'ଏହା ଫ୍ଲୁ ନୁହେଁ, ଆମ ଉପରେ ହମଲା'

ୱାଂସିଟନ: କୋରୋନାକୁ ନେଇ ଯଦି କୌଣସି ଦେଶ ସବୁଠୁ ଅଧିକ ପ୍ରଭାବିତ ହୋଇଛି, ତାହା ହେଉଛି ଆମେରିକା । ବିଶ୍ୱର ସବୁଠାରୁ ଶକ୍ତିଶାଳୀ ଦେଶ ଆମେରିକାରେ ଏବେ କୋରୋନା ଆକ୍ରାନ୍ତଙ୍କ ସଂଖ୍ୟା ୯ ଲକ୍ଷ ଛୁଇଁବାକୁ ବସିଲାଣି । ସେହିପରି ମୃତକଙ୍କ ସଂଖ୍ୟା ୫୦ ହଜାରରୁ ଆଉ ଅଳ୍ପ ଦୂରରେ । ତେବେ ଏଭଳି ପରିସ୍ଥିତିରେ କୋରୋନାର ଉତ୍ପତ୍ତି ସ୍ଥଳ ଚୀନ ଉପରେ ପୁରା ଖପ୍ପା ଅଛନ୍ତି ଆମେରିକା ରାଷ୍ଟ୍ରପତି । ତୁହାକୁ ତୁହା ଚୀନ ଉପରେ ବିଶୋଦଗାର କରୁଛନ୍ତି ଟ୍ରମ୍ପ । 

ବୁଧବାର ହ୍ୱାଇଟ ହାଉସରେ ସମ୍ବାଦିକଙ୍କୁ ସମ୍ବୋଧନ କରିବା ବେଳେ ବଡ଼ ବୟାନ ଦେଇଥିଲେ ଆମେରିକା ରାଷ୍ଟ୍ରପତି । ସେ କହିଥିଲେ, କୋରୋନା କୌଣସି ଫ୍ଲୁ ନଥିଲା । ଏହା ଆମ ଉପରେ ହମଲା ଥିଲା । ସେ ଆହୁରି ମଧ୍ୟ କହିଛନ୍ତି, ୧୯୧୭ ମସିହା ପରେ ପ୍ରଥମଥର ପାଇଁ ଏପରି ହୋଇଛି । କାହିଁକିନା ୧୯୧୭ ପରେ କେହି ମଧ୍ୟ ଏପରି କିଛି ଅବସ୍ଥା ଦେଖି ନ ଥିଲେ । 

ତେବେ ଆମେରକି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ କଥା ଏପରି ଇସାରା କରୁଛି ଯେ, ସେ ଚୀନ ଉପରେ ପ୍ରବଳ ଖପ୍ପା ଅଛନ୍ତି । ରକ୍ତ ଚାଉଳ ଚୋବାଉଛନ୍ତି । ଆମେରିକା ବିରୋଧରେ ଏହା ଚୀନରେ ଷଡ଼ଯନ୍ତ୍ର ବୋଲି ଆଶଙ୍କା କରୁଛନ୍ତି ରାଷ୍ଟ୍ରପତି ଟ୍ରମ୍ପ । ଆମେରିକା ଭାବୁଛି, ଚୀନ ଜାଣିଶୁଣି କୋରୋନା ଭାଇରସକୁ ବିଶ୍ୱବ୍ୟାପୀ ବିସ୍ତାର କରାଇଛି । ଚୀନର ଚାର୍ଗେଟରେ ଆମେରିକା ଥିବାରୁ ଏପରି କରିଥାଇପାରେ ବୋଲି ଅନୁମାନ କରୁଛନ୍ତି ଡୋନାଲ୍ଡ ଟ୍ରମ୍ପ ।