ନଭେମ୍ବର ଯାଏ ବାହାଘର ବନ୍ଦ ! ଚିନ୍ତାରେ କ୍ଷୁଦ୍ର ବ୍ୟବସାୟୀ

ସୌମ୍ୟ ରଞ୍ଜନ ନାୟକ, ନୂଆଦିଲ୍ଲୀ: କୋରୋନା ପାଇଁ ସାରା ଦେଶରେ ଏବେ ଲକଡାଉନ୍ । ମାର୍ଚ୍ଚ ୨୩ରୁ ଆରମ୍ଭ ହୋଇଥିବା ଲକଡାଉନ୍ ମେ ୩ ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି । ଆଗକୁ ଏହା ଆହୁରି ବୃଦ୍ଧି କରାଯିବାର ସମ୍ଭାବନା ରହିଛି । ସେପଟେ ଲକଡାଉନ୍ ହଟିବା ପରେ ଆଗାମୀ ୧ରୁ ୨ ମାସ ଯାଏ ସାମଜିକ ଦୂରତା ବଜାୟ ରଖିବା ନେଇ କଟକଣା ଲଗାଇ ପାରନ୍ତି ସରକାର । ତେଣୁ ଯାନିଯାତ୍ରା, ପର୍ବପର୍ବାଣୀ, ଉତ୍ସବ ପାଳନ ଉପରେ ପ୍ରତିବନ୍ଧକ ଲଗାଇପାରନ୍ତି । ଏଭଳି ଅବସ୍ଥାରେ ବାହାଘର, ବ୍ରତଘର ଭଳି ସାମାଜିକ ଉତ୍ସବ ସମ୍ପାଦନା ଉପରେ ବି କଟକଣା ରହିବ । ତେଣୁ ଏବେ ଚିନ୍ତାରେ ଅଛନ୍ତି ଛୋଟମୋଟ ବ୍ୟବସ୍ଥାୟୀ । ସବୁ ବନ୍ଦ ପରେ ଟେଣ୍ଟ ହାଉସ୍ ମାଲିକ, ଲାଇଟ୍ ଡିଜାଇନର, ପଣ୍ଡିତ, ରୋଷେୟା, ଫଟୋ ଗ୍ରାଫରଙ୍କ ପରିବାର ଚଳିବ କିପରି ? 

ପାଞ୍ଜି ଅନୁଯାୟୀ ଲକଡାଉନ ଆରମ୍ଭ ହେବା ଦିନଠୁ ବାହାଘର ପାଇଁ ତିଥି ନଥିଲେ ବି ଏପ୍ରିଲ ମାସରେ ୧୪, ୧୫,୨୫ ଓ ୨୬ ତାରିଖ ବାହାଘର ତିଥି ଥିଲା । ସେହିପରି ମେ ମାସରେ ୨, ୪, ୫, ୬, ୮, ୧୦, ୧୨, ୧୭, ୧୮, ୧୯, ୨୩ ଓ ୨୪ ତାରିଖ ୧୨ ଦିନ ବିବାହ ତିଥି ରହିଛି । ସେହିପରି ଜୁନ ମାସରେ ୯, ୧୩, ୧୪, ୧୫, ୨୬ ଓ ୨୮ ତାରିଖ ରେ ବାହା ତିଥି ରହିଛି । ଏହା ପରେ ଜୁଲାଇ ମାସଠୁ ନଭେମ୍ବର ମାସ ଶେଷ ଯାଏ ଆଉ ବାହା ତିଥିନାହିଁ । ପରବର୍ତ୍ତି ବାହା ତିଥି ନଭେମ୍ବର ୨୫ରେ ଯାଇ ପଡୁଛି । ତେଣୁ ପୂର୍ବରୁ ଏପ୍ରିଲରୁ ଜୁନ ଯାଏ ସ୍ଥିର ହୋଇଥିବା ବାହାଘର ନ ହେବାର ସମ୍ଭାବନା ଅଧିକ । ତା ଛଡ଼ା ନୂଆ ବାହାଘର ସ୍ଥିର ହେଲେ ବି ଏଥିପାଇଁ ନଭେମ୍ବର ଶେଷ ଯାଏ ଅପେକ୍ଷା କରିବାକୁ ପଡିବ । ଏଭଳି ସ୍ଥିତିରେ ସମସ୍ତେ ଚିନ୍ତାରେ । 

ଏନେଇ ଯୁବ ବ୍ୟବସାୟୀ ରାହୁଲ ରଞ୍ଜନ ସେନାପତିଙ୍କ କହିବା କଥା, କୋରୋନା ଭୟଠୁ ବି ସ୍ଥିତି ଆହୁରି ଅସମ୍ଭାଳ ହେବ । ରାଜ୍ୟରେ ବେକାରୀ ସଂଖ୍ୟା ବଢ଼ିବା ସହ ଦାରିଦ୍ର୍ୟ ବଢ଼ିବ । ଆଉ ବେପାରୀଙ୍କ  ମୁଣ୍ଡରେ ଆର୍ଥିକ ବୋଝ ପଡ଼ିବ । ବ୍ୟବସାୟୀମାନେ ଅଣ୍ଟାସଳଖି ଛିଡ଼ା ହେବା କଷ୍ଟକର ହୋଇପଡ଼ିବ । ଏବେ ଏହି କ୍ଷୁଦ୍ର ବ୍ୟବସାୟୀଙ୍କ ପରିବାର ପ୍ରତିପୋଷଣ ପାଇଁ ସରକାର ଆର୍ଥିକ ସହାୟତା ଦେଲେ ଜୀବନ ଧାରଣ ସୁଧୁରିବ ବୋଲି କିଛି ଖୁଚୁରା ବ୍ୟବସାୟୀ ମତ ଦେଇଛନ୍ତି ।