ସଂକଟ ସମୟରେ ମୋଦିଙ୍କୁ ଏପରି କହିଲେ ରାହୁଲ

ନୂଆଦିଲ୍ଲୀ: ନିଜ ତୁଣ୍ଡକୁ ନେଇ ବେଶ ଚର୍ଚ୍ଚାରେ ରହିଥାନ୍ତି କଂଗ୍ରେସର ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ। ତାଙ୍କର ପ୍ରତିଟି ଭାଷଣ ମୋଦିଙ୍କ ବିପକ୍ଷରେ ରହିଥାଏ। କିନ୍ତୁ ଦେଶରେ ଲାଗି ରହିଥିବା କୋରୋନା ସଂକଟ ସମୟରେ ତାଙ୍କ ତୁଣ୍ଡ ସମ୍ପୂର୍ଣ୍ଣ ଭାବେ ବଦଳିଯାଇଥିବା ଦେଖିବାକୁ ମିଳିଛି। ନିକଟରେ ସେ ଏକ ସାମ୍ବାଦିକ ସମ୍ମିଳନୀରେ ସଚେତନତାର ବାର୍ତ୍ତା ଦେଇଥିଲେ। 

ସେ କହିଥିଲେ କି, ବର୍ତ୍ତମାନ ଡରିବାର ସମୟ ନୁହେଁ। ତମାମ ଦେଶବାସୀ ଏକଜୁଟ ହୋଇ କୋରୋନା ବିରୋଧରେ ଲଢିବାକୁ ହେବ। ଆମ ମଧ୍ୟରେ ଯଦି ଫାଟ ସୃଷ୍ଟି ହେବ, ତେବେ କୋରୋନା ନିଶ୍ଚିତ ଭାବେ ଜିତିଯିବ। ଏଥିପାଇଁ ଆମ ସମସ୍ତଙ୍କୁ ଏକଜୁଟ ହୋଇ ଲଢିବାକୁ ହେବ। ଏହା ସହିତ ସରକାରଙ୍କୁ ଟେଷ୍ଟିଂ କିଟର ସଂଖ୍ୟାକୁ ମଧ୍ୟ ବଢାଇବା ଏବଂ ଗରିବ, ଚାଷୀ ତଥା ଉଦ୍ୟୋଗମାନଙ୍କୁ ସୁରକ୍ଷା ଦେବା ପାଇଁ ସେ କହିଥିଲେ। 

କୋରୋନା ଟେଷ୍ଟିଂ ରଣନୀତି ଉପରେ ପ୍ରଶ୍ନ ଉଠାଇ ରାହୁଲ କହିଥିଲେ କି, ଲକଡାଉନ ଭାଇରସକୁ ସମାପ୍ତ କରିବାର ସମାଧାନ ନୁହେଁ। ଏହା କେବଳ ଏକ ମାତ୍ର ପଜ ବଟନ ଭାବେ କାର୍ଯ୍ୟ କରିବ। ଆମକୁ ଆହୁରି କଠୋର ପଦକ୍ଷେପମାନ ମଧ୍ୟ ଗ୍ରହଣ କରିବାର ରହିଛି। ଟେଷ୍ଟିଂକୁ ଆହୁରି କଡ଼ାକଡି କରିବାର ରହିଛି। ଏହା ଉପରେ ରଣନୈତିକ ପଦକ୍ଷେପମାନ ଗ୍ରହଣ କରିବା ସହିତ ତାହାକୁ ପ୍ରୟୋଗ କରିବାର ଅଛି ବୋଲି ସେ କହିଥିଲେ। ସେ ଆହୁରି ମଧ୍ୟ କହିଥିଲେ କି, ଯେଉଁ ସବୁ ଅଞ୍ଚଳରେ କୋରୋନାର କୌଣସି ସୂଚନା ବର୍ତ୍ତମାନ ସୁଦ୍ଧା ମିଳିନାହିଁ, ସେଠାରେ ମଧ୍ୟ ଆମକୁ ଯାଞ୍ଚ କରିବାକୁ ହେବ ବୋଲି ସେ କହିଥିଲେ। 

ରାହୁଲ ଆହୁରି ମଧ୍ୟ କହିଥିଲେ କି, ଦେଶରେ ବର୍ତ୍ତମାନ ଜରୁରୀକାଳୀନ ସ୍ଥିତି ଭଳି ପରିସ୍ଥିତି ସୃଷ୍ଟି ହୋଇଛି। ଏହି ସମୟରେ ଏକଜୁଟ ହୋଇ ଏହି ସଂକଟ ବିପକ୍ଷରେ ଲଢିବାର ସମୟ ଆସିଛି। ଏକଜୁଟ ହୋଇ ଲଢିଲେ ଦେଶକୁ ଫାଇଦା ମିଳିବ। ଏଥିପାଇ କଠିନରୁ କଠିନ ରଣନୀତି ପ୍ରସ୍ତୁତ କରିବାର ସମୟ ଏହା। କଠିନ ରଣନୀତି ପ୍ରସ୍ତୁତ କରି ତାହାକୁ ଅନୁସରଣ କରିବାର ଆବଶ୍ୟକତା ରହିଛି। 

ସେହିପରି ମୋଦିଙ୍କ ଉପରେ ଏକ ପ୍ରଶ୍ନର ଉତ୍ତର ଦେଇ ସେ କହିଥିଲେ କି, ବର୍ତ୍ତମାନ ମୋଦିଙ୍କ ସହିତ ଯୁକ୍ତି କରିବା କି ତାଙ୍କୁ ସମାଲୋଚନା କରିବାର ସମୟ ଏହା ନୁହେଁ। ଏକଜୁଟ ହୋଇ ଲଢିବାର ସମୟ। ଦେଶ କୋରୋନାକୁ ହରାଇ ଦେବା ପରେ ମୋଦିଙ୍କ ଦୁର୍ବଳତା ତଥା ତାଙ୍କ ଭୁଲକୁ ସମାଲୋଚନା କରିବା। ବର୍ତ୍ତମାନ ସେ ଦେଶର ପ୍ରଧାନମନ୍ତ୍ରୀ। ସେ ଯେଉଁ ରଣନୀତି ପ୍ରସ୍ତୁତ କରୁଛନ୍ତି ଦେଶବାସୀ ତାଙ୍କୁ ଅନୁକରଣ କରିବାର ଆବଶ୍ୟକତା ରହିଛି ବୋଲି ସେ କହିଥିଲେ। 

ସେ ଆହୁରି ମଧ୍ୟ କହିଥିଲେ କି, ମୁଁ କିନ୍ତୁ ବ୍ୟକ୍ତିଗତ ଭାବେ ମୋଦିଙ୍କର ଅନେକ ପଦକ୍ଷେପ ସହିତ ବିରୋଧ କରୁଛି। କିନ୍ତୁ ବର୍ତ୍ତମାନ ତାଙ୍କୁ ସମାଲୋଚନା କରିବାର ସମୟ ନୁହେଁ।କାହାକୁ ଡରିବାର ସମୟ ନୁହେଁ। ଲଢିବାର ସମୟ। ଏକଜୁଟ ହୋଇ କାମ କଲେ କୋରୋନାକୁ ଭାରତ ନିଶ୍ଚିତ ଭାବେ ହରାଇବ ବୋଲି ସେ କହିଥିଲେ।