ପୁଣିଥରେ ଚୀନକୁ କଡ ଲେଉଟାଇଲା କୋରୋନା, ରାଜଧାନୀ ବେଜିଂରୁ ୩୬ କୋଭିଡ19 ପଜିଟିଭ ଚିହ୍ନଟ

ବିଗତ ୨୪ ଘଣ୍ଟା ମଧ୍ୟରେ ଚୀନର ରାଜଧାନୀ ବେଜିଂରୁ ୩୬ କୋଭିଡ19 ପଜିଟିଭ ଚିହ୍ନଟ ହୋଇଛନ୍ତି |

ବେଜିଂ: ଗତବର୍ଷ ଡିସେମ୍ବରରୁ ଚୀନର ଉହାନ ସହରରୁ ଆରମ୍ଭ ହୋଇ ସମଗ୍ର ବିଶ୍ୱରେ ଚାଞ୍ଚଲ୍ୟ ଖେଳାଇଛି କୋରୋନା ଭାଇରସ | ବିଶ୍ୱର ବିଭିନ୍ନ କୋଣରେ ଅନୁକୋଣରେ ଦେଖିବାକୁ ମିଳିଛି ଏହାର ପ୍ରକୋପ |  ଶକ୍ତିଶାଳୀ ଠାରୁ ଆରମ୍ଭ କରି ଦୁର୍ବଳ ରାଷ୍ଟ୍ର ସମସ୍ତେ ଏହା ଦ୍ୱାରା ହୋଇଛନ୍ତି କବଲିତ | ଏହାର ଭୟାବହତାକୁ ଦୃଷ୍ଟିରେ ରଖି ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ପକ୍ଷରୁ ଏହାକୁ ବିଶ୍ୱ ମହାମାରୀ ଭାବେ ଘୋଷଣା କରାଯାଇଛି |  

ଚୀନରୁ ଆରମ୍ଭ ହୋଇ ୟୁରୋପ ସମେତ ଆମେରିକାରେ ଆତଙ୍କ ମଚାଇଥିଲା କୋରୋନା | ଏପରିକି ଆମେରିକା, ଫ୍ରାନ୍ସ, ଇଟାଲୀ, ସ୍ପେନ, ଜର୍ମାନ ଆଦି ଦେଶରେ କୋଭିଡ ଆକ୍ରାନ୍ତଙ୍କ ସଂଖ୍ୟା ଦ୍ରୁତଗତିରେ ବଢିବାରେ ଚାଲିଥିଲା |  ଚଳିତ ବର୍ଷ ଆରମ୍ଭରୁ ବେଶ କିଛି ଦିନ ଧରି ତାଣ୍ଡବ ଖେଳାଇବା ପରେ ପୁଣି ଥରେ ଚୀନକୁ କଡ ଲେଉଟାଇଛି ମହାମାରୀ କୋରୋନା  |  

ଏନେଇ ଚୀନ ଜାତୀୟ ସ୍ୱାସ୍ଥ୍ୟ କମିଶନ ପକ୍ଷରୁ କୁହାଯାଇଛି ବିଗତ ୨୪ ଘଣ୍ଟା ମଧ୍ୟରେ ରାଜଧାନୀ ବେଜିଂରେ  ୩୬ କୋଭିଡ19 ପଜିଟିଭ ଚିହ୍ନଟ ହୋଇଛନ୍ତି | ଏଠାରେ ଆକ୍ରାନ୍ତଙ୍କ ସଂଖ୍ୟା ବଢିଥିବା ନେଇ ଜାରି ହୋଇଥିବା ସରକାରୀ ରିପୋର୍ଟରେ କୁହାଯାଇଛି | ସାମ୍ପ୍ରତିକ ପରିସ୍ଥିତିକୁ ଦୃଷ୍ଟିରେ ରଖି ପର୍ଯ୍ୟଟନ ଏବଂ କ୍ରୀଡା ଜନିତ କାର୍ଯ୍ୟକ୍ରମକୁ ବନ୍ଦ କରାଯାଇଛି |

ରାଜଧାନୀ ବେଜିଂରେ ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରୁ ୧୯ ବିଦେଶରୁ ଫେରିଥିବା ବେଳେ ୧୭ ଗ୍ୱାଙ୍ଗଡୋଙ୍ଗରୁ ଆସିଥିଲେ | ବର୍ତ୍ତମାନ ପର୍ଯ୍ୟନ୍ତ ଚୀନରେ ମୋଟ ୮୩,୧୩୨ କୋଭିଡ19 ପଜିଟିଭ ଚିହ୍ନଟ ହୋଇଥିବା ବେଳେ ମୃତ୍ୟୁ ସଂଖ୍ୟା ୪୬୩୪  ରହିଛି |  ସମଗ୍ର ବିଶ୍ୱରେ କୋରୋନା ଆକ୍ରାନ୍ତ ଦେଶଙ୍କ ତାଲିକାର ସର୍ବାଗ୍ରେ ରହିଛି  ଯୁକ୍ତରାଷ୍ଟ୍ର ଆମେରିକା |  ଏଠାରେ କୋରୋନା ସଂକ୍ରମିତଙ୍କ ସଂଖ୍ୟା ୨ ମିଲିୟନ ଅର୍ଥାତ ୨୦ ଲକ୍ଷ ପାର କରି ସାରିଲାଣି |