close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ରାଜ୍ୟପାଳଙ୍କୁ ଚାଷୀ ପୁଅଙ୍କ ଚିଠି, ବିଜେପି-ଶିବସେନା ଝଗଡା ସରିବା ଯାଏ ମୋତେ ମୁଖ୍ୟମନ୍ତ୍ରୀ କରିଦିଅ

ମହାରାଷ୍ଟ୍ରରେ କେବେ ଗଠନ ହେବ ସରକାର ? ନେତୃତ୍ୱକୁ ନେଇ ଉଭୟ ବିଜେପି-ଶିବସେନା ଭିତରେ ଛକାପଞ୍ଝା ଯୋଗୁଁ ଏହା ବିଳମ୍ବ ହୋଇଚାଲିଛି । ଆଉ ଏହାରି ଭିତରେ ସରକାର ଗଠନ ହେବା ପର୍ଯ୍ୟନ୍ତ ଅନ୍ତରୀଣ ମୁଖ୍ୟମନ୍ତ୍ରୀ ହେବା ପାଇଁ ଇଚ୍ଛା ପ୍ରକାଶ କରିଛନ୍ତି ଚାଷୀ ପୁଅ ଶ୍ରୀକାନ୍ତ ଭି। ଗଡାଲେ ।

ରାଜ୍ୟପାଳଙ୍କୁ ଚାଷୀ ପୁଅଙ୍କ ଚିଠି, ବିଜେପି-ଶିବସେନା ଝଗଡା ସରିବା ଯାଏ ମୋତେ ମୁଖ୍ୟମନ୍ତ୍ରୀ କରିଦିଅ
ଫଟୋ ସୌଜନ୍ୟ: ସୋସିଆଲ ମିଡିଆ

ନୂଆଦିଲ୍ଲୀ: ମହାରାଷ୍ଟ୍ରରେ କେବେ ଗଠନ ହେବ ସରକାର ? ନେତୃତ୍ୱକୁ ନେଇ ଉଭୟ ବିଜେପି-ଶିବସେନା ଭିତରେ ଛକାପଞ୍ଝା ଯୋଗୁଁ ଏହା ବିଳମ୍ବ ହୋଇଚାଲିଛି । ଆଉ ଏହାରି ଭିତରେ ସରକାର ଗଠନ ହେବା ପର୍ଯ୍ୟନ୍ତ ଅନ୍ତରୀଣ ମୁଖ୍ୟମନ୍ତ୍ରୀ ହେବା ପାଇଁ ଇଚ୍ଛା ପ୍ରକାଶ କରିଛନ୍ତି ଚାଷୀ ପୁଅ ଶ୍ରୀକାନ୍ତ ଭି। ଗଡାଲେ । ଏନେଇ ରାଜ୍ୟପାଳଙ୍କୁ ଚିଠି ମଧ୍ୟ ଲେଖିଛନ୍ତି । ଲଗାଣ ବର୍ଷା ଯୋଗୁଁ ଯେତେବେଳେ ରାଜ୍ୟର କୃଷକ ଘଡିସନ୍ଧି ମୁହୁର୍ତ୍ତ ଦେଇ ଗତି କରୁଛନ୍ତି, ସେତେବେଳେ ଶ୍ରୀକାନ୍ତଙ୍କ ଏ ଚିଠି ବେଶ ଗୁରୁତ୍ୱବହନ କରୁଛି । 

