ଦାରିଙ୍ଗବାଡ଼ିରେ ରହିଥିବା ଦୁଇଟି କଫି ବଗିଚା ମଧ୍ୟରୁ ପ୍ଲିହେରି ଗ୍ରାମ ସ୍ଥିତ କଫି ବଗିଚାଟି ଏବେ ଧ୍ୱଂସ ହେବାକୁ ବସିଲାଣି
Trending Photos
ପ୍ରିୟବ୍ରତ ସାହୁ, ଜି. ଉଦୟଗିରି: କନ୍ଧମାଳ ଜିଲ୍ଲାର ଦାରିଙ୍ଗବାଡ଼ି ମୁଖ୍ୟତଃ ଶୀତ ପ୍ରବଣ ଅଞ୍ଚଳ ଭାବେ ବେଶ ପରିଚିତ । ଆଉ ଦାରିଙ୍ଗବାଡ଼ିର ପରିଚୟ କହିଲେ ଏଠିକାର କଫି ବଗିଚା ହିଁ ଏହାର ପରିଚୟ । ଦାରିଙ୍ଗବାଡ଼ିରେ ରହିଥିବା ଦୁଇଟି କଫି ବଗିଚା ମଧ୍ୟରୁ ପ୍ଲିହେରି ଗ୍ରାମ ସ୍ଥିତ କଫି ବଗିଚାଟି ଏବେ ଧ୍ୱଂସ ହେବାକୁ ବସିଲାଣି । ଦୀର୍ଘ ବର୍ଷ ହେବ ରକ୍ଷଣାବେକ୍ଷଣାର ଅଭାବ ହେତୁ ଏଠାରେ ଆଉ କଫି ଉତ୍ପାଦନ ହୋଇପାରୁନାହିଁ ।
୨୦୧୬-୧୭ ମସିହାରେ ମୃତ୍ତିକା ସଂରକ୍ଷଣ ଓ ଜଳ ବିଭାଜିକା ଉନ୍ନୟନ ବିଭାଗ ପକ୍ଷରୁ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ପ୍ଲିହେରି ସ୍ଥିତ କଫି ବଗିଚାରେ ୧୭ ଲକ୍ଷ୯୧ ହଜାର ଟଙ୍କା ବିନିଯୋଗ କରାଯାଇଥିଲା । ଏଠାରେ ୨୩୦୦ କଫି ଚାରା ରୋପଣ କରାଯାଇଥିଲା । ହେଲେ ଏବେ ଏଠାରେ ଗୋଟିଏ ବି କଫି ଗଛ ନଥିବା ବେଳେ କଫି ଚାରା ସବୁ ମାଟିରେ ମିଳେଇ ଗଲାଣି । ଏ ଏହି କଫି ବଗିଚା ମଧ୍ୟରେ ରହିଥିବା ଶାଳ, ପିଆଶାଳ ଓ ଶାଗୁଆନ ଭଳି ମୂଲ୍ୟବାନ ଗଛ ଗୁଡ଼ିକୁ ବେଧଡକ ଭାବେ କିଛି ମୁଷ୍ଟିମେୟ ଲୋକ କାଟି ନେଇ ଯାଉଥିବା ଅଭିଯୋଗ ହୋଉଛି ।
ହେଲେ ଏଥିପ୍ରତି ବନବିଭାଗ ହେଉ କିମ୍ବା ମୃତ୍ତିକା ସଂରକ୍ଷଣ ବିଭାଗ କେହି ଦୃଷ୍ଟି ଦେଉନାହାନ୍ତି ।
କଫି ବଗିଚାଟି ମୃତ୍ତିକା ସଂରକ୍ଷଣ ବିଭାଗ ଦାୟିତ୍ୱରେ ରହିଛି । ବନ ବିଭାଗକୁ ଜଣାଇ ଗଛ କଟା ବନ୍ଦ କରାଯିବ । ଏବଂ ଏମଜି ଏନ ଆର ଜିଏସରେ ଲୋକଙ୍କୁ କାମ ଧନ୍ଦା ଦେବା ଉଦ୍ଧେଶ୍ୟରେ ସେଠି କାମ କରାଯାଇଥିଲା ତଦାରଖ ଅଭାବରୁ କିଛି କଫି ଗଛ ନଷ୍ଟ ହୋଇଯାଇଛି । ତେଣୁ ଏନେଇ ଦାୟିତ୍ୱରେ ରହିଥିବା ପିଆଇଙ୍କୁ ରିପୋର୍ଟ ମଗାଯିବ ବୋଲି ଉପ ନିର୍ଦ୍ଦେଶକ ଶୈଳେନ୍ଦ୍ର ନାରାୟଣ ନାଏକ କହିଛନ୍ତି । ଏ ଦିଗରେ ସରକାର ତୁରନ୍ତ ପଦକ୍ଷେପ ଗ୍ରହଣ କରି କାର୍ଯ୍ୟାନୁଷ୍ଠାନ ଗ୍ରହଣ କରିବା ନିତାନ୍ତ ଆବଶକ୍ୟ ହୋଇପଡିଛି ବୋଲି ଅଞ୍ଚଳବାସୀ ଦାବି କରୁଛନ୍ତି ।