• ଆମେରିକାରେ ଆରମ୍ଭ ହେଲା ବାଇଡେନ୍ ଶାସନ
  • ୪୬ତମ ଆମେରିକା ରାଷ୍ଟ୍ରପତି ଭାବେ ଶପଥ ନେଲେ ଜୋ ବାଇଡେନ୍
  • ଆମେରିକାର ପ୍ରଥମ ମହିଳା ଉପରାଷ୍ଟ୍ରପତି ଭାବେ ଶପଥ ନେଲେ କମଲା ହାରିସ୍
  • ମନ୍ତ୍ରୀ ପ୍ରଫୁଲ୍ଲ ମଲ୍ଲିକଙ୍କ ବିରୋଧରେ କ୍ଷମତାର ଅପବ୍ୟବହାର ଅଭିଯୋଗ
  • ପରୀ ହତ୍ୟା ମାମଲା: ଜୁଭେନାଇଲ ଜଷ୍ଟିସ ବୋର୍ଡରୁ ମାମଲା ଗଲା ଚିଲଡ୍ରେନ କୋର୍ଟ
  • ଛତ୍ରପୁର ଲକ୍ଷ୍ମୀଦତ୍ତ ପ୍ରଧାନ ହତ୍ୟା ମାମଲା; ଭୃଗୁ ବକ୍ସିପାତ୍ର, ଗୋଲକ ମହାପାତ୍ରଙ୍କୁ ଆଗୁଆ ଜାମିନ୍
  • ଗୁରୁବାରଠୁ ବିନା କଟକଣାରେ ଜଗା ଦର୍ଶନ
  • ଅଭିଭାବକଙ୍କୁ ଆଶ୍ୱସ୍ତି; ରାଜ୍ୟରେ କୋହଳ ହେଲା ଘରୋଇ ସ୍କୁଲ ଫି'
  • ୭ଟି ସ୍ଲାବରେ ଘରୋଇ ସ୍କୁଲ ଫି' ଛାଡ ନିଷ୍ପତ୍ତି
  • LICj MD ହେଲେ ଓଡ଼ିଆ ପୁଅ ସିଦ୍ଧାର୍ଥ ମହାନ୍ତି

କନ୍ଧମାଳର ଏହି ସ୍ଥାନ ବୁଲିଯାଇଛନ୍ତି କି?

ଓଡ଼ିଶାରେ ବି ଅଛି ଏପରି ସ୍ଥାନ ଯେଉଁଠି ପର୍ଯ୍ୟଟକଙ୍କୁ ଆକର୍ଷିତ କରୁଛି ପ୍ରକୃତି 

କନ୍ଧମାଳର ଏହି ସ୍ଥାନ ବୁଲିଯାଇଛନ୍ତି କି?
ଫଟୋ ସୌଜନ୍ୟ: ସୋସିଆଲ ମିଡିଆ

ଶୁଭଦ୍ରା ବେହେରା, ଭୁବନେଶ୍ୱର: ଆସିଲାଣି ଶୀତଋତୁ । ଶୀତଋତୁ  ଆସିବା ସହ ପିକନିକର ଋତୁ ମଧ୍ୟ ଆସିଥାଏ । ଶୀତଋତୁରେ ରାଜ୍ୟର ବିଭିନ୍ନ ପର୍ଯ୍ୟଟନ ସ୍ଥଳୀ ତଥା ପିକନିକ ସ୍ପଟରେ ଅନେକ ସଂଖ୍ୟାରେ ପର୍ଯ୍ୟଟକଙ୍କ ଭିଡ଼ ପରିଲକ୍ଷିତ ହୁଏ । ଜଞ୍ଜାଳମୟ ଜୀବନରୁ ଟିକିଏ ଫୁରସତ ମିଳିଲେ ଲୋକେମାନେ ଖୋଜନ୍ତି ଶାନ୍ତିପୂର୍ଣ୍ଣ ସ୍ଥାନ । ଯେଉଁଠାରେ ପରିବାର ତଥା ନିଜର ଆତ୍ମୀୟ ସ୍ୱଜନଙ୍କ ସହ କିଛି ବିଶେଷ ମୂହୂର୍ତ୍ତ କଟାଇପାରିବେ । ସେହିପରି ସ୍କୁଲ କଲେଜରେ ମଧ୍ୟ ଶୀତ ଋତୁରେ ପିକିନିକର ଆୟୋଜନ କରାଯାଏ । ଛାତ୍ରଛାତ୍ରୀମାନେ ବିଭିନ୍ନ ପିକିନିକ ସ୍ପଟ ବୁଲିବା ସହ ସେହି ସ୍ଥାନ ବିଷୟରେ ଜ୍ଞାନ ଆହରଣ କରନ୍ତି । ତେବେ ଆମ ରାଜ୍ୟରେ ରହିଛି ଅନେକ ପର୍ଯ୍ୟଟନ ସ୍ଥଳୀ ଯେଉଁଠାରେ ରାଜ୍ୟ ତଥା ରାଜ୍ୟ ବାହାରୁ ଅନେକ ସଂଖ୍ୟାରେ ପର୍ଯ୍ୟଟକଙ୍କ ଭିଡ଼ ଜମେ ଶୀତ ଋତୁରେ ।

