ଆମେରିକାର ଅଧିକାଂଶ କୋରୋନା ରୋଗୀଙ୍କ ପରିସ୍ରାରେ ରକ୍ତ !

ନୂଆଦିଲ୍ଲୀ: ଅତ୍ୟଧିକ ଜ୍ୱର, ଶ୍ୱାସ ନେବାରେ ଅସୁବିଧା, ନାକରୁ ପାଣି ବୋହିବା ଏବଂ ଶୁଖିଲା କାଶ ଇତ୍ୟାଦି ସାଧାରଣତଃ କୋରୋନାର ଲକ୍ଷଣ । ଏହାର ବଡ଼ କାରଣ ଏହା ଯେ, କୋରୋନା ସିଧାସଳଖ ଫୁସଫୁସ ଉପରେ ପ୍ରଭାବ ପକାଇଥାଏ । ସେଇଥିପାଇଁ କୋରୋନା ଆକ୍ରାନ୍ତ ଶ୍ୱାସ ନେବାରେ କଷ୍ଟ ଅନୁଭବ କରନ୍ତି । ଠିକ୍ ସମୟରେ ଚିକିତ୍ସା କରାନଗଲେ, ଫୁସଫୁସକୁ ସମ୍ପୁର୍ଣ୍ଣ ଭାବରେ ନଷ୍ଠ ମଧ୍ୟ କରିଦେଇଥାଏ ଏହି ଭାଇରସ୍ । ତେବେ ଏପର୍ଯ୍ୟନ୍ତ କେବଳ ଏତିକି କୁହାଯାଉଥିଲା, କୋରୋନାର ପ୍ରଭାବ ବିଶେଷକରି ଫୁସଫୁସ ଉପରେ ହିଁ ପଡ଼ିଥାଏ । 

ମାତ୍ର ଏହି ଭାଇରସକୁ ନେଇ ଗବେଷଣା କରୁଥିବା ବୈଜ୍ଞାନିକ ଏବଂ ଡାକ୍ତର ଏବେ କିଛି ନୂଆ ଖୁଲାସା କରିଛନ୍ତି । କେବଳ ଫୁସଫୁସ୍ କାହିଁକି, ଶରୀରର ଅନ୍ୟ କିଛି ଅଙ୍ଗପ୍ରତ୍ୟଙ୍ଗ ଉପରେ ମଧ୍ୟ କୋରୋନା ଭାଇରସ୍ ପ୍ରଭାବ ପକାଇଥାଏ ।  

କିଡନୀ: ଆମେରିକା ୟେଲ ସ୍କୁଲ ଅଫ୍ ମେଡିସିନର କିଡନୀ ରୋଗ ବିଶେଷଜ୍ଞ ଏଲେନ କ୍ଲିଙ୍ଗର ଏନେଇ ଚମକାଇଦେଲା ପରି ବୟାନ ଦେଇଛନ୍ତି । ତାଙ୍କ କହିବା ମୁତାବକ, ଆମେରିକାର ଅର୍ଦ୍ଧାଧିକ କୋଭିଡ ଆକ୍ରାନ୍ତଙ୍କ ପରିସ୍ରାରୁ ରକ୍ତ ଏବଂ ପ୍ରୋଟିନ ମିଳିଛି । ଅର୍ଥାତ, କୋରୋନା ଆକ୍ରାନ୍ତଙ୍କ ପରିସ୍ରାରେ ରକ୍ତ ଏବଂ ପ୍ରୋଟିନ ମଧ୍ୟ ପଡ଼ିଥାଏ । କିଡନୀ ଖରାପ ହେବାର ଏହା ପ୍ରାରମ୍ଭିକ ଲକ୍ଷଣ ଅଟେ । ଏଠାରେ ଆମେ କହିରଖୁଛୁ, କୋରୋନା ରୋଗୀଙ୍କୁ ଡାଇଲିସିସ କରୁଥିବା ଟାସ୍କ ଫୋର୍ସରେ ଏଲେନ କ୍ଲିଙ୍ଗର ଅଛନ୍ତି । ଏଲେନ କ୍ଲିଙ୍ଗର କହିଛନ୍ତି, ଏପ୍ରକାର ରୋଗୀଙ୍କ ସଂଖ୍ୟା ଅନେକ ମାତ୍ରାରେ ବଢ଼ୁଛି । ତେଣୁ କୋରୋନା ଭାଇରସ୍ କିଡନୀ ଉପରେ ମଧ୍ୟ ଆକ୍ରମଣ କରୁଥିବାର ସମ୍ଭାବନା ବେଶ୍ ଅଧିକ ।  

ହୃଦୟ: ଫୁସଫୁସ୍ ଓ କିଡନୀ କେବଳ ନୁହେଁ, ହୃଦୟ ଉପରେ ମଧ୍ୟ ହମଲା କରିଥାଏ କୋରୋନା ଭାଇରସ୍ ! ବର୍ତ୍ତମାନ ଏଭଳି କିଛି ସଙ୍କେତ ମିଳୁଛି । ଚୀନ ଏବଂ ନ୍ୟୁୟର୍କର ଡାକ୍ତରମାନେ କୋରୋନା ରୋଗୀଙ୍କ ମାୟୋକାର୍ଡାଇଟିସ୍ ବିଷୟରେ ଉଲ୍ଲେଖ କରିଛନ୍ତି । ଗୁରୁତର କୋରୋନା ଆକ୍ରାନ୍ତଙ୍କ ମଧ୍ୟରୁ ୪୦ ପ୍ରତିଶତଙ୍କ  arrhythmias ଅର୍ଥାତ ହୃଦୟର ଲୟରେ ଅସମାନତା ଦେଖିବାକୁ ମିଳିଥିଲା । ସେହିପରି ୨୦ ପ୍ରତିଶତ ଆକ୍ରାନ୍ତଙ୍କ ହୃଦୟରେ କୌଣସି ପ୍ରକାରର କ୍ଷତି ଦେଖିବାକୁ ମିଳିଥିଲା । 

ଆଖି: ଆପଣ ଜାଣିଥିବେ, ଆଖି ମାଧ୍ୟମରେ ମଧ୍ୟ କୋରୋନା ଭାଇରସ୍ ଶରୀର ଭିତରକୁ ପ୍ରବେଶ କରିଥାଏ । ତେଣୁ ଆଖି ଉପରେ ମଧ୍ୟ ଏହି ଭାଇରସ୍ ହମାଲା କରିଥାନ୍ତି ! ଚୀନର ହୁବେଇ ପ୍ରାନ୍ତର ୩୮ ପ୍ରତିଶତ ରୋଗୀଙ୍କ ଆଖି ଲାଲ କିମ୍ବା ଗୋଲାପୀ ଦେଖିବାକୁ ମିଳିଥିଲା । ଠିକ୍ ଏହି କାରଣରୁ ହିଁ ସ୍ୱାସ୍ଥ୍ୟକର୍ମୀମାନେ ଆଖିରେ ଚଷମା ବ୍ୟବହାର କରି କୋରୋନା ଆକ୍ରାନ୍ତଙ୍କ ଚିକିତ୍ସା କରିଥାନ୍ତି ।