ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ୪୨ ହଜାର ପାର୍

ନୂଆଦିଲ୍ଲୀ: ଦେଶରେ କୋରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି । ଏହାକୁ ନିୟନ୍ତ୍ରଣକୁ ଆଣିବା ପାଇଁ ଯଦିଓ ସମସ୍ତ ପ୍ରକାର ଉଦ୍ୟମ କରାଯାଉଛି, ତେବେ ଉଭୟ ଆକ୍ରାନ୍ତ ଓ ମୃତ୍ୟୁ ସଂଖ୍ୟାରେ ରୋକ୍ ଲାଗୁନି । ଗତ ୨୪ ଘଣ୍ଟା ମଧ୍ୟରେ ୨୫୫୩ ନୂଆ ମାମଲା ସାମ୍ନାକୁ ଆସିଛି । ସେହିପରି ୭୨ ଜଣଙ୍କ ମୃତ୍ୟୁ ମଧ୍ୟ ହୋଇଛି । କେନ୍ଦ୍ର ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ଏନେଇ ସୂଚନା ଦିଆଯାଇଛି । 

ଦେଶରେ ଏବେ କୋରୋନା ଆକ୍ରାନ୍ତଙ୍କ ସଂଖ୍ୟା ୪୨୫୩୩ ରହିଛି । ତେବେ ଏମାନଙ୍କ ମଧ୍ୟରୁ ୧୧୭୦୭ ଜଣ ଲୋକ ସୁସ୍ଥ ହୋଇ ଘରକୁ ଫେରିଲେଣି । ଅନ୍ୟପଟେ ୧୩୭୩ ଜଣଙ୍କ ମୃତ୍ୟୁ ମଧ୍ୟ ହେଲାଣି । ଏବେ ୨୯୪୫୩ଟି ସକ୍ରିୟ ମାମଲା ରହିଛି । ଦେଶର ବିଭିନ୍ନ କୋଭିଡ୍ ହସ୍ପିଟାଲରେ ଏମାନଙ୍କ ଚିକିତ୍ସା ଚାଲିଛି । 

Total number of #COVID19 positive cases in India rises to 42,533 including 29,453 active cases,11,707 cured/discharged/migrated and 1373 deaths: Ministry of Health and Family Welfare pic.twitter.com/zqwLyTceUO

— ANI (@ANI) May 4, 2020

ଆଜିଠୁ ଆରମ୍ଭ ହୋଇଛି ଲକଡାଉନ ୩.o । ଏହା ୧୭ ମଇ ପର୍ଯ୍ୟନ୍ତ ଚାଲିବ । ତେବେ ଏହି ସମୟ ମଧ୍ୟରେ ସର୍ତ୍ତମୂଳକ ଭାବେ ଅନେକ ସହର ଖୋଲିବ । ସେହିପରି ଲକଡାଉନ୍ କଟକଣା ମଧ୍ୟ କୋହଳ କରାଯିବ । ଗ୍ରୀନ ଜୋନରେ ଅଧିକ କଟକଣା କୋହଳ କରାଯିବ । ତେବେ ରେଡ୍ ଜୋନକୁ ପୁରା ନଜରରେ ରଖାଯାଇଛି । 

ଏଠାରେ କହିରଖୁଛୁ, କୋରୋନା ଭାଇରସର ମୁକାବିଲା କରିବାକୁ ଯାଇ ସମଗ୍ର ଦେଶକୁ ୩ ଭାଗରେ ବିଭକ୍ତ କରାଯାଇଛି । ୩୧୯ ଜିଲ୍ଲାକୁ ଗ୍ରୀନ, ୨୮୪ ଜିଲ୍ଲାକୁ ଅରେଞ୍ଜ ଏବଂ ୧୩୦ ଜିଲ୍ଲାକୁ ରେଡ୍ ଜୋନ୍ ଭାବେ ଘୋଷଣା କରାଯାଇଛି । ତେବେ ରାଜ୍ୟଗୁଡ଼ିକ ଚାହିଁଲେ ଏଥିରେ ପରିବର୍ତ୍ତନ କରିପାରିବେ । ପରିସ୍ଥିତି ଦେଖି ରାଜ୍ୟଗୁଡ଼ିକ ନିଷ୍ପତ୍ତି ନେଇପାରିବେ ବୋଲି କେନ୍ଦ୍ର ପକ୍ଷରୁ ସ୍ପଷ୍ଟ କରାଯାଇଛି ।