ଗୁରୁବାର ମହାରାଷ୍ଟ୍ର ବିଡ୍ ଜିଲ୍ଲା ଅନ୍ତର୍ଗତ ବଡମୌଲୀର ବାସିନ୍ଦା ଶ୍ରୀକାନ୍ତ ରାଜ୍ୟପାଳଙ୍କ ଉଦ୍ଦେଶ୍ୟରେ ଜିଲ୍ଲାପାଳ କାର୍ଯ୍ୟାଳୟକୁ ଏହି ଚିଠି ଲେଖିଛନ୍ତି । ନିଜ ଚିଠିରେ ସେ କହିବାକୁ ଚାହିଛନ୍ତି, ୨୦୧୯ ବିଧାନସଭା ନିର୍ବାଚନର ଫଳଫଳ ଆସିବା ପରେ ବିଜେପି-ଶିବସେନା ଭିତରେ ନେତୃତ୍ୱକୁ ନେଇ ଛକାପଞ୍ଝା ଚାଲିଛି । ଯେଉଁଥିପାଇଁ ସରକାର ଗଠନରେ ବିଳମ୍ବ ହୋଇଚାଲିଛି । ଅନ୍ୟପଟେ ଲଗାଣ ବର୍ଷା ଯୋଗୁଁ କୃଷକଙ୍କ ଫସଲ ଉଜୁଡି ଯାଇଛି । ଯେଉଁଥିପାଇଁ ସେମାନେ ଚିନ୍ତାରେ ପଡିଛନ୍ତି । ତେଣୁ ରାଜ୍ୟରେ ପରବର୍ତ୍ତୀ ସରକାର ଗଠନ ହେବା ପର୍ଯ୍ୟନ୍ତ ଅନ୍ତରୀଣ ମୁଖ୍ୟମନ୍ତ୍ରୀ ହୋଇ କୃଷକଙ୍କ ଦୁଃଖ ବୁଝିବାକୁ ଇଚ୍ଛାପ୍ରକାଶ କରିଛନ୍ତି ଶ୍ରୀକାନ୍ତ । 

ସେ କହିଛନ୍ତି, "ମୋତେ ଏହି ସୁଯୋଗ ମିଳିବା କଥା । ଯଦି ମୁଁ ଏହି ସୁଯୋଗ ପାଏ, ତେବେ କୃଷକଙ୍କ ସମସ୍ୟାର ସମାଧାନ କରିବି । ସେମାନଙ୍କୁ ନ୍ୟାୟ ଦେବି ।''

ଶ୍ରୀକାନ୍ତଙ୍କ ଏଭଳି ଏକ ଚିଠି ଏବେ ମହାରାଷ୍ଟ୍ର ନେତାଙ୍କୁ ଚେତାଇ ଦେଇଛି । ଯଦିଓ ଗତ ୨୪ ତାରିଖରୁ ନିର୍ବାଚନ ଫଳଫଳ ବାହାରିସାରିଛି, ତଥାପି ମଧ୍ୟ ନେତୃତ୍ୱକୁ ନେଇ ବିଜେପି-ଶିବସେନା କନ୍ଦଳ ସରକାର ଗଠନରେ ବାଧକ ସାଜୁଛି । ଏପଟେ ଲଗାଣ ବର୍ଷାରେ ହନ୍ତସନ୍ତ ହେଉଛନ୍ତି କୃଷକ । ଯେଉଁ ସମୟରେ କୃଷକଙ୍କ କାନ୍ଧରେ କାନ୍ଧ ଦେଇ ଲୋକପ୍ରତିନିଧି ସହାୟତାର ହାତ ବଢାଇବା କଥା, ସେହି ସମୟରେ କ୍ଷମତା ପାଇଁ ରାଜନୀତିରେ ମାତିଛନ୍ତି । ଶ୍ରୀକାନ୍ତଙ୍କ ଏହି ଚିଠି ସେହି ଲୋକ ପ୍ରତିନିଧିଙ୍କ ଦାୟିତ୍ୱବୋଧ ଉପରେ ପ୍ରଶ୍ନଟିଏ ହୋଇ ଛିଡା ହୋଇଛି । ରାଜନୀତିରେ ମାତିଥିବା ନେତାଙ୍କ କବାଟକୁ ଠକ୍ ଠକ୍ କରିଛି । 

ସେପଟେ ଏବେବି ମୁଖ୍ୟମନ୍ତ୍ରୀ ପଦକୁ ନେଇ ବିଜେପି-ଶିବସେନା ଭିତରେ କନ୍ଦଳ ଲାଗି ରହିଛି । ଶିବସେନା ୫୦/୫୦ ଫର୍ମୁଲାରେ ଅଡି ବସିଛି । ହେଲେ ବିଜେପି ଶିବସେନାର ଏହି ଦାବି ପୂରଣ କରିବାକୁ ନାରାଜ । ଉଭୟ ଦଳ ବିକଳ୍ପ ସରକାର କଥା ଚିନ୍ତା କରୁଥିବା କୁହାଯାଉଛି ।