ଶାସ୍ତ୍ରୀଙ୍କୁ କେବେ ବିଦା କରୁଛ, ଦାଦାଙ୍କୁ ପ୍ରଶ୍ନ କଲେ ଏହି ବଲିଉଡ ଅଭିନେତା

ଭାରତୀୟ କ୍ରିକେଟ ଟିମର କୋଚ ରବି ଶାସ୍ତ୍ରୀଙ୍କ ଉପରେ କାର୍ଯ୍ୟାନୁଷ୍ଠାନ ଦାଦା କେବେ ନେବେ ବୋଲି ପ୍ରଶ୍ନ କରିଛନ୍ତି ବଳିଉଡ ଷ୍ଟାର । 

ଶାସ୍ତ୍ରୀଙ୍କୁ କେବେ ବିଦା କରୁଛ, ଦାଦାଙ୍କୁ ପ୍ରଶ୍ନ କଲେ ଏହି ବଲିଉଡ ଅଭିନେତା
ଫାଇଲ ଫଟୋ

ନୂଆଦିଲ୍ଲୀ: ଆଜି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ଅଧ୍ୟକ୍ଷ ଭାବରେ ଦାୟିତ୍ୱ ଗ୍ରହଣ କରିଛନ୍ତି ସୌରଭ ଗାଙ୍ଗୁଲି । ଆରମ୍ଭ ହୋଇଛି ଦାଦାଙ୍କ ଯୁଗ । ଗାଙ୍ଗୁଲିଙ୍କୁ ନେଇ ଅନେକ କିଛି ଆଶା ରଖିଛନ୍ତି କ୍ରୀଡାପ୍ରେମୀ । ଆଉ ଏହାରି ଭିତରେ ଜଣେ ବଲିଉଡ ଅଭିନେତାଙ୍କ ଟ୍ୱିଟ ଭାଇରାଲ ହୋଇଛି । ଭାରତୀୟ କ୍ରିକେଟ ଟିମର କୋଚ ରବି ଶାସ୍ତ୍ରୀଙ୍କ ଉପରେ କାର୍ଯ୍ୟାନୁଷ୍ଠାନ ଦାଦା କେବେ ନେବେ ବୋଲି ପ୍ରଶ୍ନ କରିଛନ୍ତି ବଳିଉଡ ଷ୍ଟାର । 

ବିଭିନ୍ନ ସମୟରେ ବିବାଦୀୟ ବୟାନ ଦେଇ ଚର୍ଚ୍ଚାରେ ରହୁଥିବା ବଲିଉଡ ଅଭିନେତା କମାଲ ଆର ଖାନଙ୍କ ପୁଣି ଏକ ଟ୍ୱିଟକୁ ନେଇ ଚର୍ଚ୍ଚା । ନିଜ ଟ୍ୱିଟରେ କମାଲ ସିଧାସଳଖ ଭାରତୀୟ କ୍ରିକେଟ ଟିମର କୋଚ ରବି ଶାସ୍ତ୍ରୀଙ୍କୁ ଟାର୍ଗେଟ କରିଛନ୍ତି । ରବି ଶାସ୍ତ୍ରୀ ଜଣେ ଦାୟିତ୍ୱହୀନ ବ୍ୟକ୍ତ ଏବଂ ସେ ସବୁବେଳେ ନିଶାରେ ରୁହନ୍ତି ବୋଲି କହିଛନ୍ତି ଏହି ବଲିଉଡ ଅଭିନେତା । ତେଣୁ ତାଙ୍କୁ କେବେ ବାହାର କରାଯିବ ବୋଲି ଗାଙ୍ଗୁଲିଙ୍କୁ ନିଜ ଟ୍ୱିଟରେ ପଚାରିଛନ୍ତି କମାଲ ଆର ଖାନ । ଗାଙ୍ଗୁଲି ଦାୟିତ୍ୱ ଗ୍ରହଣ କରିବାର ଦିନକ ପୂର୍ବରୁ ଅର୍ଥାତ ମଙ୍ଗଳବାର ଏହି ଟ୍ୱିଟ ସେ କରିଥିଲେ । ଆଉ କମାଲଙ୍କ ଏହି ଟ୍ୱିଟ ଏବେ ଭାଇରାଲ ହେଉଛି । ୟୁଜର୍ସ ବହୁ ପ୍ରତିକ୍ରିୟା ରଖୁଛନ୍ତି । 

ଆଜି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ବସ୍ ହେଲେ ସୌରଭ ଗାଙ୍ଗୁଲି । ବିସିସିଆଇର ୩୯ତମ ଅଧ୍ୟକ୍ଷ ଭାବରେ ଦାୟିତ୍ୱ ଗ୍ରହଣ କରିଛନ୍ତି ଭାରତୀୟ କ୍ରିକେଟ ଦଳର ଏହି ପୂର୍ବତନ ଅଧିନାୟକ । ଆଜିଠୁ ଆରମ୍ଭ ହୋଇଛି ଦାଦାଙ୍କ ଯୁଗ । ଆଉ ଏହା ପରେ ସୌରଭ ଗାଙ୍ଗୁଲିଙ୍କ ଫ୍ୟାନ୍ସଙ୍କ ଭିତରେ ଖୁସିର ଲହରୀ ଖେଳିଯାଇଛି । ସୌରଭ ବିସିସିଆଇର ବସ୍ ହେବା ପରେ ସେ କିଛି ନୂଆ କରିବେ ବୋଲି କମାଲ ମଧ୍ୟ ବିଶ୍ୱାସ ରଖିଛନ୍ତି ।  

