ମ୍ୟାକ୍ସୱେଲ ପରେ ଆଉ ଜଣେ କ୍ରିକେଟର ମାନସିକ ରୋଗ ପାଇଁ ଛାଡ଼ିଲେ କ୍ରିକେଟ!

ନୂଆଦିଲ୍ଲୀ: ଅଷ୍ଟ୍ରେଲିଆ ଦଳର ପ୍ରଦର୍ଶନରେ ପୂର୍ବାପେକ୍ଷା ସୁଧାର ଆସିଛି, କିନ୍ତୁ ଟିମର ଖେଳାଳିଙ୍କ ମାନସିକ ସ୍ୱାସ୍ଥ୍ୟବସ୍ଥାରେ ଅବନତି ଦେଖା ଦେଉଛି । ବିଗତ ଦିନରେ ଦଳର ଷ୍ଟାର ବ୍ୟାଟ୍ସମ୍ୟାନ ଗ୍ଲେନ ମ୍ୟାକ୍ସୱେଲ ମାନସିକ ରୋଗର ଶିକାର ହୋଇ କ୍ରିକେଟ ଦୁନିଆରୁ ସ୍ୱଳ୍ପ ସମୟ ପାଇଁ ବ୍ରେକ ନେଇଥିଲେ । ପୁଣି ଆଉ ଏକ ଖେଳାଳି ମାନିସକ ସ୍ୱାସ୍ଥ୍ୟ ସମ୍ୱନ୍ଧୀୟ ସମସ୍ୟା ଯୋଗୁଁ କ୍ରିକେଟରୁ ବ୍ରେକ ନେଇଛନ୍ତି । ଅଷ୍ଟ୍ରେଲିଆ ମହିଳା କ୍ରିକେଟ ଦଳର ଖେଳାଳି ସୋଫୀ ମୋଲିନେ ମାନସିକ ରୋଗରେ ଆକ୍ରାନ୍ତ ହୋଇ କିଛି ସମୟ ପାଇଁ କ୍ରିକେଟରୁ ବ୍ରେକ ନେବାର ନିଷ୍ପତ୍ତି ନେଇଛନ୍ତି ।

ସୋଫି ମହିଳା ବିଗ ବ୍ୟାଶ୍ ଲିଗରେ ରେନିଗେଡ୍ସ ଦଳ ତରଫରୁ ୧୦ଟି ମ୍ୟାଚ ଖେଳିଛନ୍ତି । ସେ ଟି-20 ବିଶ୍ୱକପରେ ଜାଗା କରିବା ପାଇଁ କଠିନ ପରିଶ୍ରମ କରୁଥିଲେ । କିନ୍ତୁ ଶନିବାର ସେ ମେଲର୍ବନରେ ହେବାକୁ ଥିବା ମ୍ୟାଚ ପୂର୍ବରୁ ନିଜ ନାଁକୁ ଫେରାଇ ନେଇଛନ୍ତି । ଆପଣଙ୍କୁ କହି ରଖୁଛୁ ଯେ ମାନସିକ ସ୍ୱାସ୍ଥ୍ୟ କାରଣରୁ କ୍ରିକେଟରୁ ବ୍ରେକ ନେବା ସୋଫି ହେଉଛନ୍ତି ଚତୁର୍ଥ ଅଷ୍ଟ୍ରେଲିଆର ଖେଳାଳି । ଏହାପୂର୍ବରୁ ମ୍ୟାକ୍ସୱେଲ, ନିକ ମାଡିସନ ଓ ବିଲ ପୁକୋବସ୍କୋ ମଧ୍ୟ ମାନସିକ ଚାପ ଯୋଗୁଁ କ୍ରିକେଟରୁ ଦୂରେଇ ଯାଇଥିଲେ ।

ବିଗତ ଦିନରେ ଅଷ୍ଟ୍ରେଲିଆର ଷ୍ଟାର ଅଲରାଉଣ୍ଡର ଗ୍ଲେନ ମ୍ୟାକ୍ସୱେଲ ମାନସିକ ସ୍ୱାସ୍ଥ୍ୟ ସମ୍ୱନ୍ଧୀୟ କିଛି ସମସ୍ୟାର ସାମ୍ନାକୁ ଆସିଥିଲା । ଯାହା ପରେ ସେ ହଠାତ କ୍ରିକେଟ ଜଗତରୁ ବ୍ରେକ ନେବାର ଘୋଷଣା କରିଥିଲେ । ଏହି ଖବର ଆସିବା ପରେ କ୍ରିକେଟ ଜଗତ ଚକିତ ହୋଇଯାଇଥିଲେ । ପ୍ରଶ୍ନ ଉଠୁବା ଆରମ୍ଭ ହୋଇଯାଇଥିଲା ମୈଦାନରେ ବିରୋଧୀ ବୋଲରଙ୍କ ନିଦ ହଜାଇ ଦେଉଥିବା ମ୍ୟାକ୍ସୱେଲଙ୍କୁ ହଠାତ ଏପରି କଣ ହୋଇଛି, ଯାହା ପାଇଁ ତାଙ୍କୁ କ୍ରିକେଟ ମୈଦାନ ଛାଡିବାକୁ ପଡିଛି ।

କ୍ରିକେଟ ଅଷ୍ଟ୍ରେଲିଆର ମନୋବୈଜ୍ଞାନିକ ଡକ୍ଟର ମାଇକେଲ ଲାୟଡ ଏହାର ପୃଷ୍ଟି କରିଥିଲେ । ସେ କହିଥିଲେ ଯେ ଗ୍ଲେନ ନିଜ ମାନସିକ ସ୍ୱାସ୍ଥ୍ୟ ସମ୍ୱନ୍ଧୀୟ କିଛି ସମସ୍ୟାର ସାମ୍ନା କରୁଛନ୍ତି । ଏଥିପାଇଁ ସେ ଖେଳରୁ କିଛି ସମୟ ପାଇଁ ଦୂରେଇ ରହିବେ । ଗ୍ଲେନ ଏହି ସମସ୍ୟାର ସମାଧାନ କରିବା ପାଇଁ ଏହାର ସଂପୂର୍ଣ୍ଣ ଚିକିତ୍ସା କରିବାକୁ ପ୍ରସ୍ତୁତ ଅଛନ୍ତି । ମ୍ୟାକ୍ସୱେଲ ଶ୍ରୀଲଙ୍କା ବିରୋଧରେ ଟି-୨୦ ସିରିଜରେ ଖେଳିଥିଲେ । ଏହାସହ ଏହି ସିରିଜରେ ସେ ଚତ୍କାର ପ୍ରଦର୍ଶନ କରିଥିଲେ ।