କେୟାର ହସ୍ପିଟାଲର ପାକିସ୍ତାନୀ ଲିଙ୍କ, ହସ୍ପିଟାଲର ପ୍ରକୃତ ମାଲିକ ପାକିସ୍ତାନୀ

ପାକିସ୍ତାନ ଜେଲରେ ଅଛନ୍ତି କେୟାର ହସ୍ପିଟାଲର ପ୍ରକୃତ ମାଲିକ

କେୟାର ହସ୍ପିଟାଲର ପାକିସ୍ତାନୀ ଲିଙ୍କ, ହସ୍ପିଟାଲର ପ୍ରକୃତ ମାଲିକ ପାକିସ୍ତାନୀ
ସୌଜନ୍ୟ: ସୋସିଆଲ ମିଡିଆ

ଚନ୍ଦନ ପାଇକରାୟ, ଭୁବନେଶ୍ୱର: କେୟାର ହସ୍ପିଟାଲର ପାକିସ୍ତାନୀ ଲିଙ୍କ । ହସ୍ପିଟାଲ ପ୍ରକୃତ ମାଲିକ ପାକିସ୍ତାନ ନାଗରିକ । ଯିଏକି ଏବେ ପାକିସ୍ତାନ ଜେଲରେ ରହିଛନ୍ତି ବନ୍ଦୀ । ପ୍ରକୃତ ମାଲିକ ପାକିସ୍ତାନ ଜେଲରେ ଥିବା ବେଳେ କିଭଳି ଭାବେ ଏହି ହସ୍ପିଟାଲକୁ ଭୁବନେଶ୍ୱରରେ ରାଜ୍ୟ ସରକାର ୨୦ ଏକର ଜମି ଯୋଗଇ ଦେବା ସହ ଅନୁମତି ଦେଲେ ତାହାକୁ ନେଇ ବିଧାନସଭାରେ ହୋଇଛି ହଟ୍ଟଗୋଳ । ଶୂନ୍ୟକାଳରେ ବିଜେପି ବିଧାୟକ ଦଳ ଉପନେତା ଏହି ପ୍ରସଙ୍ଗକୁ ଉଠାଇବା ସହ ଘଟଣାର ତଦନ୍ତ କରିବା ପାଇଁ ଦାବି କରିଥିଲେ । ଏହାକୁ ନେଇ କଂଗ୍ରେସ ବିଧାୟକ ତାରା ବାହିନୀପତି ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିବା ସହ ଘଟଣାର ତଦନ୍ତ ରିପୋର୍ଟ ଗୃହରେ ରଖିବା ପାଇଁ କହିଥିଲେ । ତେବେ ଏ ସଂପର୍କରେ ସରକାରଙ୍କ କହିବା ଅନୁସାରେ ଏଭଳି ଘଟଣା ଯଦି ଥାଏ ତେବେ ତଦନ୍ତ କରାଯିବ । ସେପଟେ କେୟାର ହସ୍ପିଟାଲ କର୍ତ୍ତୃପକ୍ଷ ଏହାକୁ ଖଣ୍ଡନ କରିବା ସହ ସମସ୍ତ ତଦନ୍ତକୁ ସାମ୍ନା କରିବା ପାଇଁ ପ୍ରସ୍ତୁତ ଥିବା କହିଛନ୍ତି । 

 କେୟାର ହସ୍ପିଟାଲର ପାକିସ୍ତାନ ମାଲିକ । ପାକିସ୍ତାନ ଜେଲରେ ଅଛନ୍ତି କେୟାର ହସ୍ପିଟାଲର ପ୍ରକୃତ ମାଲିକ। କିଡନୀ ଚୋରି ଘଟଣାରେ ପାକିସ୍ତାନ ଜେଲରେ ବନ୍ଦୀ ରହିଛନ୍ତି କେୟାର ହସ୍ପିଟାଲର ମାଲିକ । ହେଲେ ଚଞ୍ଚକତା କରି ଅନ୍ୟ ଜଣେ ଏହି ହସ୍ପିଟାଲକୁ ଚଳାଉଛନ୍ତି । ଏଭଳି ସ୍ଥଳେ ରାଜ୍ୟ ସରକାର ୨୦ ଏକର ଜମି ଯୋଗାଇ ଦେବା ସହ କିଭଳି ହସ୍ପିଟାଲ କରିବା ପାଇଁ ଅନୁମତି ଦେଲେ ତାହାକୁ ନେଇ ବିରୋଧୀଙ୍କ ପ୍ରଶ୍ନ । ଅନ୍ୟପଟେ ହସ୍ପିଟାଲର ଏନଓସି ନ ଥାଇ ପରିଚାଳିତ ବେଉଥିବା ଭଳି ସଙ୍ଗୀନ ଅଭିଯୋଗ ହୋଇଛି । ଏଭଳି ସମ୍ବେଦନଶୀଳ ମାମଲାକୁ ନେଇ ବିଧାନସଭାର ଶୂନ୍ୟକାଳରେ ବିଜେପି ବିଧାୟକ ଦଳ ଉପନେତା ବିଷ୍ଣୁ ସେଠୀ ବାଚସ୍ପତିଙ୍କ ଦୃଷ୍ଟି ଆକର୍ଷଣ କରିଥିଲେ । ଘଟଣାକୁ ନେଇ ସ୍ୱାସ୍ଥ୍ୟବିଭାଗର ଭୂମିକାକୁ ସନ୍ଦେହ ପ୍ରକଟ କରିଥିଲେ । କେଉଁ ପରିସ୍ଥିତିରେ ଜଣେ ପାକିସ୍ତାନ ନାଗରିକଙ୍କ ମାଲିକାନା ସତ୍ତ୍ୱେ ଥିବା ହସ୍ପିଟାଲର ରାଜ୍ୟ ସରକାର ସମସ୍ତ ପ୍ରକାର କ୍ଲିୟରାନ୍ସ ଦେଲେ ତାହାକୁ ନେଇ ବିରୋଧୀ ହଙ୍ଗାମା କରିବା ସହ ତଦନ୍ତ କରିବା ପାଇଁ ଦାବି କରିଛନ୍ତି ।

ସେପଟେ ବିରୋଧୀଙ୍କ ଏଭଳି ଅଭିଯୋଗକୁ ନେଇ ଉଭୟ ରାଜ୍ୟ ସରକାର ଓ କେୟାର କର୍ତ୍ତୃପକ୍ଷ ଖୋଲିଛନ୍ତି ମୁହଁ । ଘଟଣାକୁ ନେଇ ରଖିଛନ୍ତି ପ୍ରତିଉତ୍ତର । ବିଜେଡି ବିଧାୟକ ଅମର ଶତପଥୀ କହିଛନ୍ତି ଘଟଣା ସମ୍ପର୍କରେ ତଦନ୍ତ କରାଯିବ । ତେବେ ଏଭଳି ଅଭିଯୋଗକୁ ଖଣ୍ଡନ କରିଛନ୍ତି କେୟାର ହସ୍ପିଟାଲ କର୍ତ୍ତୃପକ୍ଷ । କହିଛନ୍ତି ତାଙ୍କର ପାକିସ୍ତାନ ସହ କୌଣସି ଲିଙ୍କ ନାହିଁ । ଅନ୍ୟପଟେ ଏନଓସି ନେଇ ହସ୍ପିଟାଲ ପରିଚାଳନା ହେଉଥିବା ନେଇ ସୂଚନା ଦେଇଛନ୍ତି କେୟାର ହସ୍ପିଟାଲ କର୍ତ୍ତୃପକ୍ଷ ।