ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି, ଆସନ୍ତାକାଲି ପୁରୀ ବଡ଼ଦାଣ୍ଡରେ ଗଡ଼ିବ ରଥ

ନୂଆଦିଲ୍ଲୀ: ପୁରୀରେ ଭଗବାନ ଜଗନ୍ନାଥଙ୍କ ରଥଯାତ୍ରାର ଆୟୋଜନ କରିବାର ଶହ ଶହ ବର୍ଷର ପୁରୁଣା ପରମ୍ପରା ଜାରି ରହିବ । କେତେକ ସର୍ତ୍ତ ସହିତ ସୋମବାର ସୁପ୍ରିମକୋର୍ଟ ଏହାକୁ ଅନୁମତି ଦେଇଛନ୍ତି । ଏହା ସହିତ ମଙ୍ଗଳବାର ରଥଯାତ୍ରା ଅନୁଷ୍ଠତ ହେବ ।

ସୋମବାର ସୁପ୍ରିମକୋର୍ଟଙ୍କ ତିନି ଜଣିଆ ବିଚାରପତିଙ୍କ ଖଣ୍ଡପୀଠ ଏହି ମାମଲାର ଶୁଣାଣି କରି କହିଛନ୍ତି ଯେ, ରଥଯାତ୍ରାର ଆୟୋଜନ ମନ୍ଦିର କମିଟି, ରାଜ୍ୟ ତଥା କେନ୍ଦ୍ର ସରକାରଙ୍କ ମଧ୍ୟରେ ପରସ୍ପର ସମନ୍ୱୟ ରକ୍ଷା କରି କରାଯିବ । ଏହି ସମୟ ମଧ୍ୟରେ ସ୍ୱାସ୍ଥ୍ୟ ବିଷୟରେ କୌଣସି ଅଣଦେଖା କରାଯିବ ନାହିଁ । ଏଥି ସହ କୋର୍ଟ କହିଛନ୍ତି ଯେ, ଯଦି ରାଜ୍ୟ ସରକାର ଅନୁଭବ କରୁଛନ୍ତି ଯେ ପରିସ୍ଥିତି ନିୟନ୍ତ୍ରଣ ବାହାରକୁ ଯାଉଛି, ତେବେ ରଥଯାତ୍ରା ବନ୍ଦ କରିପାରିବେ ।

ପ୍ରକୃତରେ ସୁପ୍ରିମକୋର୍ଟଙ୍କ ଗୋଟିଏ ବେଞ୍ଚ ଜୁନ୍ ୧୮ରେ ଶୁଣାଣି କରି ରଥଯାତ୍ରାର ଆୟୋଜନ ଉପରେ ରୋକ ଲଗାଇ ଥିଲେ । ପରବର୍ତ୍ତୀ ସମୟରେ ପୁନର୍ବିଚାର ଆବେଦନ ଶୁଣାଣି ପାଇଁ ପ୍ରଧାନ ବିଚାରପତି ଏସ ୱୋୱଡେ ଏହି ମାମଲାକୁ ତିନି ଜଣିଆ ବିଚାରପତିଙ୍କ ଖଣ୍ଡପୀଠକୁ ହସ୍ତାନ୍ତରିତ କରିଥିଲେ । ପ୍ରଧାନ ବିଚାରପତି ଏହା ସ୍ପଷ୍ଟ କରିଛନ୍ତି ଯେ, ସୁପ୍ରିମକୋର୍ଟ କେବଳ ପୁରୀର ରଥଯାତ୍ରା ଉପରେ ଶୁଣାଣି କରିବ । 

Add Zee News as a Preferred Source

ଏହାପୂର୍ବରୁ ଆଜି ସୁପ୍ରିମକୋର୍ଟରେ ପୁରୀ ରଥଯାତ୍ରା ମାମଲା ସମ୍ପର୍କରେ କେନ୍ଦ୍ର କହିଛି ଯେ, ଲୋକଙ୍କ ଅଂଶଗ୍ରହଣ ବିନା ଏହାକୁ ଆୟୋଜନ କରିବାକୁ ଅନୁମତି ଦିଆଯାଇପାରିବ । କିଛି ପ୍ରତିବନ୍ଧକ ସହିତ ପୁରୀ ରଥ ଯାତ୍ରା ଆୟୋଜନ କରିବାକୁ ସୁପ୍ରିମକୋର୍ଟଙ୍କ ମତକୁ ଓଡିଶା ସରକାର ସମର୍ଥନ କରିଛନ୍ତି ।