ମାସ୍କ କିଣା ଦୁର୍ନୀତି: ରାଜ୍ୟ ସରକାରଙ୍କୁ ବିରୋଧିଙ୍କ ଟାର୍ଗେଟ

ଭୁବନେଶ୍ୱର: ରାଜ୍ୟରେ ଜୋର ଧରିଲା ମାସ୍କ କିଣା ଦୁର୍ନୀତି ପ୍ରସଙ୍ଗ | ମହାମାରୀ ବେଳେ ମହାଦୁର୍ନୀତି ଅଭିଯୋଗ ଆଣିଲା କଂଗ୍ରେସ | ଏନେଇ ରାଜ୍ୟପାଳଙ୍କୁ ଭେଟିଲା ଦଳ | ପିସିସି ସଭାପତି ନିରଞ୍ଜନ ପଟ୍ଟନାୟକ ଓ କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ରାଜ୍ୟପାଳଙ୍କୁ ଭେଟି ଫେରାଦ ହୋଇଛନ୍ତି | ବିରୋଧିଙ୍କ ପକ୍ଷରୁ ଆସିଥିବା ଅଭିଯୋଗର ଜବାବ ରଖିଛି ଶାସକ ବିଜେଡି | 

ଏନେଇ ଦଳ ପକ୍ଷରୁ କୁହାଯାଇଛି ଲୋକଙ୍କ ଜୀବନ ବଞ୍ଚାଇବା ସରକାରଙ୍କ ପାଇଁ ବେଶ ଗୁରୁତ୍ୱପୂର୍ଣ୍ଣ | ମାସ୍କ ଆମେ ୧୬ ଟଙ୍କାରେ କିଣିଛୁ | କେନ୍ଦ୍ର ସରକାରଙ୍କ ଗାଇଡ଼ଲାଇନ ଅନୁସାରେ ଏହାକୁ କିଣାଯାଇଛି | ଅନ୍ୟ ରାଜ୍ୟ ଓଡିଶା ଠାରୁ ଅଧିକ ଦାମରେ କିଣିଛନ୍ତି | କଂଗ୍ରେସ ସଜ ମାଛରେ ପୋକ ପକାଇବା ଭଳି କାମ କରୁଛି | ନବୀନ ସରକାର କୋରୋନା ମୁକାବିଲା କରୁଥିବା ବେଳେ କଂଗ୍ରେସ କ'ଣ କରୁଥିଲା ବୋଲି ପ୍ରଶ୍ନ ଉଠାଇଛି ସରକାରୀ | କୋରୋନା ଯୋଦ୍ଧାଙ୍କ ମନୋବଳ ବଢାଇବାକୁ ସରକାର କାମ କରୁଥିବା ବେଳେ କଂଗ୍ରେସ ଦଳ ଏପରି ମିଥ୍ୟା ଅଭିଯୋଗ ଆଣିବା ଅନୁଚିତ | ଯଦି ସତ ସାହାସ ଅଛି କଂଗ୍ରେସ ତଥ୍ୟ ପ୍ରମାଣ ସହ କୋର୍ଟକୁ ଯାଉ |

ମାସ୍କ କିଣିବାରେ ମହାଦୁର୍ନୀତି ହୋଇଥିବା ନେଇ ରାଜ୍ୟପାଳଙ୍କୁ ସ୍ମାରକପତ୍ର ଦେବା ପରେ ପ୍ରତିକ୍ରିୟା ରଖିଛନ୍ତି ପିସିସି ସଭାପତି | ମହାମାରୀ ବେଳେ ରାଜ୍ୟ ସ୍ୱାସ୍ଥ୍ୟ ବିଭାଗରେ ହୋଇଥିବା ମହାଦୁର୍ନୀତିର ନିରପେକ୍ଷ ତଦନ୍ତ ଓ କାର୍ଯ୍ୟାନୁଷ୍ଠାନ ଦାବି କରିଛି ଦଳ | ଆଜି ମଧ୍ୟ ଜିଲାରେ ଜିଲାପାଳଙ୍କୁ ସ୍ମାରକପତ୍ର ପ୍ରଦାନ କରିଛନ୍ତି ଦଳୀୟ କର୍ମକର୍ତ୍ତା | ଏବେ ଜିଲାସ୍ତରରେ କରାଯାଇଛି | ଦୁର୍ନୀତିର ପର୍ଦ୍ଦାଫାଶ କରିବାକୁ ଆଗାମୀ ଦିନରେ ବ୍ଲକ୍ ଓ ଗ୍ରାମପଞ୍ଚାୟତସ୍ତରକୁ ଯିବ କଂଗ୍ରେସ । ଦୁର୍ନୀତିକୁ କୌଣସି ମତେ ପ୍ରଶ୍ରୟ ଦିଆଯିବ ନାହିଁ | ଆମେ ପ୍ରଥମରୁ ଟ୍ରେନ ଟିକେଟ ଦେବାକୁ କହିଥିଲୁ | ଏଥିପାଇଁ ସରକାର ନା ଆମକୁ ଅନୁମତି ଦେଲେ ନା ଆମକୁ ଭେଟିଲେ |

