ରଥଯାତ୍ରାକୁ ନେଇ ସୁପ୍ରିମକୋର୍ଟଙ୍କ ରାୟକୁ ସ୍ୱାଗତ କଲା ଭୁବନେଶ୍ୱରର ଇସ୍କନ ମନ୍ଦିର

ଶାନ୍ତସ୍ୱରୂପ ରାଉତ, ଭୁବନେଶ୍ୱର: ହେବନି ରଥଯାତ୍ରା । ଗଡିବନି ରଥ । ସୁପ୍ରିମକୋର୍ଟଙ୍କ ସୁପ୍ରିମ ରାୟ ପରେ ଏବେ ଶ୍ରୀମନ୍ଦିର ସମେତ ରାଜ୍ୟର ସମସ୍ତ ଜଗନ୍ନାଥ ମନ୍ଦିରରେ ଚଳିତ ରଥଯାତ୍ରା ପର୍ବକୁ ବନ୍ଦ ରଖାଯାଇଛି । ବିଶେଷ କରି ରାଜଧାନୀ ଭୁବନେଶ୍ୱରରେ ପ୍ରସିଦ୍ଧ ଇସ୍କନ ମନ୍ଦିର ସମେତ ଅନ୍ୟାନ୍ୟ ଜଗନ୍ନାଥ ମନ୍ଦିର ଗୁଡିକରେ ସୁପ୍ରିମକୋର୍ଟଙ୍କ ରାୟକୁ ସ୍ବାଗତ କରିବା ସହ ରଥଯାତ୍ରା ବନ୍ଦ କରିବାକୁ ନିଷ୍ପତ୍ତି ନେଇଛନ୍ତି । ତେବେ କେବଳ ବିଦ୍ଧି ମୁତାବକ ପରମ୍ପରା ରକ୍ଷା କରିବା ପାଇଁ ସ୍ବତନ୍ତ୍ର ସିଂହାସନରେ ଭିତରେ ସମସ୍ତ ରୀତିନୀତି ସମ୍ପନ କରିବାକୁ ଧାର୍ଯ୍ୟ କରାଯାଇଛି ।

ଖାଁ ଖାଁ ରଥଖଳା, ଶୂନଶାନ୍ ମନ୍ଦିର । ଗଡିବନି ରଥ କି ହେବନି ଯାତ । ବିନା ରଥ ଓ ବିନା ଭକ୍ତରେ ସଂପନ୍ନ ହେବ ଚଳିତ ଘୋଷଯାତ୍ରା । ସୁପ୍ରିମକୋର୍ଟଙ୍କ ରାୟ ପରେ ସମସ୍ତ ଜଗନ୍ନାଥ ପ୍ରେମୀ ହତବାକ୍ । ଆଉ ତାକୁ ଅନୁପାଳନ କରି ମନ୍ଦିର ଗୁଡିକରେ ରଥଯାତ୍ରା ନ କରିବାକୁ ନିଷ୍ପତ୍ତି ନିଆଯାଇଛି । ଭୁବନେଶ୍ବର ପ୍ରସିଦ୍ଧ ଇସ୍କନ ମନ୍ଦିରରେ ଚଳିତ ବର୍ଷ ଲକଡାଉନ ହେତୁ ରଥ ତିଆରି ହୋଇନଥିବା ବେଳେ ସୁପ୍ରିମକୋର୍ଟଙ୍କ ରାୟ ପରେ ଏବେ ରଥଯାତ୍ରା ନ କରିବାକୁ ନିଷ୍ପତ୍ତି ନିଆଯାଇଛି । ତେବେ ପ୍ରଭୁ ବର୍ତ୍ତମାନ ଅଣସର ଘରେ ଥିବା ବେଳେ ଗୁଣ୍ଡିଚା ଦିନ ପ୍ରଭୁଙ୍କୁ ରତ୍ନ ବେଦୀକୁ ନ ନେଇ ସ୍ବତନ୍ତ୍ର ସିହାଂସନରେ ସମସ୍ତ ନୀତିକାନ୍ତି କରାଯିବ ବୋଲି ପ୍ରସ୍ତୁତି କରାଯାଇଥିବା ଏହାର ରାଜ୍ୟ ମୁଖ୍ୟ ପ୍ରଚାରକ କହିଛନ୍ତି ।

ସେପଟେ ରାଜଧାନୀର ବିଭିନ୍ନ ଛୋଟବଡ ଜଗନ୍ନାଥ ମନ୍ଦିରରେ ବନ୍ଦ ରହିବ ଯାତ୍ରା । ପଟିଆ ଗଡ ଜଗନ୍ନାଥ ମନ୍ଦିର ହେଉ ଅବା ଶୌଳଶ୍ରୀ ବିହାର ଏବଂ ଆରସିଏମ ଓ ଜାଗମରା ଜଗନ୍ନାଥ ମନ୍ଦିର ସବୁଠି ସ୍ଥଗିତ ରହିବ ଚଳିତ ରଥଯାତ୍ରା । କୋରୋନା କଟକଣା ହେତୁ ଭକ୍ତମାନଙ୍କୁ ମନ୍ଦିର ପ୍ରବେଶ ମନା ହେତୁ କେବଳ ନିର୍ଦ୍ଧିଷ୍ଟ ସଂଖ୍ୟକ ପୂଜକ ସେବାୟତ ମାନଙ୍କୁ ନେଇ ମନ୍ଦିର ଭିତରେ ୯ ଦିନ ଧରି ସ୍ବତନ୍ତ୍ର ରୀତିନୀତି ହେବ ବୋଲି ପୂଜକ କହିଛନ୍ତି ।

ଭକ୍ତ ଓ ଭଗବାନ ମଧ୍ୟରେ ଆରମ୍ଭରୁ ହିଁ କୋରୋନା ବାଡ ସୃଷ୍ଟି କରିଥିବା ବେଳେ ଏବେ ବିନା ରଥଯାତ୍ରାରେ ଭକ୍ତଙ୍କ ଦୁଃଖ ଦ୍ବିଗୁଣିତ ହୋଇଯାଇଛି । ହେଲେ ସବୁକିଛି ଆଳରେ ରୋଗ ପାଇଁ ବଳି ପଡିଛି ପରଂପରା ।