ବିଶେଷ କରି ଓଡ଼ିଶାର କାଶ୍ମୀର କୁହାଯାଉଥିବା ଦାରିଙ୍ଗବାଡ଼ିରେ ଜମେ ପର୍ଯ୍ୟଟକଙ୍କ ଭିଡ଼ । ଏହା ଓଡ଼ିଶାର ଏକମାତ୍ର ପର୍ବତୀୟ ସ୍ଥାନ ଯେଉଁଠାରେ ଶୀତ ଦିନେ ବରଫପାତ ହୁଏ । କେବଳ ଦାରିଙ୍ଗବାଡ଼ି ପାଇଁ ନୁହେଁ ବରଂ କନ୍ଧମାଳ ଜିଲ୍ଲାରେ ଥିବା ଅନ୍ୟାନ୍ୟ ପର୍ଯ୍ୟଟନ ସ୍ଥଳୀକୁ ମଧ୍ୟ ଦୂରଦୂରାନ୍ତରୁ ପର୍ଯ୍ୟଟଙ୍କ ସୁଅ ଛୁଟିଥାଏ ।

ତେବେ ଆପଣମାନେ ଯଦି ଏହି ଶୀତଋତୁରେ ପିକନିକର ପ୍ଲାନ କରୁଛନ୍ତି ତାହେଲେ ଥରେ ପଢିନିଅନ୍ତୁ ଆମର ଏହି ରିପୋର୍ଟ :

ଦାରିଙ୍ଗବାଡ଼ିରେ ଆପଣ କଣ ଦେଖିବେ?
ହିଲ ଭିୟୁ ପାର୍କ: ଦାରିଙ୍ଗବାଡି ଠାରୁ ୧ କିମି ଦୂରରେ ଅବସ୍ଥିତ ହିଲ ଭିୟୁ ପାର୍କ । ଚାରିପଟେ ପର୍ବତ ମାଳା  ଏବଂ ଦାରିଙ୍ଗବାଡିର କିଛି ଗାଁ ମଧ୍ୟ ଏହି ପର୍ବତମାଳାରୁ ଦେଖାଯାଏ । ସୁନ୍ଦର ପରିବେଶ ସାଙ୍ଗକୁ ଏଠାରେ ଏକ  ଚିଲଡ୍ରେନ୍ସ ପାର୍କ ମଧ୍ୟ ରହିଛି । ବଣ ଭୋଜି ପାଇଁ ଏଠାରେ ପର୍ଯ୍ୟାପ୍ତ ପରିମାଣର ଜାଗା ମଧ୍ୟ ରହିଛି । ଏଠାରେ ପ୍ରାୟତଃ ବଣଭୋଜି ପାଇଁ  ପର୍ଯ୍ୟଟକଙ୍କ ଭିଡ଼ ଜମେ ।