କଂଗ୍ରେସ କର୍ମୀ ଅସୁବିଧାରେ ଥିଲେ ମଧ୍ୟ ନିଜର ସାଧ୍ୟ ମତେ ଶ୍ରମିକ ଓ ଗରିବ ଲୋକଙ୍କୁ ମାଗଣାରେ ମାସ୍କ, ଶୁଖିଲା ଖାଦ୍ୟ, ରନ୍ଧାଖାଦ୍ୟ ବଣ୍ଟନ କରିଛନ୍ତି | ଲୋକଙ୍କୁ ସାହାଯ୍ୟ କରିବା ପାଇଁ କଂଗ୍ରେସ ପ୍ରାଣପଣେ ଚେଷ୍ଟା କରିଛି | କୋରୋନା ଯୋଦ୍ଧାଙ୍କ ପାଇଁ ବନ୍ଦେ ଉତ୍କଳ ଜନନୀ ଗାଇଲେ, ହେଲେ ସେମାନଙ୍କୁ ଦିଆଯାଇଥିବା କିଟକୁ ଆଇସିଏମଆର ନିର୍ଦ୍ଦେଶ ନମାନି ବିନା ଟେଷ୍ଟରେ ଦିଆଗଲା | ଏହା କ'ଣ କରୋନା ଯୋଦ୍ଧାଙ୍କୁ ସମ୍ମାନ ବୋଲି ସରକାରଙ୍କୁ ପ୍ରଶ୍ନ କରିଛି ଦଳ | କରୋନା ସମୟରେ ସରକାର ଯାହା ନିଦ୍ଦେଶନାମା ଜାରି କରିଛନ୍ତି, ତାହାକୁ ଆମେ ପାଳନ କରିଥିବା ନେଇ ଦଳ ପକ୍ଷରୁ ଜଣାଇ ଦିଆଯାଇଛି | 

ଅନ୍ୟପଟେ ମାସ୍କ କିଣା ଦୁର୍ନୀତି ପ୍ରସଙ୍ଗରେ ପ୍ରତିକ୍ରିୟା ରଖିଛି ରାଜ୍ୟର ମୁଖ୍ୟ ବିରୋଧି ଦଳ ବିଜେପି | ଏନେଇ ଦଳର ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନ  କହିଛନ୍ତି ଏ ଭ୍ରଷ୍ଟାଚାର ଭିନ୍ନ ପରିସ୍ଥିତିରେ ହୋଇଛି | ଏହାକୁ ଗ୍ରହଣ କରାଯାଇପାରିବ ନାହିଁ | ଏହାର ନିରପେକ୍ଷ ତଦନ୍ତ କରିବା ଆବଶ୍ୟକ | ଏ ଘଟଣାରେ ଯେଉଁମାନେ ସମ୍ପୃକ୍ତ ସେମାନଙ୍କୁ ପଦାକୁ ଆଣିବା ଆବଶ୍ୟକ | ଯେଉଁ କମ୍ପାନୀରୁ ମାସ୍କ କିଣା ଯାଇଛି ସେ କମ୍ପାନୀର କୌଣସି ମାସ୍କର ଦାମ 10 ଟଙ୍କାରୁ ଅଧିକା ନାହିଁ | ଯାହା ଇଣ୍ଡିଆ ମାର୍ଟରେ ରହିଛି । ହେଲେ ସେ କମ୍ପାନୀଠାରୁ କେମିତି 16 ଟଙ୍କାରେ ମାସ୍କ କିଣଗଲା | ରାଜ୍ୟରେ ମହିଳା ସ୍ୱୟଂ ସହାୟକ ଗୋଷ୍ଠୀ(ssg group) ଠାରୁ ଆରମ୍ଭ କରି ରାଜ୍ୟର ଅନେକ ମାସ୍କ ଉପଲବ୍ଧ ରହିଛ | ସରକାର ସେମାନଙ୍କ ଠାରୁ କାହିଁକି ମାସ୍କ କିଣିଲେ ନାହିଁ | ରାଜ୍ୟ ରାଜକୋଷରୁ ଚୋରି ହୋଇଛି। ଯେ ପର୍ଯ୍ୟନ୍ତ ଏହାର ପର୍ଦାଫାଶ ହୋଇନାହିଁ ସେ ପର୍ଯ୍ୟନ୍ତ ଦଳ ଲଢେଇ କରିବ |