ଆଜି ସୌରଭ ଦାୟିତ୍ୱ ନେବା ପରେ ବିସିସିଆଇରେ ନୂଆ ଯୁଗର ଆରମ୍ଭ ହୋଇଛି । ଏହାସହ ସୁପ୍ରିମକୋର୍ଟଙ୍କ ଦ୍ୱାରା ନିଯୁକ୍ତ ପ୍ରଶାସନିକ କମିଟି (ସିଓଏ)ର ୩୩ମାସ ଧରି ଚାଲିଥିବା ଶାସନରେ ପୁନଚ୍ଛେଦ ପଡିଛି । ସର୍ବସମ୍ମତି କ୍ରମେ ଗୃହୀତ ହୋଇଛି ଗାଙ୍ଗୁଲିଙ୍କ ନାମାଙ୍କନ । 

ଗୁରୁତ୍ୱପୂର୍ଣ୍ଣ କଥା ହେଉଛି, ଦାଦାଙ୍କ ଯୁଗ ମାତ୍ର ୯ ମାସ ପର୍ଯ୍ୟନ୍ତ ଚାଲିବ । ଭାରତୀୟ କ୍ରିକେଟଙ୍କୁ ଯେଉଁ ଢଙ୍ଗରେ ସୌରଭ ଦେଖିବାକୁ ଚାହାନ୍ତି, ତାହା ମାତ୍ର ୯ ମାସର ସମୟ ସୀମା ମଧ୍ୟରେ ତାଙ୍କୁ କରିବାକୁ ପଡିବ । କାହିଁକିନା ନୂଆ ସମ୍ବିଧାନ ବ୍ୟବସ୍ଥା ଅନୁଯାୟୀ ୬ବର୍ଷର କାର୍ଯ୍ୟକାଳ ପରେ କୁଲିଙ୍ଗ୍ ଅଫ୍ ପିରିୟଡ ବାଧ୍ୟତାମୂଳକ ଭାବେ ଲାଗୁ ହେବ । 

ତେବେ ଗାଙ୍ଗୁଲି ବିସିସିଆଇରେ ବେଙ୍ଗଲ୍ କ୍ରିକେଟ୍ ଆସୋସିଏସନ୍ (ସିଏବି)ର ସମ୍ପାଦକ ଏବଂ ପରେ ଅଧ୍ୟକ୍ଷ ଭାବେ ଦାୟୁତ୍ୱ ତୁଲାଇ ସାରିଛନ୍ତି । ତେଣୁ ଏଥିରୁ ପାଇଥିବା ଅଭିଜ୍ଞତାକୁ କାମରେ ଲଗାଇ ପାରିବେ ସେ । ଏହାସହ ଭାରତୀୟ କ୍ରିକେଟକୁ ଏକ ଉଚ୍ଚ ସ୍ତରକୁ ନେବେ ବୋଲି ସମସ୍ତେ ଆଶା ରଖିଛନ୍ତି । ମୁମ୍ବାଇରେ ଦାଦା ଭାବରେ ପରିଚିତ ସୌରଭ ଗାଙ୍ଗୁଲି ଆଜି ଦାୟୁତ୍ୱ ଗ୍ରହଣ କରିବା ପରେ କ୍ରୀଡାପ୍ରେମୀଙ୍କ ଭିତରେ ରହିଛି ଭରପୁର ଉତ୍ସାହ । 

ଗାଙ୍ଗୁଲିଙ୍କ ପ୍ରତି କ୍ରୀଡାପ୍ରେମୀଙ୍କ ଭଲପାଇବା କେତେ, ତାହା ଆଜି ସୋସିଆଲ ମିଡିଆ କହୁଛି । ଯେଉଁଠି ଦେଖିଲେ ଦାଦା ହିଁ ଦାଦା । ଟ୍ୱିଟରରେ ଟ୍ରେଣ୍ଡ କରୁଛି କଂଗ୍ରାଜୁଲେସନ ଦାଦା । ଆହୁରି ମଧ୍ୟ ଫେସବୁକ,ହ୍ୱାଟ୍ସଆଫରେ ବି ଦାଦାଙ୍କୁ ନେଇ ଚର୍ଚ୍ଚା ସରଗରମ । ଆଗକୁ ଦାଦା କଣସବୁ ପଦକ୍ଷେପ ନେବେ, ତା ଉପରେ ସମସ୍ତଙ୍କ ନଜର ରହିଛି ।