close

खास खबरें सिर्फ आपके लिए...हम खासतौर से आपके लिए कुछ चुनिंदा खबरें लाए हैं. इन्हें सीधे अपने मेलबाक्स में प्राप्त करें.

ସ୍ତବ୍ଧ ତାମିଲନାଡୁ, ବୋରୱେଲ ଭିତରେ ଫସିଥିବା ସୁଜିତର ମୃତ୍ୟୁ

ଆଉ ନାହିଁ ସୁଜିତ...ବୋରୱେଲ ଭିତରେ ହିଁ ଏହି ୨ ବର୍ଷୀୟ ଶିଶୁର ମୃତ୍ୟୁ ହୋଇଛି...ସ୍ତବ୍ଧ ତାମିଲନାଡୁ...ସ୍ତମ୍ଭ ଏ ଖବର ଉପରେ ନଜର ରଖିଥିବା ପ୍ରତିଟି ବ୍ୟକ୍ତି ବିଶେଷ...

ସ୍ତବ୍ଧ ତାମିଲନାଡୁ, ବୋରୱେଲ ଭିତରେ ଫସିଥିବା ସୁଜିତର ମୃତ୍ୟୁ
ଫଟୋ ସୌଜନ୍ୟ: ଏଏନଆଇ

ନୂଆଦିଲ୍ଲୀ: ଆଶା ଥିଲା ସୁଜିତର ସୁରକ୍ଷିତ ଭାବରେ ଉଦ୍ଧାର ହେବ । ପୁଣି ଗାଁ ଦାଣ୍ଡରେ ଖେଳିବ, ନାଚିବ ଆଉ କୁଦିବ . ପୂର୍ବରୁ ଏମିତି କିଛି ଘଟଣାରେ ଉଦ୍ଧାରକାରୀ ଦଳ ସଫଳ ବି ହୋଇଥିଲେ । ଯାହାକି ପରିବାର ବର୍ଗଙ୍କୁ ଆଶ୍ୱସନା ଦେଉଥିଲା । ଦୀର୍ଘ ୪ ଦିନର ଅପରେସନ । ୧୦୦ ଫୁଟ ବୋରୱେଲ ଭିତରେ ଫସି ରହିଥିବା ୨ ବର୍ଷୀୟ ଶିଶୁ ସୁଜିତକୁ ଜୀବତ ଅବସ୍ଥାରେ ଉଦ୍ଧାର ପାଇଁ ଦିନ ରାତି ଏକ କରିଦେଇଥିଲେ ଉଦ୍ଧାରକାରୀ ଦଳ । ଅତ୍ୟାଧୁନିକ ଯନ୍ତ୍ରପାତିର ବ୍ୟବହାର ହୋଇଥିଲା । ହେଲେ ସବୁକିଛି ସତ୍ତ୍ୱେ ସୁଜିତକୁ ବଞ୍ଚାଇବା ସମ୍ଭବ ହୋଇନି । 

ମା ଆଖିର ଲୁହ ସୁଖୁନି । ଦୀର୍ଘ ୪ ଦିନ ହେଲା ଦିନ ରାତି ଜାଣି ପାରିନି । ସବୁବେଳେ ଆଖି ସାମ୍ନାରେ ସୁଜିତ । ଆଜି ମା ପାଖକୁ ସୁଜିତ ଫେରିଛି ସତ । ହେଲେ ଜୀବିତ ଅବସ୍ଥାରେ ନୁହେଁ । ପୁରା ଗାଁରେ ଶୋକାକୂଳ ପରିବେଶ । ସ୍ତବ୍ଧ ହୋଇଯାଇଛି ତାମିଲନାଡୁ । ବାହୁନି ବାହୁନି କାନ୍ଦୁଛି ମା । 

