covid19 update: କମୁନାହିଁ ନୂଆ ମାମଲା, ବଢୁଛି ସୁସ୍ଥଙ୍କ ସଂଖ୍ୟା

ନୂଆଦିଲ୍ଲୀ: ଦେଶରେ କୋରୋନା ନୂଆ ଆକ୍ରାନ୍ତଙ୍କ ମାମଲା କମିବାର ନାଁ ଧରୁନାହିଁ | ହେଲେ ଏହା ମଧ୍ୟରେ ଏକ ଭଲ ଖବର ସାମ୍ନାକୁ | ଭାରତରେ କୋରୋନା ମହାମାରୀରେ ଆକ୍ରାନ୍ତ ହେବା ପରେ ଚିକିତ୍ସିତ ହୋଇ ଆରୋଗ୍ୟ ଲାଭ କରିଥିବା ଲୋକଙ୍କ ସଂଖ୍ୟାରେ ବୃଦ୍ଧି ଘଟିଛି 

ଏନେଇ କେନ୍ଦ୍ରୀୟ ସ୍ୱାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ମିଳିଥିବା ଖବର ଅନୁସାରେ ଜୁନ ୧୬ ତାରିଖ ମଙ୍ଗଳବାର ଅପରାହ୍ଣ ପର୍ଯ୍ୟନ୍ତ ଦେଶରେ ମୋଟ କୋରୋନା ଆକ୍ରାନ୍ତଙ୍କ ସଂଖ୍ୟା ୩ ଲକ୍ଷ ୪୩ହଜାର ୦୯୧ ରହିଥିବା ବେଳେ ମୃତକଙ୍କ ସଂଖ୍ୟା ୯୯୦୦ ରହିଛି | 
ଅନ୍ୟପଟେ ବର୍ତ୍ତମାନ ୧ଲକ୍ଷ ୫୩ହଜାର ୧୭୮ ମାମଲା ସକ୍ରିୟ ଥିବା ବେଳେ ୧ଲକ୍ଷ ୮୦ହଜାର ୦୧୩ ଆକ୍ରାନ୍ତ ସୁସ୍ଥ ହୋଇଛନ୍ତି |  

ଏହି ତଥ୍ୟ ଉପରେ ନଜର ପକାଇଲେ ଏହା ସ୍ପଷ୍ଟ ଯେ, ଦେଶରେ ଦେଶରେ ଏ ପର୍ଯ୍ୟନ୍ତ ମୋଟ ଯେତିକି ଲୋକ କୋରୋନାରେ ଆକ୍ରାନ୍ତ ହୋଇଛନ୍ତି ସେମାନଙ୍କ ମଧ୍ୟରୁ ଅଧାରୁ ଅଧିକ ସୁସ୍ଥ ହୋଇ ସାରିଛନ୍ତି | ଅର୍ଥାତ ଏବେ ୫୨.୪୬ ପ୍ରତିଶତ ଆକ୍ରାନ୍ତ ଆରୋଗ୍ୟ ଲାଭ କରିଛନ୍ତି |      

ବିଗତ ୨୪ ଘଣ୍ଟା ମଧ୍ୟରେ ଦେଶରେ କୋଭିଡ19 ଜନିତ ୧୦୬୬୭ଟି ନୂଆ ମାମଲା ସାମ୍ନାକୁ ଆସିଥିବା ବେଳେ, ୩୮୦ କୋରୋନା ପଜିଟିଭଙ୍କ ମୃତ୍ୟୁ ଘଟିଛି | କେନ୍ଦ୍ର ସରକାରଙ୍କ ପକ୍ଷରୁ ଜାରି ହୋଇଥିବା ରିପୋର୍ଟରେ କୁହାଯାଇଛି ଗତ ୨୪ ଘଣ୍ଟା ମଧ୍ୟରେ ଦେଶରେ କରାଯାଇଥିବା ମୋଟ କୋରୋନା ସାମ୍ପୁଲ ପରୀକ୍ଷଣରୁ ୬.୮୮ ପ୍ରତିଶତ କୋଭିଡ19 ପଜଟିଭ ଥିବା ଜଣାପଡିଛି |        
 
ଦେଶରୁ ପର୍ଯ୍ୟାୟକ୍ରମେ ଲକ ଡାଉନ ହଟାଯାଉଥିବା ବେଳେ, କରୋନା ମହାମାରୀର ମୁକାବିଲା ନେଇ ମଙ୍ଗଳବାର ଏବଂ ବୁଧବାର ବିଭିନ୍ନ ରାଜ୍ୟର ମୁଖ୍ୟମନ୍ତ୍ରୀ ଏବଂ କେନ୍ଦ୍ରଶାସିତ ଅଞ୍ଚଳର ପ୍ରଶାସକଙ୍କ ସହ ଆଲୋଚନା କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି | ଭିଡିଓ କନଫରେନ୍ସିଂ ଜରିଆରେ ଦିନ ୩ଟା ବେଳେ ଏହି ବୈଠକ ଅନୁଷ୍ଠିତ ହେବ |  

ଆଜି ହେବାକୁ ଥିବା ବୈଠକରେ ପଞ୍ଜାବ, ଆସାମ, କେରଳ, ଉତ୍ତରାଖଣ୍ଡ, ଝାଡଖଣ୍ଡ, ଛତିଶଗଡ, ହିମାଚଳ ପ୍ରଦେଶ, ଚଣ୍ଡିଗଡ, ଗୋଆ, ମଣିପୁର, ନାଗାଲ୍ୟାଣ୍ଡ, ଲଦାଖ, ପୁଦୁଚେରୀ, ଅରୁଣାଚଳ ପ୍ରଦେଶ, ମେଘାଳୟ, ମିଜୋରାମ, ଆଣ୍ଡାମାନ ଦ୍ୱୀପପୁଞ୍ଜ, ଦାଦ୍ରା ନଗର ହାଭେଳି, ଡାମନ ଡିଭ, ସିକ୍କିମ ଏବଂ ଲାକ୍ଷାଦ୍ୱୀପରେ ଆଦି  ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳ ଯୋଗ ଦେବେ | ଆସନ୍ତାକାଲି ହେବାକୁ ଥିବା ବୈଠକରେ ବାକି ସମସ୍ତ ରାଜ୍ୟ ଏବଂ ଜମ୍ମୁକାଶ୍ମୀରର ଉପରାଜ୍ୟପାଳ ଯୋଗହେବେ|