ନେଚର ପାର୍କ: ଦାରିଙ୍ଗବାଡି ଠାରୁ ୧ କିମି ଦୂରରେ ଅବସ୍ଥିତ ନେଚର ପାର୍କ । ଏଠାରେ କୃତ୍ରିମ ଝରଣା ରହିଛି । ଏଥିସହ ପ୍ରାକୃତିକ ସୌନ୍ଦର୍ଯ୍ୟ ସାଙ୍ଗକୁ ବିଭିନ୍ନ ପ୍ରକାରର ଫୁଲ ବଗିଚା ସାଙ୍ଗକୁ ଆୟୁର୍ବେଦିକ ଗଛ ଉଦ୍ୟାନ ମଧ୍ୟ ରହିଛି । ଏଠାରେ ପିଲାଙ୍କ ପାଇଁ ବିଭିନ୍ନ ଖେଲଣା ସରଞ୍ଜାମ ମଧ୍ୟ ରଖାଯାଇଛି । ଏହି ପାର୍କଟି ପିଲାମାନଙ୍କୁ ବେଶ ଆକର୍ଷିତ କରେ ।
ଡୁଲୁରି ପିକନିକ ସ୍ପଟ:  ଏହା ଦାରିଙ୍ଗବାଡି ଠାରୁ ୩ କିମି ଦୂରରେ ଅବସ୍ଥିତ  । ଏହା ଏକ ପଥରରେ ପରିପୂର୍ଣ୍ଣ ନଦୀ । ଏଠାରେ ଆପଣ ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବା ସହ ବଣ ଭୋଜି କରିପାରିବେ ।
କିରିକୁଟି ପିକନିକ ଗ୍ରାଉଣ୍ଡ: ଏହା ଦାରିଙ୍ଗବାଡିରୁ ୧୭ କିମି ଦୂରରେ ଅବସ୍ଥିତ । ଏହି ପିକିନିକ ଗ୍ରାଉଣ୍ଡରେ ଆପଣ ମାନେ ଏମୁ ପକ୍ଷୀଙ୍କୁ ଦେଖିପାରିବେ । ଏଠାରେ ଆପଣ ପ୍ରାକୃତିକ ସୌନ୍ଦର୍ଯ୍ୟ ଉପଭୋଗ କରିବା ସହ ବଣ ଭୋଜି କରିପାରିବେ
କଫି ବଗିଚା: ଏହା ଦାରିଙ୍ଗବାଡି ଠାରୁ ୫୦୦ ମିଟର ଦୂରରେ ଅବସ୍ଥିତ । ଏଠାରେ ଆପଣ କଫି ଗଛ ସହ ଆମ୍ବ, ପଣସ, ଗୋଲମରିଚ, ନୀଳଗିରି, ପାଇନ୍, ଝାଉଁ, ଚନ୍ଦନ ଆଦି ଗଛ ଦେଖିପାରିବେ । ଏହି ବଗିଚାରେ ବିଶେଷ କରି କଫି ଗଛ ଉପେ ଧ୍ୟାନ ଦିଆଯାଏ  । ଏଠାରେ ଏକ ଛୋଟ ଚିଡିଆଖାନା ମଧ୍ୟ ରହିଛି । ଏହି ଚିଡିଆଖାନରେ  ଠେକୁଆ , ପାଟ୍ଟ ମୂଷା ଓ ଶୁଆ ରଖାଯାଇଛି ।
ହର୍ବାଲ ଗାର୍ଡେନ ପିକନିକ ସ୍ପଟ:  ଏହା କଫି ବଗିଚା ସାମ୍ନାରେ ଅବସ୍ଥିତ । ଏହି ଜାଗାଟି ବଣ ଭୋଜି କରିବା ପାଇଁ ଉଦ୍ଧିଷ୍ଟ ।
ଦାସିଂବାଡି ୱାଟର ଫଲ : ଏହା ଦାରିଙ୍ଗବାଡି ଠାରୁ ୧୩ କିମି ଦୂରରେ ଅବସ୍ଥିତ । ଏହି ଜଳପ୍ରପାତରେ ପ୍ରାୟ ୪୦ ଫୁଟ ଉଚ୍ଚରୁ ପାଣି ପଡ଼ିଥାଏ । ଏହା ଚାରିପଟେ ସବୁଜ ଜଙ୍ଗଲ ରହିଛି ।  
ଦାରବାଡି ଜଳପ୍ରପାତ:  ଏହା ଦାରିଙ୍ଗବାଡିରୁ ୨୨ କିମି ଦୂରରେ ଅବସ୍ଥିତ । ଏଠାରେ ଆପଣ ବଣଭୋଜି କରିପାରିବେ । ତେବେ ଦାରିଙ୍ଗବାଡି ଏବଂ କୋଟଗଡ ସୀମାନ୍ତରେ ରହିଛି ଏହି ଜଳପ୍ରପାତ 