ଶୁକ୍ରବାର ସଂନ୍ଧ୍ୟାରେ ତାମିଲନାଡୁ ତିରୁଚିରାପଲ୍ଲୀ ଜିଲ୍ଲାର ଏକ ଗାଁରେ ୩୦ ମିଟରର ଏକ ବୋରୱେଲ ଭିତରେ ଖସିପଡିଥିଲା ୨ ବର୍ଷର ଶିଶୁ । ନାଁ ସୁଜିତ ୱିଲସନ । ହଠାତ ଏଖବର ସବୁଆଡେ ଖେଳିଗଲା । ପହଞ୍ଚିଥିଲେ ଉଦ୍ଧାରକାରୀ ଦଳ । ତାମିଲନାଡୁ ସ୍ୱାସ୍ଥ୍ୟମନ୍ତ୍ରୀ ବିଜୟ ଭାସ୍କର ଏବଂ ପର୍ଯ୍ୟଟନ ମନ୍ତ୍ରୀ ବଲ୍ଲାମଣ୍ଡି ନଟରାଜନ ଘଟଣା ସ୍ଥଳରେ ଉପସ୍ଥିତ ରହି ଉଦ୍ଧାରକାର୍ଯ୍ୟର ତଦାରଖ କରୁଥିଲେ । 

ଉଦ୍ଧାରକାରୀ ଦଳକୁ ସୁଜିତ ପାଖରେ ପହଞ୍ଚିବା ଏତେ ସମ୍ଭବ ନଥିଲା । କାହିଁକିନା ଶିଶୁଟି ପ୍ରଥମେ ମାତ୍ର ୨୫ ଫୁଟ ଭିତରେ ଲଟକି ରହିଥିବା ବେଳେ ପରବର୍ତ୍ତୀ ଅବସ୍ଥାରେ ଖସି ଖସି ୧୦୦ ଫୁଟ ଭିତରକୁ ଚାଲିଯାଇଥିଲା । ଦୀର୍ଘ ୪ଦିନର ଅପରେସନ । ସୋମବାର ମଧ୍ୟରାତ୍ରୀରେ ସୁଜିତ ପାଖକୁ ପହଞ୍ଚିଲେ ଉଦ୍ଧାରକାରୀ ଦଳ । ହେଲେ ସେତେବେଳକୁ ଆଉ ନଥିଲା ସୁଜିତଙ୍କ ଜୀବନ । ଦୁର୍ଗନ୍ଧ ବାହାରୁଥିଲା ।  

ଆଜି ସୁଜିତଙ୍କ ମୃତଦେହ ପ୍ରଥମେ ସ୍ଥାନୀୟ ମନପ୍ପାରାଇ ମେଡିକାଲକୁ ନିଆଯାଇଥିଲା । ପରେ ଗାଁକୁ ମୃତଦେହ ଅଣାଯାଇଛି । ମଉଳି ଯାଇଛି ପରିବାରର ସମସ୍ତ ଆଶା । ଭାଙ୍ଗିଯାଇଛି ସବୁ ସ୍ୱପ୍ନ । ଯେଉଁ ଶିଶୁର ସୁରକ୍ଷିତ ଉଦ୍ଧାର ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, କଂଗ୍ରେସ ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ, ଅଭିନେତା ରଜନୀକାନ୍ତ ପ୍ରମୁଖ ପ୍ରାର୍ଥନା କରିଥିଲେ, ଶେଷରେ ତାଙ୍କର ମୃତ୍ୟୁ ଖବର ହିଁ ଆସିଲା । ସ୍ତବ୍ଧ ତାମିଲନାଡୁ, ସ୍ତମ୍ଭ ଏ ଖବର ଉପରେ ନଜର ରଖିଥିବା ପ୍ରତିଟି ବ୍ୟକ୍ତି ବିଶେଷ । ଟ୍ୱିଟ କରି ପରିବାର ବର୍ଗଙ୍କୁ ସମବେଦନା ଜଣାଇଛନ୍ତି ରାହୁଲ ଗାନ୍ଧୀ .