ମୟୂରଭଞ୍ଜରୁ ତେଲ ସରିଯିବା ଘଟଣାରେ କାର୍ଯ୍ୟାନୁଷ୍ଠାନ
ଆମ୍ବୁଲାନ୍ସ ଡ୍ରାଇଭରଙ୍କୁ ନିଲମ୍ବିତ କଲେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ
Trending Photos
ପ୍ରିୟବ୍ରତ ମିଶ୍ର,ମୟୂରଭଞ୍ଜ : ମୟୂରଭଞ୍ଜରୁ ତେଲ ସରିଯିବା ଘଟଣାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଘଟଣାରେ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜିଲ୍ଲା ମୁଖ୍ୟ ଚିକିତ୍ସାଧିକାରୀ, ଆମ୍ବୁଲାନ୍ସ ଡ୍ରାଇଭରଙ୍କୁ ନିଲମ୍ବିତ କରିଛନ୍ତି । ଗତ ୫ ତାରିଖରେ ବାରିପଦା ବାଙ୍ଗିରିପୋଷି ଅଞ୍ଚଳରେ ଏକ ଦୁଃଖଦ ଘଟଣା ଘଟିଥିଲା । ଆମ୍ୱୁଲାନ୍ସରୁ ତେଲ ସରିବଯିବାରୁ, ଗୁରୁତର ଅବସ୍ଥାରେ ରାସ୍ତାରେ ଦୀର୍ଘ ଦେଢ ଘଣ୍ଟାରୁ ଅଧିକ ଅପେକ୍ଷା କରିଥିଲେ ପ୍ରସୂତି । କିନ୍ତୁ ପ୍ରସବ ପୂର୍ବରୁ ହିଁ ଦୁହିଁଙ୍କର ମୃତ୍ୟୁ ହୋଇଥିଲା ।
ଏହି ଘଟଣା ଏବେ ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି । ଡ୍ୟୁଟିରେ ଥିବା ଆମ୍ବୁଲାନ୍ସରୁ କିମିତି ତେଲ ସରିଲା, ତାକୁ ନେଇ ନାନା ଆଡ଼ୁ ପ୍ରଶ୍ନ କରାଯାଉଛି । ସେପଟେ ଏହାକୁ ନେଇ ଆରମ୍ଭ ହୋଇଯାଇଛି ରାଜନୀତି । ରାଜ୍ୟରେ ସ୍ୱାସ୍ଥ୍ୟ ସେବାରେ ଉନ୍ନତି ଆସୁଛି ବୋଲି ସରକାର ଡିଣ୍ଡିମ ପିଟୁଥିବାବେଳେ ଏଭଳି ହୃଦୟବିଦାରକ ଘଟଣାକୁ ନେଇ ସବୁ ରାଜନୈତିକ ଦଳ ସରକାରଙ୍କୁ ଘେରିଛନ୍ତି । ଘଟଣା ପାଇଁ ତଳିଆ ଅଧିକାରୀଙ୍କୁ ଦୋଷ ଦେଇଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ । ବିଜେପି କିନ୍ତୁ ସିଧାସଳଖ ସରକାରଙ୍କୁ ଘେରିଛି । ମୋ ସରକାର କଥା କହି ରାଜ୍ୟ ସରକାର ଡିଣ୍ଡିମ ପିଟୁଥିବାବେଳେ ଏଭଳି ଘଟଣା 'ମୋ ସରକାର' ସଫଳତାକୁ ପ୍ରତିଫଳିତ କରୁଛି କହି କଟାକ୍ଷ କରିଛି ବିଜେପି । କେନ୍ଦ୍ର ସରକାର ଅର୍ଥ ଦେଲେ, ଆମ୍ବୁଲାନ୍ସ ଦେଲେ କିନ୍ତୁ ରାଜ୍ୟ ସରକାର ତେଲ ଦେଇ ପାରୁନାହାନ୍ତି । ଯାହାଫଳେ ଜୀବନ ପଳାଉଛି ବୋଲି ଅଭିଯୋଗ ଉଠାଇଛି ବିଜେପି ।
ଶନିବାର ଏହି ଅଭାବନୀୟ ଓ ଦୁଃଖଦ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଅଞ୍ଚଳରେ ଘଟିଥିଲା । ପ୍ରସୂତିଙ୍କୁ ନେଇ ଯାଉଥିଲା ଆମ୍ୱୁଲାନ୍ସ । ଅଧାରାସ୍ତାରେ ଏହାର ତେଲ ସରି ଯାଇଥିଲା । ପ୍ରସବ ଯନ୍ତ୍ରଣା ସହ ପ୍ରସୂତି ରାସ୍ତାରେ ଘଣ୍ଟା ଘଣ୍ଟା ଧରି ଅପେକ୍ଷା କରି ରହିଥିଲେ । ଆଉ ଶେଷରେ ମାଆ ସହିତ ଛୁଆର ବି ଜୀବନ ଚାଲି ଯାଇଥିଲା । ଶନିବାର ହାଣିଦା ଗାଁର ତୁଳସୀ ମୁଣ୍ଡାଙ୍କ ଗର୍ଭଯନ୍ତ୍ରଣା ହେବାରୁ ବାଙ୍ଗିରିପୋଷି ଡାକ୍ତରଖାନାରେ ତାଙ୍କୁ ଭର୍ତ୍ତି କରାଯାଇଥିଲା । ହେଲେ ରାତିରେ ତାଙ୍କ ଅବସ୍ଥା ଖରାପ ହେବାରୁ ବାଙ୍ଗିରିପୋଷି ଡାକ୍ତରଖାନାର ଆମ୍ୱୁଲାନ୍ସରେ ବାରିପଦା ମେଡିକାଲ କଲେଜକୁ ସ୍ଥାନନ୍ତର କରାଯାଉଥିଲା । ଅଧା କିନ୍ତୁ ବାଟରେ ଆମ୍ବୁଲାନ୍ସରୁ ତେଲ ସରି ଯାଇଥିଲା । ଫଳରେ ପାଖାପାଖି ଘଣ୍ଟାଏରି ଅଧିକ ସମୟ ଅପେକ୍ଷା ପରେ ଆମ୍ୱୁଲାନ୍ସ ଆସିଥିଲା ଓ ତୁଳସୀଙ୍କୁ ବାରିପଦା ଆଣାଯାଇଥିଲା । ସେତେବେଳକୁ କିନ୍ତୁ ତୁଳସୀ ଓ ତାଙ୍କ ଛୁଆର ମୃତ୍ୟୁ ହୋଇଯାଇଥିଲା । ପୂର୍ବରୁ ଆମ୍ୱଲାନ୍ସ ପହଞ୍ଚିବାରେ ବିଳମ୍ୱ, ରାସ୍ତା ଠିକ୍ ନଥିବାରୁ ଆମ୍ୱୁଲାନ୍ସ ନ ପାରିବାର ଖବର ବିଭିନ୍ନ ସମୟରେ ସାମ୍ନାକୁ ଆସିଛି । କିନ୍ତୁ ଏଭଳି ଘଣଟା ସାମ୍ନାକୁ ଆସିବା ଦୁଃଖଦ ଓ ଲଜ୍ଜାଜନକ ।