କେମିତି ଯିବେ ଦାରିଙ୍ଗବାଡି?
ଦାରିଙ୍ଗବାଡି ଆମ ରାଜ୍ୟର କନ୍ଧମାଳ ଜିଲ୍ଲାରେ ଅବସ୍ଥିତ । ଆପଣ ଏଠାକୁ ବସ୍ କିମ୍ବା ଟ୍ରେନ ମାଧ୍ୟମରେ ଯାଇପାରିବେ ।  ଭୁବନେଶ୍ୱର ଠାରୁ ଦାରିଙ୍ଗବାଡିର ଦୂରତା ୨୫୧ କିମି । ରାଜ୍ୟର ଯେକୌଣସି ସ୍ଥାନରୁ ଆପଣ ବସ୍  ଯୋଗେ ମଧ୍ୟ ଯାଇପାରିବେ ।  ଫୁଲବାଣୀ ବସ୍ ଷ୍ଟାଣ୍ଡରୁ ଏହା ୨୦୦ କିମି ଦୂରତାରେ ଅବସ୍ଥିତ  ।  ଦାରିଙ୍ଗବାଡିର ନିକଟତମ ରେଲୱେ ଷ୍ଟେସନ ବ୍ରହ୍ମପୁର । ଏହା ଦାରିଙ୍ଗବାଡି ଠାରୁ ୧୨୦ କିମି ଦୂରରେ ଅବସ୍ଥିତ ।  ବହ୍ମପୁରରୁ ଟ୍ୟାକ୍ସି ଯୋଗେ ଦାରିଙ୍ଗବାଡି ଯାଇପାରିବେ । ୩ଟି ରୁଟ୍ ମାଧ୍ୟମରେ ଆପଣ ଦାରିଙ୍ଗବାଡି ଯାଇପାରିବେ । ପ୍ରଥମଟି ସୋରଡା଼ ଦେଇ ଗଲେ ଆପଣଙ୍କୁ ୧୨୦ କିମି ଦୂରତ୍ୱ  ପଡ଼ିବ, ୨ୟଟି ଭଞ୍ଜନଗର-ଜି.ଉଦୟଗିରି ଦେଇ ଗଲେ ଆପଣଙ୍କୁ ପଡ଼ିବ ୧୮୦ କି.ମିର ଦୂରତ୍ୱ । ଏବଂ ୩ୟଟି ମୋହନା-ବ୍ରାହ୍ମଣୀଗାଁ ଦେଇଗଲେ ଆପଣଙ୍କୁ ପଡ଼ିବ ୧୦୫ କ.ମି .

ତେବେ ଏଥିସହିତ ଆପଣ କନ୍ଧମାଳ ଜିଲ୍ଲାରେ ଥିବା ଅନ୍ୟାନ୍ୟ ପର୍ଯ୍ୟଟନ ସ୍ଥଳୀର ମଧ୍ୟ ମଜା ଉଠାଇ ପାରିବେ:
ବେଲଘର ପର୍ଯ୍ୟଟନ ସ୍ଥଳୀ: ଏଠାରେ  ଆପଣ କାଠବଙ୍ଗଳା, ବେଲଘର ହାତୀ ସଂରକ୍ଷାଞ୍ଚଳ ଏବଂ ନେଚର କ୍ୟାମ୍ପର ମଜା ଉଠାଇପାରିବେ । ଏହି ପର୍ଯ୍ୟଟନ ସ୍ଥଳୀ ପ୍ରାକୃତିକ ସୌନ୍ଦର୍ଯ୍ୟ ସାଙ୍ଗଙ୍କୁ ହାତୀ ଆଦି ବନ୍ୟ ପ୍ରାଣୀରେ ପରିପୂର୍ଣ୍ଣ । ଏଠାରେ କୁଟିକନ୍ଧ ଜନଜାତିର ଲୋକେ ବସବାସ କରନ୍ତି ।
ବରାଳ ଦେବୀ ମନ୍ଦିର: ଏହି ମନ୍ଦିର ମା ବରାଳ ଦେବୀଙ୍କ ପାଇଁ ପ୍ରସିଦ୍ଧ ଅଟେ । ମା ବରାଳ ଦେବୀଙ୍କୁ ଜଗତର ଉଦ୍ଧାରକର୍ତ୍ତା ଭାବେ ବିଶ୍ୱାସ ରହିଛି । ଏଠାରେ ଏକ ପିଲାସାଲୁଙ୍କି ଡ୍ୟାମ ମଧ୍ୟ ରହିଛି । ଏହା ବରାଳଦେବୀ ମନ୍ଦିର ଠାରୁ ୩ କିମି ଦୂରରେ ଅବସ୍ଥିତ ।
ପତୁଡି ଜଳ ପ୍ରପାତ: ଏହା ଫୁଲବାଣୀରୁ ୧୮ କ.ମି. ଦୂରରେ ଅବସ୍ଥିତ । ଏହା ଏକ ପ୍ରାକୃତିକ ସୌନ୍ଦର୍ଯ୍ୟ ଭରା ସ୍ଥାନ, ଏଠାରେ ସାଲୁଙ୍କି ନଦୀ ୬୦ ଫୁଟ ଉଚ୍ଚରୁ ପ୍ରବାହିତ ହୋଇଥାଏ ।
ଜଗନ୍ନାଥ ମନ୍ଦିର:  ଏହା ଫୁଲବାଣୀରେ ଅବସ୍ଥିତ । ଏଠାକୁ ଆପଣ ବସ୍ କିମ୍ବା ଟାକ୍ସି ମାଧ୍ୟମରେ ଭ୍ରମଣ କରିପାରିବେ ।