୍ରାପଡା ଜିଲ୍ଲାପାଳଙ୍କୁ ଲେଖିଛି ।

ବର୍ତ୍ତମାନ ସମୟରେ କୋରୋନା ଭୂତାଣୁ ସଙ୍କଟକୁ ଦୃଷ୍ଟିରେ ରଖି ସାରା ଦେଶରେ ୨୧ ଦିନ ପାଇଁ ଲକ୍ ଡାଉନ କରାଯାଇଛି । ଫଳରେ ଏହି ବିପତ୍ତି ସମୟରେ ସମସ୍ତ ବ୍ୟକ୍ତି ଅସହାୟଙ୍କ ସହାୟତା ପାଇଁ ସାହାଯ୍ୟର ହାତ ବଢ଼ାଉଛନ୍ତି ।  ଏହାପୂର୍ବରୁ ପିସିସି ସଭାପତି ୧୦ ଲକ୍ଷ ଟଙ୍କାର ସହାୟତା ରାଶି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ପ୍ରଦାନ କରିଥିଲେ । ସେହିପରି ସମ୍ୱଲପୁରର ପୂର୍ବତନ ବିଧାୟିକା ରାସେଶ୍ୱର ପାଣିଗ୍ରାହୀ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ ୫୦ ହଜାରର ସହାୟତା ରାଶି ପ୍ରଦାନ କରିଛନ୍ତି ।