ରୋଗରେ ମାରିଦିଅ, ଭୋକରେ ନୁହେଁ...

ଦିନ ମଜୁରିଆଙ୍କ ଦୁଃଖ କାହାଣୀ

ରୋଗରେ ମାରିଦିଅ, ଭୋକରେ ନୁହେଁ...
ଫଟୋ ସୌଜନ୍ୟ: ଏଏନଆଇ

ନୂଆଦିଲ୍ଲୀ: କିଲର କୋରୋନନାର ମୁକାବିଲା ପାଇ ସମଗ୍ର ଦେଶକୁ ଲକ୍ ଡାଉନ କରାଯାଇଛି । ହେଲେ ଏହାରି ଯୋଗୁ ବେଶି ପ୍ରଭାବିତ ହେଉଛନ୍ତି ଗାଁରୁ ଆସି ସହରରେ ଗୁଜୁରାଣ ମେଣ୍ଟାଉଥିବା ଦିନ ମଜୁରିଆ । ଦିନର ଅର୍ଥ ଉପର୍ଜିତ ଟଙ୍କାରେ ରାତି ପାଇଁ ସଉଦା କିଣୁଥିବା ଏହି ଗରିବ ମଣିଷଙ୍କ ଦୁଃଖ ଏବେ କହିଲେ ନସରେ । ଶେଷରେ ସହାୟତା ପାଇଁ ଆକୁଳ ନିବେଦନ କରିଛନ୍ତି ଦିଲ୍ଲୀର ଦିନ ମଜୁରିଆ । 

ଘରୁ ବାହାରକୁ ଯିବାକୁ ମନା । ଏପଟେ ଘରେ ଖାଇବା ନାହିଁ । ବାହାରେ ଯଦିଓ ଗ୍ରୋସରି ଦୋକାନ ଖୋଲାରହିଛି, ହେଲେ ହାତରେ ଟଙ୍କା ନାହିଁ । କାମ ନକଲେ ପଇସା ଆସିବ କେଉଁଠୁ ? ପିଲା ଛୁଆ ଛୁଆଙ୍କୁ ନେଇ ଦିଲ୍ଲୀ ସହରରେ କେମିତି ଦିନ କାଟିବାକୁ ହେବ, ଏମାନେ ଜାଣିପାରୁନାହାଁନ୍ତି । ଏପଟେ ଘର ମାଲିକ ଭଡ଼ା ମାଗିଲାଣି । ନା କାମ ମିଳୁଛି ନା କିଛି ବୁଦ୍ଧି ଦିଶୁଛି । ଗାଁକୁ ପଳାଇଲେ ଲୁଣ ଭାତ ଖାଇ ଜୀବନ ବଞ୍ଚାଇହେବ, ହେଲେ କୋରୋନା ଯୋଗୁଁ ଯିବାକୁ ମନା । 

ଦିଲ୍ଲୀ ଫତେପୁରରେ ରହୁଥିବା ଏହି ଦିନ ମଜୁରିଆଙ୍କ କାହାଣୀ ଏବେ ଅତି ଦୟନୀୟ ହୋଇପଡ଼ିଛି । ଏମାନଙ୍କ ମଧ୍ୟରୁ ଗଣମାଧ୍ୟମ ଆଗରେ ଜଣେ ମହିଳା ଆକୁଳ ନିବେଦନ କରି କହିଛନ୍ତି, ଆମକୁ ରୋଗରେ ମାରିଦିଅ, ଭୋକରେ ନୁହେଁ । ଭୋକରେ ମରିବାଠୁ ରୋଗରେ ମରିଯିବା ଶ୍ରେୟସ୍କର । ଏପରିକି ସହାୟତା ପାଇଁ ସରକାରଙ୍କ ପାଖରେ ଆକୁଳ ନିବେଦନ କରିଛନ୍ତି । ଯଦି ତୁରନ୍ତ ଏମାନଙ୍କୁ ସରକାରୀ ସହାୟତା ନମିଳେ, ତେବେ ଏମାନଙ୍କ ଅବସ୍ଥ ଦୟନୀୟ ହୋଇପଡ଼ିବ । ଦେଶର ହିତ ପାଇଁ ଯଦିଓ ଲକ୍ ଡାଉନ ପଦକ୍ଷେପ ସ୍ୱାଗତଯୋଗ୍ୟ, ତେବେ ଦିନରେ କାମ କରି ରାତିରେ ପରିବାରକୁ ଦାନା ଯୋଗାଉଥିବା ଏହି ଦିନ ମଜୁରିଆଙ୍କ ଦୁଃଖକୁ ମଧ୍ୟ ସରକାର ବୁଝିବା ନିହାତୀ ଦରକାର ।