ଆଦିବାସୀ ଦିବ୍ୟାଙ୍ଗ ନାବାଳିକା ସହ ଦୁଷ୍କର୍ମ, ଅଭିଯୁକ୍ତ ଯୁବକ ଗିରଫ

ସମ୍ବଲପୁର: ଦୁଷ୍କର୍ମ ପରି ଘୃଣ୍ୟ ଘଟଣା ଦିନକୁ ଦିନ ବଢ଼ି ଚାଲିଛି । ପ୍ରାୟ ଦିନ ଦୁଷ୍କର୍ମ ଘଟଣା ସାମ୍ନାକୁ ଆସିଛି । ସମ୍ୱଲପୁର ଅଇଁଠାପାଲି ଥାନା ଅଞ୍ଚଳରେ ଏକ ଦୁଷ୍କର୍ମ ଘଟଣା ସାମ୍ନାକୁ ଆସିଛି । ଏଠାରେ ଜଣେ ଆଦିବାସୀ ଦିବ୍ୟାଙ୍ଗ ନାବାଳିକା ସହ ଦୁଷ୍କର୍ମ ହୋଇଥିବା ଅଭିଯୋଗ ହୋଇଛି । ଘଟଣାଟି ମେ ୨୯ ତାରିଖରେ ଘଟିଥିଲେ ମଧ୍ୟ ପ୍ରଘଟ ହୋଇନଥିଲା । ତେବେ ଏହି ଘଟଣାଟି ବୁଧବାର ପ୍ରଘଟ ହୋଇଛି ।

ମିଳିଥିବା ସୂଚନା ଅନୁସାରେ, ଦିବ୍ୟାଙ୍ଗ ନାବାଳିକାଙ୍କ ମା' ୨୯ ତାରିଖ ସକାଳ ୫ଟା ସମୟରେ ଘର ବାହାର ପଟୁ ତାଲା ପକାଇ ଶୌଚ ହେବାକୁ ଯାଇଥିଲେ । ଏହି ସମୟରେ ଘର ପାଖର ଜଣେ ଯୁବକ ଏହି ଅବସରର ଫାଇଦା ନେଇ ଘରର ତାଲା ଭାଙ୍ଗି ଦୁଷ୍କର୍ମ କରିଥିବାର ଅଇଁଠାପାଲି ଥାନାରେ ଅଭିଯୋଗ ହୋଇଛି । ଥାନାରେ ହୋଇଥିବା ଲିଖିତ ଅଭିଯୋଗ ଅନୁସାରେ ନିଜେ ପୀଡ଼ିତାଙ୍କ ମାଆ ସେଦିନ ଶୌଚ କରି ଘରକୁ ଫେରିବା ସମୟରେ ତାଙ୍କ ଘରର ତାଲା ଭାଙ୍ଗି ଜଣେ ଯୁବକ ତାଙ୍କ ନାବାଳିକା ଝିଅ ସହ ଅତ୍ୟାଚାର କରିଥିବା ଦେଖିଥିଲେ । ପୀଡ଼ିତାଙ୍କ ମାଆ ଦୁଷ୍କର୍ମକାରୀ ଯୁବକଙ୍କୁ କାବୁ କରି ଧରିବାକୁ ଚେଷ୍ଟା କରିଥିଲେ ମଧ୍ୟ ସେ ଫେରାର ହୋଇଯାଇଥିଲା ବୋଲି ଏତଲାରେ ଲେଖିଛନ୍ତି । ଅଇଁଠାପାଲି ପୋଲିସ ଅଭିଯୁକ୍ତ ଯୁବକକୁ ଗିରଫ କରି କୋର୍ଟ ଚାଲାଣ କରିଥିବାର ସୂଚନା ମିଳିଛି ।