କୋରୋନା ମୁକାବିଲା: ୟୁଏଇକୁ ସହଯୋଗର ହାତ ବଢାଇଲା ଭାରତ

ଦୁବାଇ: ସମଗ୍ର ବିଶ୍ୱରେ ଆତଙ୍କ ଖେଳାଇ ଦେଇଛି ମହାମାରୀ କୋରୋନା। ବିଶ୍ୱର ପ୍ରାୟ ଅଧିକାଂଶ ରାଷ୍ଟ୍ର ଏହି ଭାଇରସରେ ହୋଇଛନ୍ତି କବଳିତ। ଏହାର ପ୍ରଭାବରେ ପ୍ରଭାବିତ ହୋଇଛି ବିଶ୍ୱର ଅର୍ଥବ୍ୟବସ୍ଥା। ଦୋହଲି ଯାଇଛି ଅଧିକାଂଶ ଦେଶର ଆର୍ଥିକ କାରବାର । ଏପରିକି ବିଶ୍ୱର ଆର୍ଥିକ ମହାଶକ୍ତି ଭାବେ ଜଣାଶୁଣା ଯୁକ୍ତରାଷ୍ଟ୍ର ଆମେରିକା ମଧ୍ୟ ଏଥିରୁ ବାଦ ପଡିନାହିଁ। 

ସମଗ୍ର ବିଶ୍ୱକୁ ପେଟ୍ରୋଲିୟମ ଜାତ ପଦାର୍ଥ ବିକ୍ରି କରି ଆର୍ଥିକ ଦୃଷ୍ଟିକୋଣରୁ ବେଶ ସମୃଦ୍ଧଶାଳୀ ଥିବା କେନ୍ଦ୍ର ଏସୀୟାର ଉପସାଗରୀୟ ରାଷ୍ଟ୍ର ସମୂହ ମଧ୍ୟ କୋରୋନା ତାଣ୍ଡବରୁ ବର୍ତ୍ତି ପାରିନାହାଁନ୍ତି । ଆନ୍ତର୍ଜାତୀୟ ବଜାରରେ ଅଶୋଧିତ  ତୈଳ ଦର ହ୍ରାସ ପାଉଥିବାରୁ ଏହି କ୍ଷେତ୍ରରୁ ତୈଳ ରପ୍ତାନୀ କରୁଥିବା ପ୍ରାୟ ଦେଶର ଚିନ୍ତା ବଢିଯାଇଛି। ଆର୍ଥିକ କାରବାରକୁ ଛାଡି ଦେଲେ କୋରୋନା ଭାଇରସ ଯୋଗୁଁ ସ୍ୱାସ୍ଥ୍ୟ ସେବା ମଧ୍ୟ ଏଠାରେ ପ୍ରଭାବିତ ହୋଇଛି।  

କେନ୍ଦ୍ର ଏସୀୟ ଦେଶ ସଂଯୁକ୍ତ ଆରବ ଅମିରାତ(ୟୁଏଇ)ରେ ମଧ୍ୟ କୋରୋନାର ପ୍ରକୋପ ଜାରି ରହିଛି। ସମଗ୍ର ବିଶ୍ୱରେ ଏହି ମହାମାରୀର ମୁକାବିଲା କିପରି ହେବ ସେନେଇ  ବିଶ୍ୱ ସ୍ଥାସ୍ଥ୍ୟ ସଙ୍ଗଠନ(WORLD HEALTH ORGANISATION-WHO) ପକ୍ଷରୁ ଜାରି ରହିଛି ଉଦ୍ୟମ । ପରସ୍ପରର ମିତ୍ର ଥିବା ଅନେକ ରାଷ୍ଟ୍ର କୋରୋନା ମୁକାବିଲା କ୍ଷେତ୍ରରେ ପାରସ୍ପରିକ ସହଯୋଗ କରିବା ଉପରେ ଗୁରୁତ୍ୱ ଦେଉଛନ୍ତି। ଏଭଳି ସମୟରେ ଭାରତ ଏହାର ମିତ୍ର ଦେଶ ୟୁଏଇକୁ ସହଯୋଗ କରିବା ପାଇଁ ଆଗେଇ ଆସିଛି । 

କୋରୋନା ବିରୋଧି ଲଢେଇରେ ସାମିଲ ହେବାକୁ ୮୮ ଜଣିଆ ଦଳ ବିଶିଷ୍ଟ ନର୍ସ ଟିମକୁ ସେଠାକୁ ପଠାଇଛି। ସେଠାରେ ସେମାନଙ୍କୁ ସହଯୋଗ ଯୋଗାଇସ ଦେବେ ଦୁବାଇରେ ଅବସ୍ଥାପିତ ଭାରତୀୟ ଦୂତାବାସଙ୍କ କାର୍ଯ୍ୟାଳୟ ଏବଂ ୟୁଏଇ ବୈଦେଶିକ ମନ୍ତ୍ରଣାଳୟ। କୋରୋନା ବିରୋଧି ଲଢେଇରେ ସହଯୋଗ କରିବା ପାଇଁ ଭାରତକୁ ଅନୁରୋଧ ଜଣାଇଥିଲା ୟୁଏଇ । ଯାହାକୁ ଗ୍ରହଣ କରିଥିଲା ଭାରତ । ସହଯୋଗ କରିବା ନେଇ ଜଣାଇବା ପରେ ଭାରତରେ ଅବସ୍ଥାପିତ ଦୂବାଇ ଦୂତାବାସ ପକ୍ଷରୁ ଏହି ପଦକ୍ଷେପକୁ ପ୍ରସଂଶା କରାଯାଇଛି। ଦୁବାଇରେ କୋରୋନା ବିରୋଧି ଲଢେଇରେ ସାମିଲ ହେବେ  ଆଷ୍ଟର ଡିଏମ ହେଲଥ କେୟାରର ମେଡିକାଲ ଷ୍ଟାଫ।

ଏନେଇ ଏହି ମେଡିକାଲର ପରିଚାଳନା ନିର୍ଦ୍ଦେଶକ ଡ. ଆଜାଦ ମୁପେନ କହିଛନ୍ତି ଏହା ଦୁଇ ଦେଶର ବନ୍ଧୁତ୍ୱ ଉପରେ ପର୍ଯ୍ୟବେସିତ । ଏହି ଅଭିଯାନକୁ ଆଗକୁ ବଢାଇବା ପାଇଁ ଭାରତରେ ଅବସ୍ଥାପିତ ଦୁବାଇ ରାଷ୍ଟ୍ରଦୂତ ଡ. ଅହମ୍ମଦ ଆଲବାନା, ୟୁଏଇରେ ଅବସ୍ଥାପିତ ଭାରତୀୟ ରାଷ୍ଟ୍ରଦୂତ ପବନ କପୁର, କନସୁଲାର ଜେନେରାଲ ଶ୍ରୀ ବିପୁଲ ଆଗ୍ରହ ଦେଖାଇଥିଲେ।