ଦୁର୍ଗମ ଅଞ୍ଚଳ ପାଇଁ ସ୍ୱତନ୍ତ୍ର ଯାନ ତିଆରି କରିଛନ୍ତି CETର ଛାତ୍ର

ATV ବା ଅଲ୍ ଟେରାଇନ ଭେଇକିଲ୍ 

ଦୁର୍ଗମ ଅଞ୍ଚଳ ପାଇଁ ସ୍ୱତନ୍ତ୍ର ଯାନ ତିଆରି କରିଛନ୍ତି CETର ଛାତ୍ର
ସୌଜନ୍ୟ: ସୋସିଆଲ ମିଡିଆ

ଗାୟତ୍ରୀ ଚକ୍ରବର୍ତ୍ତୀ, ଭୁବନେଶ୍ୱର: ATV ବା ଅଲ୍ ଟେରାଇନ ଭେଇକିଲ୍ । ପାହାଡ଼ିଆ ଅଞ୍ଚଳ ଓ କୃଷିକ୍ଷେତ୍ର ପାଇଁ ସ୍ୱତନ୍ତ୍ର ଯାନ । ସାଧାରଣତଃ ସମତଳ ଅଞ୍ଚଳ ବା ରାଜପଥରେ ସମାନ୍ତରାଳ ଭାବେ ଅନେକ ଗାଡି ଚାଲୁଛି, ହେଲେ ଦୁର୍ଗମ ପାହାଡିଆ ଅଞ୍ଚଳରେ ଏହି ଗାଡ଼ି ଚାଲିପାରେ ନାହିଁ । କିନ୍ତୁ ଭୁବନେଶ୍ୱର ସ୍ଥିତ କଲେଜ ଅଫ୍ ଇଂଜିନିୟରିଂ ଏଣ୍ଡ ଟେକ୍ନୋଲୋଜି ବା CETର ଛାତ୍ରମାନେ ମିଶି ଏମିତି ଏକ ଗାଡ଼ି ଉଦ୍ଭାବନ କରିଛନ୍ତି, ଯାହା ଦୁର୍ଗମ ଅଞ୍ଚଳରେ ମଧ୍ୟ ଚାଲିପାରିବ । କାଦୁଅ, ପଥର, ଗୋଡି, ଖାଲଖମା ପୂର୍ଣ୍ଣ ରାସ୍ତାରେ ବିନା ବାଧାରେ ଏହି ଗାଡି ଯାତାୟତ କରିପାରିବ । ଏଥିରେ ଲାଗିଥିବା ଯନ୍ତ୍ରାଂଶ ସବୁକୁ ଏପରି ଖଞ୍ଜାଯାଇଛି, ଯାହା ଭୂ-ଭାଗର ଯେକୌଣସି ସ୍ଥାନରେ ଭାରସାମ୍ୟ ନ ହରାଇ ଗତି କରିପାରିବ । ଦୁର୍ଗମ ଅଞ୍ଚଳରେ ଥିବା ପର୍ଯ୍ୟଟନ ସ୍ଥାନରେ ପର୍ଯ୍ୟଟକଙ୍କ ଲାଗି ଓ କୃଷି କ୍ଷେତ୍ରରେ ଏହାକୁ ବ୍ୟବହାର କରାଯାଇପାରିବ । ଚାଷୀ ମାନେ କମ୍ ଖର୍ଚ୍ଚରେ ଏହାକୁ  ଟ୍ରାକ୍ଟରର ବିକଳ୍ପ ଭାବେ ବ୍ୟବହାର କରିପାରିବେ ବୋଲି କହିଛନ୍ତି ସିଇଟି ଛାତ୍ରଛାତ୍ରୀ । 

ବର୍ତ୍ତମାନ ଏପରି ୩ଟି ଗାଡି ନିର୍ମାଣ କରାଯାଇଛି । ପରୀକ୍ଷାମୂଳକ ଭାବେ ବିଭିନ୍ନ ରେସିଂ ପ୍ରତିଯୋଗିତାରେ ଭାଗ ନେଇ ପରୀକ୍ଷଣରେ ସଫଳ ହେବା ସାଙ୍ଗକୁ କୃତକାର୍ଯ୍ୟ ହୋଇ ପୁରସ୍କୃତ ମଧ୍ୟ ହୋଇଛନ୍ତି । ATVର ପ୍ରାୟ ୧ ହଜାର କେଜି ଓଜନ ଟାଣି ପାରିବାର କ୍ଷମତା ରହିଛି । ଏହା ପେଟ୍ରୋଲ ଇନ୍ଧନରେ ଚାଲେ । ଆଗାମୀ ଦିନରେ ଏହାକୁ ଇ-ଭେଇକିଲ୍ ଭାବେ ସୋଲାର ଏନର୍ଜି ବା ସୌରଶକ୍ତି ମାଧ୍ୟମରେ କାର୍ଯ୍ୟକ୍ଷମ କରାଇବାକୁ ସେମାନେ ଯୋଜନା କରିଛନ୍ତି । ସେହିପରି କେବଳ ରେସିଂ ନୁହେଁ, ଏହାର ଡିଜାଇନରେ ସାମାନ୍ୟ ପରିବର୍ତ୍ତନ କରି ଏହାକୁ ଯାତ୍ରୀବାହୀ ଯାନ ଭାବେ ମଧ୍ୟ ବ୍ୟବହାର କରାଯାଇପାରିବ । ଏସବୁ ପ୍ରକଳ୍ପ ସ୍ୱତନ୍ତ୍ର କ୍ଲବ ସାହାଯ୍ୟର ସେମାନେ ନିର୍ମାଣ କରୁଛନ୍ତି । ଯେଉଁ ସ୍ଥାନକୁ ସାଧାରଣତଃ ମୋଟର ସାଇକଲ ଓ ବାଇସାଇକଲ ଯାଇପାରେ ନାହିଁ, ସେହି ସ୍ଥାନରେ ବି ଏହାକୁ ବ୍ୟବହାର କରିହେବ ବୋଲି କହିଛନ୍ତି କଲେଜର ଅଧ୍ୟକ୍ଷ  ।

ATVର ବିଭିନ୍ନ ଉପକାରୀ ଦିଗ ପ୍ରତି ନିୟମିତ ଭାବେ ଗବେଷଣା ଚଳାଇଛନ୍ତି ଛାତ୍ରଛାତ୍ରୀ । ଉପଯୁକ୍ତ ପ୍ରୋତ୍ସାହନ ଓ ସାହାଯ୍ୟ ମିଳିଲେ ଦୁର୍ଗମ ଅଞ୍ଚଳବାସୀଙ୍କ ଉପକାରରେ ଲାଗିପାରିବ ATV।