ବିଶ୍ୱବ୍ୟାପୀ କୋରୋନା ଆକ୍ରାନ୍ତଙ୍କ ସଂଖ୍ୟା ୪୦ ଲକ୍ଷ ଟପିଲା

ନୂଆଦିଲ୍ଲୀ: ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ୬୦ ହଜାର ଛୁଇଁବାକୁ ବସିଲାଣି । ସେହିପରି ମୃତ୍ୟୁ ସଂଖ୍ୟା ୨ ହଜାରର ନିକଟତର ହୋଇଛି । ଗତ ୨୪ ଘଣ୍ଟା ମଧ୍ୟରେ ୩୩୨୦ଟି ମାମଲା ସାମ୍ନାକୁ ଆସିଛି । ସେହିପରି ୯୫ ଜଣଙ୍କ ମୃତ୍ୟୁ ହୋଇଛି । କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି । 

ଦେଶରେ ଏପର୍ଯ୍ୟନ୍ତ ୫୯୬୬୨ ଜଣ କୋରୋନା ଆକ୍ରାନ୍ତ ଚିହ୍ନଟ ହେଲେଣି । ସେମାନଙ୍କ ମଧ୍ୟରୁ ୧୭୮୪୭ ଜଣ ସୁସ୍ଥ ହୋଇଛନ୍ତି । ୧୯୮୧ ଜଣଙ୍କ ମୃତ୍ୟୁ ହୋଇଛି । ଏବେ ଆଉ ୩୯୮୩୪ଟି ମାମଲା ସକ୍ରିୟ ରହିଛି । ତେବେ ଲଗାତାର ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଥିବା ଦେଖିବାକୁ ମିଳିଛି । ଏବେ ଏହାକୁ ନିୟନ୍ତ୍ରଣକୁ ଆଣିବା ଉଭୟ ରାଜ୍ୟ ଓ କେନ୍ଦ୍ର ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ । 

3320 more #COVID19 cases & 95 deaths reported in last 24 hours. Total number of cases in India rises to 59662, including 39834 active cases, 17847 cured/discharged/migrated, and 1981 deaths: Ministry of Health and Family Welfare pic.twitter.com/y9VX5xLu3l

— ANI (@ANI) May 9, 2020

ଏବେ ନଜର ପକାଇବା ଓଡ଼ିଶାର ସ୍ଥିତି ଉପରେ । ରାଜ୍ୟର ୪ ଜିଲ୍ଲା ଏବେ ରେଡ୍ ଜୋନରେ ରହିଛି । ଏଗୁଡ଼ିକ ହେଲା ଗଞ୍ଜାମ(୮୩), ଯାଜପୁର(୫୫), ଭଦ୍ରକ(୨୫) ଏବଂ ବାଲେଶ୍ୱର(୨୭) । ସେହିପରି ୧୨ ଜିଲ୍ଲା ଅରେଞ୍ଜ ଜୋନରେ ରହିଛି । ସେଗୁଡ଼ିକ ହେଲା ଖୋର୍ଦ୍ଧା(୫୦), ଜଗତସିଂହପୁର(୫), କେନ୍ଦ୍ରାପଡ଼ା(୮), ଢେଙ୍କାନାଳ(୧), କେନ୍ଦୁଝର(୨), ମୟୂରଭଞ୍ଜ(୭), ସୁନ୍ଦରଗଡ଼(୧୩), ଝାରସୁଗୁଡ଼ା(୨), ଦେବଗଡ଼(୧), ବଲାଙ୍ଗୀର(୨), କଳାହାଣ୍ଡି(୨), ଏବଂ କୋରୋପୁଟ(୧) । ଅନ୍ୟ ୧୪ ଜିଲ୍ଲା ଗ୍ରୀନ ଜୋନରେ ରହିଛି । ତେବେ ଗ୍ରୀନ ଜୋନରେ ଥିବା ଜିଲ୍ଲାଗୁଡ଼ିକ ମଧ୍ୟରୁ କେବଳ ଗୋଟିଏ ଜିଲ୍ଲା ପୁରୀରେ ଜଣେ ଆକ୍ରାନ୍ତ ଚିହ୍ନଟ ହୋଇଥିଲେ । ସିଏ ଏବେ ସମ୍ପର୍ଣ୍ଣ ସୁସ୍ଥ ହୋଇସାରିଛନ୍ତି । ଅନ୍ୟ ୧୩ ଜିଲ୍ଲାକୁ ଏବେ କୋରୋନା ପାଖ ମାଡ଼ିପାରିନି । 

ସେହିପରି ଯଦି ବିଶ୍ୱବ୍ୟାପୀ କୋରୋନାର ସ୍ଥିତି ଦେଖିବା, ତେବେ ଆକ୍ରାନ୍ତଙ୍କ ସଂଖ୍ୟା ୪୦ ଲକ୍ଷ ପାର କରିଛି । ଏବେ ଆକ୍ରାନ୍ତଙ୍କ ସଂଖ୍ୟା ୪୦ଲକ୍ଷ ୧୪ ହଜାର ୨୬୫ ଥିବା ରିପୋର୍ଟ କହୁଛି । ଅନ୍ୟପଟେ ମୃତ୍ୟୁ ସଂଖ୍ୟା ୨ଲକ୍ଷ ୭୬ ହଜାର ୨୩୬ ରହିଛି । ଆକ୍ରାନ୍ତଙ୍କ ମଧ୍ୟରୁ ୧୩ ଲକ୍ଷ ୮୫ ହଜାର ୫୫୯ ଜଣ ସୁସ୍ଥ ମଧ୍ୟ ହେଲେଣି । ସର୍ବାଧିକ ଆକ୍ରାନ୍ତ ବିଶ୍ୱର ସବୁଠାରୁ ଶକ୍ତିଶାଳୀ ରାଷ୍ଟ୍ର ଆମେରିକାରେ ଚିହ୍ନଟ ହୋଇଛନ୍ତି । ଆମେରିକାରେ ଆକ୍ରାନ୍ତଙ୍କ ସଂଖ୍ୟା ୧୩ ଲକ୍ଷ ୨୨ ହଜାର ୧୫୪ ରହିଥିବା ବେଳେ ମୃତ୍ୟୁ ସଂଖ୍ୟା ୭୮ହଜାର ୬୧୬ ରହିଛି ।