ଆଜି ମହାପ୍ରଭୁଙ୍କ ବିବାହ ଉତ୍ସବ, ଶ୍ରୀମନ୍ଦିରରେ ବାଜୁଛି ତେଲିଙ୍ଗି ବାଜା

ପୁରୀ: ଆଜି ପବିତ୍ର ରୁକ୍ମଣୀ ହରଣ ଏକାଦଶୀ । ମହାପ୍ରଭୁଙ୍କ ବିବାହ ଉତ୍ସବ । ମହାପ୍ରଭୁ ଶ୍ରୀଜଗନ୍ନାଥ ମାଆ ରୁକ୍ମଣୀଙ୍କୁ ବିବାହ କରିବେ । ଶ୍ରୀମନ୍ଦିର ଚାରିଦ୍ୱାରରେ ଭୋରରୁ ବାଜୁଛି ତେଲିଙ୍ଗି ବାଜା । ଆଜି ଜଗତ ବ୍ରହ୍ମାଣ୍ଡନାଥ ଶ୍ରୀଜଗନ୍ନାଥଙ୍କ ବିବାହ ଉତ୍ସବ ହୋଇଥିବାରୁ ଭୋର ୨ଟା ୩୭ ମିନିଟରେ ଭିତରଚ୍ଛୁ ମହାପାତ୍ରଙ୍କ ଦ୍ୱାରା ଦ୍ୱାରଫିଟା ନୀତି ଅନୁଷ୍ଠିତ ହୋଇଛି । ପରେ ନୀତିକାନ୍ତି ଆଗେଇ ଚାଲିଛି । 

ମହାପ୍ରଭୁଙ୍କ ନିକଟରେ ଆଜି ସର୍ବାଧିକ ୪୪ଟି ନୀତି ରହିଛି । ନୀତି ନିର୍ଘଣ୍ଟ ଅନୁସାରେ ମଙ୍ଗଳଆଳତୀ, ମଇଲମ, ଅବକାଶ ଆଦି ନୀତି ବଢ଼ି ଗୋପାଳବଲ୍ଲଭ, ସକାଳ ଧୂପ ବଢିବା ପରେ ମହାଲକ୍ଷ୍ମୀ ଲକ୍ଷ୍ମୀ ମନ୍ଦିରକୁ ବିଜେ କରିଥାନ୍ତି । ସେପଟେ ଶ୍ରୀ ମଦନମୋହନ ଜୟବିଜୟ ଦ୍ୱାରକୁ ବିଜେ କରନ୍ତି । ବଚନିକା ଓ ଅନ୍ୟାନ୍ୟ ନୀତି ବଢ଼ି ଶ୍ରୀମଦନମୋହନ ରଥକୁ ବିଜେ କରିଥାନ୍ତି । ବିମଳାଙ୍କ ମନ୍ଦିରକୁ ମହାଲକ୍ଷ୍ମୀ ଅର୍ଥାତ ଶ୍ରୀଦେବୀ ବିଜେ କରନ୍ତି । ସେହିଠାରେ ରୁକ୍ମଣୀ ହରଣ ନୀତି ସମ୍ପାଦନ ହୋଇଥାଏ । 

ସେଠାରୁ ଶ୍ରୀମଦନମୋହନ ଓ ଶ୍ରୀଦେବୀ ବିବାହ ମଣ୍ଡପକୁ ବିଜେ କରନ୍ତି । ମହାପ୍ରଭୁ ଜଳକ୍ରୀଡାକୁ ବିଜେ କରନ୍ତି । ଜଳକ୍ରୀଡା ପରେ ମଧ୍ୟାନ୍ନ ଧୂପ ହୁଏ । ରାତିରେ ସନ୍ଧ୍ୟା ଧୂପ ପରେ ମହାପ୍ରଭୁଙ୍କ ବିବାହ ନୀତି ଅନୁଷ୍ଠିତ ହୋଇଥାଏ । 

ସେପଟେ ଏହି ନୀତିକୁ ସୂଚାରୁ ରୂପେ ସମ୍ପାଦନ କରିବା ପାଇଁ ଜଗଦଗୁରୁ ଶଙ୍କରାଚାର୍ଯ୍ୟଙ୍କୁ ଭେଟି ପରାମର୍ଶ ନେଇଛନ୍ତି ଶ୍ରୀମନ୍ଦିର ପ୍ରଶାସନ ଓ ସେବାୟତ ପ୍ରତିନିଧି । ସ୍ନାନବେଦୀରେ ପ୍ରଭୁଙ୍କ ଦର୍ଶନ ପାଇଁ ଜଗଦଗୁରୁଙ୍କୁ ଆମନ୍ତ୍ରଣ କରିଛି ଶ୍ରୀମନ୍ଦିର ପ୍ରଶାସନ ।